(Infobae) – Venezuela a firma diamars un contract cu e compania Mericano Hunt Oil pa desaroyo di e camponan di petroleo y gas Caro y Carisito na este di e pais, segun Minister di Hidrocarburo Paula Henao a informa.

Henao, cu ta lidera un delegacion oficial na Merca, a splica na canal estatal Venezolana de Television cu e acuerdo a establece un modelo di participacion productivo pa impulsa y recupera produccion den e dos areanan.

E minister a destaca cu Hunt Oil ta “un compania cu un trayectoria reconoci” y cu e lo aporta recursonan pa recupera produccion den e camponan petrolero.

Ademas, Henao a anuncia un aliansa cu e compania tecnologico multinacional SLB, anteriormente conoci como Schlumberger, pa realisa un estudio integra den teritorio Venezolano.

E acuerdonan a ser firma na Houston, caminda e delegacion Venezolano ta inclui vice minister di Geopolitica Eduardo Ramirez, vice presidente ehecutivo di compania estatal PDVSA, Jovanny Martinez, y encargado di negoshinan di Venezuela na Merca, Johan Alvarez.

E delegacion tambe a participa den un foro hunto cu sub secretario Mericano di Energia Kyle Haustveit.

Na juni pasa, Venezuela y SLB a firma na Caracas un memorandum di entendemento pa explora oportunidadnan di cooperacion den servicio petrolero y di gas usando tecnologia avansa.

Produccion petrolero ta sigui aumenta

Produccion di crudo Venezolano a yega na un promedio di 1,2 miyon bari pa dia na juli, un aumento di 1,09% compara cu juni, durante un periodo cu tabata afecta pa dos temblor den e parti noord di e pais cu a causa por lo menos 6.438 morto.

Segun cifranan oficial, produccion nacional a subi 29,8% desde e 924.000 bari pa dia registra na januari, despues di captura di ex dictador Venezolano Nicolas Maduro den capital di e pais.

Desde e momento ey, Venezuela a habri su economia pa inversion stranhero den sectornan strategico manera petroleo, mineria y electricidad, como parti di un cooperacion cu Washington.

Presidente Mericano Donald Trump recientemente a describi relacion entre e dos paisnan como “excelente.”

Parlamento di Venezuela, cu ta bao di control di gobierno, a aproba na januari un reforma di ley di hidrocarburo impulsa pa presidente encarga Delcy Rodriguez, cu meta di atrae mas inversion stranhero den sector petrolero.

Analistanan a interpreta e medida como un desmantelamento di parti di legado di Hugo Chavez, kende a goberna entre 1999 y 2013.

Economia ta crece, pero crisis salarial ta continua

Producto Interno Bruto di Venezuela a crece 7,14% den e segundo kwartaal di 2026 compara cu e mesun periodo aña pasa, impulsa principalmente pa un aumento di 9,1% den actividad petrolero, segun cifranan oficial publica diamars.

Banco Central di Venezuela (BCV) a informa cu actividad no petrolero a crece 5,79% durante e mesun periodo.

Sector financiero y di seguro a lidera e crecemento cu un aumento di 26,26%, sigui pa construccion cu 16,11%.

A pesar di e recuperacion economico, sindicatonan y trahadornan di diferente sector ta adverti cu e crisis salarial ainda ta continua.

Segun tarifa oficial, salario minimo y pension actualmente ta ekivalente na alrededor di 16 cent di dollar pa luna, mientras costo di canasta alimentario pa un famia di 5 persona ta pasa $700, segun calculonan independiente.