Por mira cu cierto satisfaccion cu ministro di finanzas ta anuncia su decision cu ta brinda perspectiva pa regulariza e proceso financiero di gobernacion di tal forma cu por yega na e fase di entrega na tempo di cuenta anual y cu certificacion di accountant. E asunto aki tabatin añas na caminda y tabata parce di nunca yega na un final debido.

Ta bon pa scucha awor cu e colaboracion cu e fundacion SOAB ta encera tambe percura pa nos propio Centrale Accountantsdienst (CAD) haya e ampliacion di su base profesional cu e no solamente merece, sino simplemente mester tambe pa por funciona debidamente. Pa hopi aña por a tuma nota regularmente di e frustracion di e servicio clave aki, cu dado momento tabatin hopi menos personal cu binti aña antes, sigur na nivel di registeraccountant, necesario pa haci auditoria pa un gobernacion cu tabata creciendo tur caminda, menos na CAD…

For di palabranan di e actual mandatario responsable nos por comprende cu esaki ta un compromiso firme: “Nos no kier a solamente elimina e atraso. Nos kier construi un sistema financiero cu ta funciona structuralmente, cu control, transparencia y responsabilidad. Aruba mester por presenta su cuentanan anual na tempo y e cuentanan mester por pasa door di un auditoria profesional. Esaki ta parti di pone e situacion financiero di Pais na ordo y manten’e na ordo.”

Sin embargo, e compromiso aki ta yama e pregunta si gobierno so ta bay cumpli cu cuenta y relato anual na tempo, o cu ta bay pone orden tambe riba e sinfin di entidad cu ta liga na gobernacion y/o ta ricibi subsidio gubernamental. Den e añanan cu nos tin supervision financiero nos por a mira e ridiculez di Pais Aruba dunando cuenta lo mihor posible, mientras varios entidad cu tabata o ta forma parti di e asina yama ‘sector colectivo’ tabata simplemente confronta gobierno y e supervisor cu e hecho cu nan no tin cuenta anual pa presenta. Nos no sa si internamente tabata reina berguenza, rabia o resignacion; contal cu publico nunca lo haya sa si gobierno tabata haci esfuerzo pa tuma paso contra incumplimento, o cu tabata keda tolera e situacion aki, cu segun nos informacion ainda no ta cana satisfactoriamente.

Y si den e cercania inmediato di gobernacion ta parce cu no tin un ambiente di cumplimento estricto cu reglanan di bon administracion financiero, mucho menos esey lo ta cerca e entidadnan priva (e.o. fundacion) cu ta ricibi subsidio y/o unda Pais Aruba tin un cierto participacion den dirigencia. Nos tin algun aña caba cu un Codigo Civil nobo, cu tin un gran cantidad di regla mas estricto riba persona huridico, manera fundacion y asociacion. Te awe nos no a mira un esfuerzo gubernamental pa duna mas informacion tocante e cambionan aki, cu ta aumenta e peso administrativo bastante pa e entidadnan aki, pero cu ta inevitable den e mundo cu nos ta biba aden. Y lo minimo cu gobierno por haci, si no ta preocupa pa tur entidad, ta institui un cuadro fiho y fuerte di control riba tur esunnan cu ta beneficia di subsidio gubernamental.

Esaki no solamente pasobra bon gobrenacion ta dicta esaki, sino pa bon di tur entidad, pasobra esaki ta evita cu cierto momento ta lanta rumor o sospecha tocante e maneho financiero di un entidad, cu por referi na e control debido di banda gubernamental.

Den e dianan aki ta surgiendo un discusion tocante un fundacion, cu durante e anterior gobierno tabata haci trabao riba diferente tereno y cu a ricibi en total un suma di mas di 10 miyon florin na subsidio. No ta trata aki di evalua funcionamento di e fundacion, ni si e fondonan ricibi tabata hustifica. Ta trata aki di e hecho cu keto bay tur e entidadnan aki ta biba den un secretismo cu gobierno mes ta mantene pa nan, a traves di no exigi cu TUR ta publica nan cuenta y relato anual.

Den un categoria un poco diferente nos ta haya e caso di Refineria di Aruba NV, unda supuesto iregularidad interno a conduci na denuncia di parti di Pais Aruba, cu Ministerio Publico a dicidi di no atende, pa supuesto escasez di personal pa cumpli cu tur tarea. Gobierno awor ta acudi na huez pa ordena Ministerio Publico procede cu e investigacion. Esaki riba su mes ta e caminda corecto pa gobierno cana si e pensamento ta cu e denuncia ta hustifica. Pero, mientras e ministro encarga cu husticia ta mustra trabao corecto y diligente, nos como publico ta keda completamente den scuridad ora ta trata di e situacion general y financiero di e compania aki, cu ta di propiedad publico. Nos a yega di mira algo di nan maneho financiero? Poco aña pasa, cu tabata di interes di un partido politico, nos a haya algo di relato financiero pa mira, pero a cambia algo den sentido di pone presion riba e entidadnan aki pa publica nan cuenta y relato anual? Nos por ta den e situacion, por lo menos peculiar, cu ta bay Ministerio Publico pa ‘algo cu no ta bon’ den e compania, mientras cu Aruba no tin ni e minimo idea con e compania aki ta funciona… Por ehemplo, cu no tin ingreso considerable di su mes y ta e compania ‘yiu’ (FMSA) ta produci placa pa mantene ‘mama y yiu’ pareu? Lo ta un poco straño si gobierno, cu tur su razon, ta mehorando su operacion financiero – transparente – mientras ta tene henter comunidad den scur encuanto casi tur entidad alrededor di gobierno… Mester sigui tolera e abonormalidad aki?