(AFP)—Debe nacional bruto di Merca a subi pa mas cu $40 triyon pa prome biaha, segun datonan di gobierno publica diaranson, superando pronosticonan anterior na un ritmo alimenta parcialmente pa tarifanan di Presidente Donald Trump cu a keda invalida.
E aumento den prestamo ta tuma luga mientras obligacionnan di Merca a termino largo, relaciona cu seguridad social y cuido di salud, a sigui crece, mientras pagonan di interes tambe a subi.
Debe publico total pendiente tabata na $40,05 triyon na ciere di actividad diamars, segun datonan publica diaranson pa Departamento di Tesoro. Esaki ta contrasta cu un pronostico anterior di Congressional Budget Office, cu a calcula cu e debe total lo yega $39,4 triyon pa fin di aña fiscal 2026.
Debe creciente di Merca ta bin mientras preocupacion tocante inflacion, guera den Medio Oriente y gastonan di gobierno ta causa inkietud entre inversionistanan, y costo di presta placa a aumenta.
Rendimentonan di bononan di Tesoro pa termino largo a subi diamars te na nan nivel mas halto desde 2007, reflehando un presion creciente riba prijsnan debi na e guera contra Iran y preocupacion tocante gasto deficitario di Merca. E aumento ta obliga gobierno di Merca pa refinancia su debe na e tasanan mas halto desde prome cu crisis financiero mundial di 2008.
Pero Departamento di Tesoro di Merca a interveni pa stabilisa mercado di bono pa termino largo diaranson trempan, causando rendimentonan pa baha. Gobierno federal ta opera cu un deficit y ta presta placa pa yuda cubri su obligacionnan, incluyendo gastonan di guera y reduccionnan di impuesto.
“Pa algun tempo caba ta ampliamente conoci cu gobierno di Merca tabata riba un rumbo basta insostenibel cu su deficitnan,” Jessica Riedl, experto den presupuesto y impuesto na Brookings Institution, a bisa. “Den e ultimo añanan, Merca a pasa pa deficitnan di aproximadamente $2 triyon, hasta durante tempo di paz y prosperidad,” el a agrega.
Mientras deficitnan di tres pa cuatro porciento di producto interno bruto (GDP) antes tabata preocupa mercadonan financiero, el a señala cu actualmente e nivelnan ta mas cerca di seis pa shete porciento di GDP. “Esey a pone mercadonan mas nervioso,” el a bisa.
Mientras inflacion a pusha tasanan di interes ariba, gastonan di interes riba debe tambe a aumenta, y gastonan relaciona cu un poblacion cu ta embeheciendo ta aumenta deficitnan.
Analistanan ta señala cu no tin un nivel specifico di proporcion entre debe y GDP cu automaticamente ta provoca un crisis. Aunke debe bruto ta marca un limite simbolico, hopi economista ta considera debe den man di publico como e medida cu tin mas importancia economico.
Secretario di Tesoro Scott Bessent anteriormente a establece como meta reduci deficit di Merca te na tres porciento di GDP.
