Gasto di personal di gobierno di Aruba a sigui aumenta durante prome mitar di 2026, mientras cantidad di empleado publico tambe a registra un aumento. Te cu final di juni, gasto di personal a yega na Afl. 261,8 miyon, mas di Afl. 4,1 miyon riba e nivel registra den e mesun periodo di 2025. Na mesun momento, cantidad total di FTE (Full-Time Equivalent), esta puesto di trabao calcula riba base di empleo di tempo completo, a aumenta di 3.334 den di dos kwartaal di 2025 pa 3.379 den mesun periodo di 2026. A pesar di e aumento, gobierno ta proyecta cu gasto total di personal pa henter 2026 lo keda na 8.2% di e GDP, cual ta bao di e norma maximo di 10%.

E informacion ta sali for di Uitvoeringsrapportage di e di dos kwartaal di 2026, prepara pa Directie Financiën. E rapport ta dedica un seccion specifico na desaroyo di gasto di personal y na e norma cu gobierno mester cumpli bao di Landsverordening Aruba tijdelijk financieel toezicht (LAft).

Segun e cifranan general di gasto, te cu 30 di juni gobierno a registra Afl. 261,801 miyon na gasto di personal, incluyendo pago di overtime. Den e mesun periodo di 2025 e cifra tabata Afl. 257,731 miyon. Esaki ta representa un aumento di poco mas cu Afl. 4,1 miyon. Pa henter 2026, gobierno tin Afl. 514,693 miyon presupuesta pa gasto di personal. Te cu final di juni, 50.9% di e cantidad aki ya a ser gasta.

E rapport ta relaciona e aumento principalmente cu crecemento den cantidad di FTE. Den e di dos kwartaal di 2025 gobierno tabatin 3.334 FTE, mientras cu den mesun kwartaal di e aña aki e cifra a yega na 3.379. Esaki ta un aumento di 45 FTE compara cu un aña prome.

Compara cu prome kwartaal di 2026, e aumento tabata mas limita. E Uitvoeringsrapportage ta indica cu cantidad total di FTE a subi cu nuebe den di dos kwartaal. Segun Directie Financiën, e aumento ta principalmente resultado di vacaturanan existente cu a ser yena durante e periodo en cuestion.

Durante e di dos kwartaal, 46 empleado publico nobo a drenta servicio cerca diferente organisacion di gobierno. Na mesun momento, 10 contrato a termina of a ser cancela despues di revision pa Departamento di Recurso Humano. DRH ta analisa tur kwartaal cua contratonan ta yega na nan fecha di vencemento, despues di cual decisionnan necesario ta ser tuma den Conseho di Minister.

Ademas, seis empleado a laga servicio publico pa otro motibo durante di dos kwartaal. Cuater a retira riba peticion propio y dos a ser despedi pa motibo disciplinario. E rapport no ta registra ningun morto ni salida bao categoria di otro motibo durante e periodo.

Otro dos funcionario a yega edad di pensioen durante e kwartaal. Solamente dos empleado publico a haci uso di e regeling di VUT, cu ta permiti retiro anticipa bao cierto condicionnan. E cifranan ta duna un indicacion cu salida natural di personal durante e periodo tabata relativamente limita compara cu cantidad di contratacion nobo.

Salario y toeslag ta representa e parti mas grandi di gasto di personal. Durante e di dos kwartaal di 2026, gasto bao e categoria aki a yega na Afl. 80,633 miyon, compara cu Afl. 77,151 miyon den mesun kwartaal di 2025. Esaki ta un aumento di Afl. 3,483 miyon. E aumento aki ta splica gran parti di e aumento total den gasto di personal compara cu e mesun periodo di 2025.

Pago di overtime, sinembargo, practicamente no a cambia. Den e di dos kwartaal di 2025, gobierno a paga Afl. 8,217 miyon na overtime, compara cu Afl. 8,214 miyon den 2026. E diferencia ta solamente alrededor di Afl. 4 mil menos. Directie Financiën ta indica cu un di e hermentnan di politica ta precisamente pa limita pago di overtime, y e monitoreo ta mustra cu gasto den e categoria aki a keda casi igual compara cu aña pasa.

