(AFP) – Gobierno Mericano tin plan di kita visa di stranheronan cu a bay e pais pa turismo of negoshi pero a busca keda mas tempo pa medio di aplica pa asilo, Departamento Estatal a bisa diamars.
E accion ta marca otro paso den administracion di Trump su operacion pa reduci migracion na Merca.
E administracion a bisa cu awo e ta trahando cu Department of Homeland Security pa identifica of revoca e visa di esnan cu, el a bisa, a bay Merca como bishitante temporario pero despues a aplica pa asilo pa nan por keda permanentemente.
“Obtene un visa pa por solicita asilo ta un fraude – cual ta base pa revoca un visa,” vocero Tommy Pigott a bisa den un declaracion cu a confirma reportahenan den prensa tocante e politica nobo.
Cas Blanco, den un publicacion riba X a sugeri cu “te hasta 200.000 visa” lo keda afecta y a bisa cu esaki por ta e “revocacion di visa mas grandi den historia.”
E departamento no a confirma ni rechasa e cantidad aki. Pigott a bisa, “e cantidad di revocacion ta keda dinamico.”
E administracion tambe a revoca visa di oficialnan Mexicano recientemente, incluyendo yiu homber di ex presidente Andres Manuel Lopez Obrador. Esaki a causa for di e presidente actual, Claudia Scheinbaum.
Trump, ken a gana reeleccion cu su promesa di lucha contra inmigracion ilegal, a expulsa un gran cantidad di hende cu tabata den e pais sin documento apropia di residencia.
Pero tambe el a traha pa restringi e entrada di stranheronan cu no cumpli cu reglanan y a bay tras di esnan cu ta keda mas tempo cu nan visa ta permiti despues cu nan caduca.
Algun di e medidanan aki a haya desafio y blokeo den corte.
