Lider di fraccion di MEP, Evelyn Wever-Croes, ta pidi Parlamento yama minister Gerlien Croes pa duna cuenta tocante e biahe di trabao cu el a haci den un jet priva pa Corsou.

E peticion ta sigui despues cu MEP a ricibi tanto e conseho di Bezwaaradviescommissie LAR y e decision cu minister Croes a tuma dia 28 di augustus riba e obhecion presenta pa Wever-Croes y parlamentario Rocco Tjon. Segun Wever-Croes, e comision a considera e obhecionnan funda y a conseha minister pa contesta e preguntanan, mientras minister Croes a dicidi no sigui e conseho y a declara e obhecionnan infunda.

Durante un conferencia di prensa, Wever-Croes a splica cu dia 10 di juli Bezwaaradviescommissie LAR a manda su conseho na minister Croes. Despues di alrededor di siete siman, MEP a ricibi e documento hunto cu e decision di minister. El a splica cu e comision a considera cu e obhecionnan cu Tjon y su persona a presenta tin base y a conseha minister pa contesta e preguntanan cu nan a haci relaciona cu e biahe.

“E minister mester duna cuenta y esaki ta conta pa tur minister, pa tur locual ta pasa den gobernacion,” Wever-Croes a declara.

Na mesun momento, minister Croes a entrega su decision riba e obhecion. Den e decision fecha 28 di augustus, e mandatario a indica cu e no ta bay sigui e conseho di Bezwaaradviescommissie LAR, a declara e obhecionnan di e dos parlamentarionan infunda y a mantene su decision original.

Sinembargo, Croes si a inclui cierto contesta na e preguntanan cu MEP a haci. Segun parlamentario Wever-Croes, nan a presenta siete pregunta, di cual e minister a contesta uno completamente y un otro parcialmente, mientras e restonan no a haya un contesta completo.

Un di e puntonan cu lider di fraccion di MEP a subraya ta e informacion tocante e gastonan di e biahe. Segun Wever-Croes, minister Croes ta indica den su decision cu el a contribui parcialmente y boluntariamente na un parti di e gasto relaciona cu e landing fee di e vuelo.

Wever-Croes ta considera cu e informacion aki ta diferente for di loke e mandatario a bin ta bisa durante e ultimo nuebe luna, esta cu el a paga su biahe. Pa MEP, esaki ta crea pregunta tocante exactamente cua gasto minister a paga y ken a cubri e resto.

Otro diferencia di posicion ta relaciona cu privacidad. Segun Wever-Croes, minister ta considera cu informacion tocante e pago ta parti di su bida personal. E lider di fraccion ta rechasa e argumento aki, indicando cu tanto e minister como e proceso di LAR ta trata e vuelo como un biahe di trabao.

“Nos no ta pidi e cuenta bancario di e minister, nos ta pidi informacion tocante di un pago. Un pago cu e minister mes a confirma cu el a haci. Nos ta puntra na ken, cuanto y ki dia el a paga,” Wever-Croes a cuestiona.

Segun e parlamentario, si e prueba di pago ta contene informacion personal cu no mag bira publico, e informacion ey por ser tapa of elimina y e parti relevante por ser entrega. Pa MEP, esaki lo permiti confirma e pago sin revela otro informacion personal di minister.

Di dos punto cu Wever-Croes a trece dilanti ta ken a paga e resto di e gastonan, mirando cu, segun e splicacion di minister Croes, el a contribui solamente na un parti di e gastonan.

Fraccion di MEP kier sa ken a cubri e resto, pakico y si esaki por ser considera un beneficio pa e madnatario. E fraccion tambe ta cuestiona si un eventual contribucion di un otro persona mester a ser declara conforme regla, ley y e codigo di conducta di integridad pa minister.

Parlamentario Wever-Croes a critica tambe e posicion cu minister Croes ta tuma tocante aplicacion di e codigo di conducta. Lider di fraccion di MEP ta considera cu e normanan di integridad ta relevante precisamente den situacionnan unda tin pregunta tocante pago of beneficio relaciona cu funcion publico.

Wever-Croes a enfatisa cu su critica no ta dirigi contra minister Croes personalmente, sino contra su maneho di e asunto y loke MEP ta considera falta di transparencia. “Mi no tin nada personal contra e minister, mi tin problema cu su maneho y e falta di transparencia cu e ta aplica. E minister mester duna cuenta,” el a enfatisa.

Segun parlamentario Wever-Croes, e minister por a pone un punto final na gran parti di e discusion si el a entrega mas claridad den su decision. “Masha facil den su contesta e por a duna transparencia y contesta na ken, cuanto y ki dia el a paga.”

E caso ta relaciona cu un biahe cu minister Croes a haci den un jet priva pa Corsou y cu durante varios luna a genera pregunta politico tocante e gastonan y e manera cu nan a ser paga. Tjon y Wever-Croes a presenta pregunta tocante e asunto y despues a sigui e via di obhecion.

Awor cu tanto e conseho di Bezwaaradviescommissie LAR como e decision di minister ta disponibel, MEP kier pa e asunto sigui den Parlamento.

Segun Wever-Croes, durante e ultimo nuebe luna minister Croes a ser invita mas di cuater biaha pa presenta den Parlamento y duna cuenta riba e topico, pero esaki ainda no a sucede. E ta spera cu e conseho di LAR lo conduci na un reunion den Parlamento.

“Aworaki e minister mester bin Parlamento. E bala ta den scochi di e minister y di Parlamento. LAR a papia caba y a bisa cu e minister mester duna cuenta y aworaki ta na Parlamento pa yama e minister pa e bin duna cuenta,” Wever-Croes a señala.

E lider di fraccion a pidi parlamentarionan cu ta sostene minister pa tuma nota tanto di e conseho di LAR como di e decision di Croes y pa establece un fecha pronto pa trata e asunto.

Mientras tanto, Wever-Croes a indica cu MEP lo sigui cana e caminda cu mester cana, si ta Corte, Ministerio Publico of Bureau Integriteit. No obstante, el a subraya cu Parlamento awor mester carga su responsabilidad di controla gobierno.