Gasto di vakantie-uitkering tambe a aumenta, di Afl. 24,944 miyon na Afl. 25,334 miyon, un diferencia di aproximadamente Afl. 390 mil. Contribucion na APFA a subi di Afl. 8,676 miyon pa Afl. 8,912 miyon, mientras contribucion na AZV a aumenta un poco di Afl. 7,703 miyon pa Afl. 7,717 miyon.

Ora Directie Financiën uza e definicion mas amplio di gasto di personal pa calcula e norma legal, e cifra ta otro. Bao e calculacion aki, gasto acumula te cu final di e di dos kwartaal ta Afl. 338,535 miyon. E suma ta inclui no solamente personal directo di Pais Aruba, sino tambe diferente payroll y algun gasto cu no ta aparece den tur kwartaal y cu pa motibo di calculacion ta ser calcula basa riba cifranan di aña anterior.

E diferencia entre e Afl. 261,8 miyon den cuenta general di gasto y e Afl. 338,535 miyon uza pa e norma di personal ta, consecuentemente, resultado di dos definicion diferente. E prome ta e categoria presupuestario di gasto di personal registra te cu juni, mientras e calculacion di public wage bill ta uza un definicion mas amplio cu ta inclui otro grupo y costo relaciona cu personal. E rapport ta indica cu bao di e definicion amplio, gasto di personal den e di dos kwartaal a aumenta cu aproximadamente Afl. 5 miyon compara cu e mesun kwartaal di 2025.

E calculacion amplio ta inclui, entre otro, empleado y ex-empleado di Pais Aruba, Dienst Publieke Scholen, Dienst Openbare Werken, diferente organisacion di educacion, Parlamento di Aruba, organonan permanente di conseho y otro personal externo. E ta inclui tambe contratacion externo directo, substituto, personal riba yamada y dunadornan di servicio.

Pa determina si gobierno ta cumpli cu norma di personal, e gasto ta ser compara cu e GDP. Proyeccion di GDP pa 2026 ta Afl. 8.078 miyon. Te cu final di e di dos kwartaal, public wage bill acumula ta representa 4,19% di GDP. Directie Financiën ta calcula cu, si e tendencia aki continua y ora inclui gastonan cu no ta aparece proporcionalmente den cada kwartaal, public wage bill pa henter 2026 lo yega na aproximadamente 8.2% di GDP.

E nivel aki ta bao di e limite di 10% cu ta forma parti di e norma financiero. Segun e Uitvoeringsrapportage, Pais Aruba ta consecuentemente riba caminda pa cumpli cu e norma durante 2026. E reto pa siguiente añanan ta pa mantene e gasto structuralmente bao di e limite, specialmente mientras cantidad di personal, salario y otro costo relaciona cu empleo por sigui cambia.

Otro medida relaciona cu control di gasto di personal ta eliminacion di aumento automatico den escala y promocion. E rapport ta recorda cu e sistema di maneho di prestacion a ser introduci na 2023 como parti di e agenda di implementacion di Landspakket. Sinembargo, Directie Financiën ta indica cu ainda no por calcula e efecto financiero di e medida, pasobra no tin un sistema di registracion disponibel pa haci e calculacion.

E situacion te cu juni ta consecuentemente mustra dos tendencia na mesun momento. Gobierno ta keda bao di e norma general di gasto di personal compara cu GDP, pero tanto costo como cantidad di FTE a aumenta compara cu 2025. E aumento den personal ta relaciona principalmente cu yena vacaturanan, mientras e componente mas grandi di crecemento den costo ta salario y toeslag.

Pa resto di 2026, desaroyo lo depende di e cantidad di contratacion nobo, salida di personal, aumento salarial y otro costo relaciona cu empleo. Cu e public wage bill proyecta na 8.2% di GDP, gobierno tin margen bao e limite di 10%, pero e Uitvoeringsrapportage ta pone enfasis riba necesidad di medidanan structural pa garantisa cu e norma por keda sostenibel den añanan cu ta bin.