Posible contribucion di migrante na seguro medico (AZV)

Den debate recien a surgi tambe e pregunta, cuanto e aumento di migrante, via e programa special Hunto pa Progreso, pero tambe en general via otro proceso, por contribui na caha di seguro social, mirando e aumento fuerte di cantidad di empleado cu por spera di e operacion aki.

Pa e articulo aki lo concentra riba contribucion na AZV, mientras posteriormente nos por añadi tambe e datonan pa fondo di pension (AOV).

Pa haci esey nos mester cuminza cu e datonan basico pa e tema aki.Nos ta tuma pa esaki e cifranan di 2023, 2024, 2025 y 2026, segun cu tin dato disponible.

Poblacion y cantidad di registrado AZV y SVB

(*): proyeccion BDA – Fuente: CBS, SVB, AZV, Kwartaalrapportage IV-2025 gob. Aruba

Por mira cu e aumento na 2025 di empleado na SVB tabata 3.169. Desde inicio di 2026, te cu 1 di juli, SVB a registra 2.730 persona emplea, loke ta sugeri un aumento di alrededor di 6.000 empleado registra mas na 2026, si e fluho di peticion, via e integracion di migrante via e programa di Dimas y Organizacion Internacional di Migracion (OIM), keda na mesun nivel; e por ta mas.

Informacion adicional di Dimas

Di parti di Dimas a ricibi algun informacion cu ta duna un vista mas di cerca di e cantidad di permiso pidi y otorga na 2025 y loke por anticipa na 2026. Na 2025 a ricibi (cifra provisional) un cantidad di 6.990 peticion (pa permiso relaciona cu trabao) di e trayecto di Hunto pa Progreso, di cual 81% a keda aproba, alrededor di 5660 anto. E cantidad aki mester aparece ainda den e cifranan di Censo (y CBS), y SVB y AZV finalmente.

Durante aña 2026 te recientemente DIMAS tin registra un total di 16.566 peticion, loke ya ta indica cu tambe e aña aki e cantidad di peticion na DIMAS lo surpasa 20.000, segun nan propio informacion. Nos no ta sigur si e cifra aki ta referi na e total di peticion, y no solamente di e promer peticionnan, cu ta di interes aki.

Mirando e aumento aki, por anticipa cu en total na 2026 por tin registra por lo menos entre 5.500 y 6.000 persona mas na SVB, pa un parti grandi stranhero cu permiso recien otorga. Si nos tuma como punto di salida e cantidad di persona registra na SVB pa fin di 2026, esaki por resulta den un poblacion total di alrededor di 116.000, como minimo. E problema cu nos a keda cune ta cu actualmente no tin vista riba e cantidad di persona perteneciente na reunificacion familiar, cu ta keda registra tambe na Censo, pero cu no ta registra na SVB, si nan no ta emplea.

Kico cada empleado ta trece aden pa AZV?

Na fin di 2025, SVB tabatin registra 46.136 persona emplea, cu a yuda genera Afl. 302,6 miyon na prima AZV. Pa logra un promedio exacto di contribucion di empleado ta bira dificil, pasobra mester tene cuenta cu e contribucion di pensionadonan, entre 24.000 y 25.000 actualmente, cu pa un parti minoritario ademas ta registra como empleado ainda. Pues no por simplemente dividi e suma anual di prima di AZV pa e cantidad di empleado registra na SVB. Pero nos por crea un caso teorico si, tumando como norma provisional cu un tercera parti di pensionado ta emplea tambe. A base di 24.000 persona esey ta anto un grupo di 16.000 no registra na SVB como empleado, hunto cu 46.000 registra pa trabao: ta duna nos un grupo total di 62.000 persona cu ta paga prima AZV. Na 2025 e grupo a paga Afl. 315 miyon, un promedio di Afl. 5.080. Si pa fin di 2026 nos tin 52.000 persona registra na SVB como empleado, lo tin 6.000 persona mas pa contribui na AZV. Esaki por resulta den alrededor di Afl. 30 miyon extra.

Den e calculacion aki no a inclui e aumento di poblacion cu inmigracion, manera menciona, ta trece cune, via reunificacion di famia di e empleado cu haya permiso. Solamente a base di e aumento poblacional causa pa empleado, e cifra calcula pa e poblacion na fin di 2026 ta 116.000, loke ta duna un promedio di gasto medico di Afl. 522 miyon, a base di e promedio di gasto ‘per capita’ di AZV pa 2024 di Afl. 4.500. Ingreso total di AZV pa 2025 ta alrededor di Afl. 554 miyon, a base di prima y BAZV (cifra gubernamental; kwartaalrapportage IV-2025). Na 2024 AZV tabatin un surplus ainda di Afl. 101 miyon y pa 2025 ta anticipa Afl. 86 miyon. A base di aumento considerable di gasto medico, cu registracion di mas persona na Censo, por anticipa cu e surplus lo sigui mengua, hasta sin inclui e aumento di gasto promedio considera ‘normal’.

Nota final tocante e probable poblacion total: pa e añanan pa cual nos tin cifra di poblacion (CBS) y cifra di registrado na SVB, por constata cu e corelacion entre poblacion y persona emplea ta cambiando, cu e cantidad di persona emplea subiendo relativamente. Na 2023 tabatin 39,1% di e poblacion registra na SVB; na 2024 esaki a bira 39,6% y na 2025 41,7%. Un crecemento mas rapido di e grupo emplea por causa un aumento mas grandi ainda den e poblacion total, pero nos no a inclui esey, pa falta di dato mas specifico. Si tuma, tentativamente, un grupo di 52.000 persona emplea na 43% di e poblacion, nos ta yega na un poblacion di algo mas di 120.000 persona. Esaki no necesariamente lo ta e caso, dependiendo di e efecto di ‘reunificacion familiar’ den e grupo migrante.