Diasabra mainta, a ricibi informacion indicando cu a haya un persona masculino sin bida riba cama, na sanger, na Morgenster. Despues, medionan local a identifica e fayecido como Rene van der Plank, un registered accountant conoci na Aruba.
Despues di ricibi e informe inicial, central di polis a dirigi tanto polis como ambulance na e sitio. Na yegada di e patruya a bin haya en berdad un persona den un plas di sanger riba cama y e persona no ta reacciona. E ambulance a bandona e sitio mirando cu no por a haci nada mas pa e persona, y na su lugar a pidi presencia di dokter forensico. Dokter forensico a constata cu lo tin algo particular den e caso aki, esta cu tabata mustra cu tin sla na e curpa, y a pidi fiscal como tambe slachtofferhulp na e sitio.
Polis a cuminsa un investigacion, y despues di un rato, a conclui cu e homber lo a bira malo, cay, herida su curpa, subi riba cama, haya un atake di curason te fayece.
Medionan di comunicacion local a identifica e fayecido como Rene van der Plank, di 68 aña di edad, kende tabata un Registered Accountant conoci na Aruba pa su trabao relaciona cu asunto financiero di negoshinan grandi na Aruba.
Bon Dia Aruba ta manda palabra di condolencia y forsa na famia y sernan keri di e fayecido. Cu Rene van der Plank sosega na paz.
