Durante 131 Den bo Bario e personal di 131 ta hiba informacion tocante e servicionan di 131 pa e mayornan. E motibonan pakico e mucha/ hoben por tuma contacto, orario, dianan cu por tuma contacto y cu e servicio ta anonimo y gratis, ta informacion cu durante 131 Den bo Bario ta ser duna na e mayornan. 131 ta un aliado di e mayornan den educacion di nan yiunan.
Banda di duna informacion tocante e servicionan di 131, e personal di 131 ta tene un combersacion cu e mayornan tocante diferente desaroyo bao di nos muchanan y hobennan, y retonan cu mayornan ta encontra pa cu educacion di nan yiunan.
Na e adresnan cu encontra mayornan ta hiba un combersacion tocante e servicionan di 131. Tambe ta laga un pamfleta cu informacion tocante e servicionan di 131 na tur adres.
E aña aki e personal di 131 a bishita 10 bario den diferente districto. E barionan cu a bishita ta Semelerstraat y vecindario, Bushiri, Madiki, Madiki Kavel, Seroe Patrishi, Tarabana, Cura Cabai Zuid, Village y De Vuyst. Durante 131 Den bo Bario a logra di bishita 1126 adres.
E personal di 131 ta ser ricibi calurosamente den e barionan. E mayornan/ adultonan cu cual a logra hiba un combersacion a expresa nan sosten na e servicionan di 131 y aprecio pa e sosten di 131 na nan. 131 ta sumamente contento pa e manera cu nos a ser ricibi den e barionan.
