Ayera durante dia, Cuerpo Policial di Aruba a informa di dos caso lamentable, unda persona a ser haya sin bida. E prome caso ta involucra un persona posiblemente vincula na traficacion of contrabanda di persona, y e otro, un adulto mayor desaparecido, kende su famia tabatin varios siman ta busk’e.

Curpa haya na costa

E prome caso cu Cuerpo Policial di Aruba a informa, a cuminsa alrededor di 6:14am na momento cu Central di Polis a keda notifica cu a haya un curpa sin bida, cerca di Anker na Bachelor Beach, conoci originalmente como Boca Tabla.

Patruya di San Nicolas a keda despacha na e sitio di e sucedido hunto cu otro autoridadnan. Na yegada a confirma cu tabatin un curpa sin bida, den estado avansa di descomposicion. E fayecido ta un hende homber, kende te na e momento, no a keda identifica.

Segun Cuerpo Policial a splica, departamento forensico, dokter forensico, departamento di recherche, UMM (Unit Mensenhandel Mensensmokkel), departamento di slachtofferhulp y bombero tur a presenta na e sitio. E caso ta bao investigacion. E hecho cu UMM, e unidad di traficacion y contrabanda di persona, tambe a presenta, ta indica cu e investigacion por ta relaciona cu e dos crimen ai.

 

Cuerpo Policial Aruba ta pidi pa esun cu sa algo of a wak algo pa yama e tiplijn di polis cu ta 11141. Bo ta keda anonimo.

Curpa haya den mondi

Mas laat e mesun mainta, pa alrededor di 10:49am, a notifica Central di Polis cu un persona cu tabata cana banda di caminda a mira un curpa sin bida den mondi na Primavera. Na momento cu polis a presenta, nan a haya e curpa di un homber sin bida, den estado avansa di descomposicion. Polis forensico, dokter forensico, Recherche di Oranjestad y slachtofferhulp tur a presenta na e sitio.

Cuerpo Policial a identifica e persona haya sin bida como Glenn Obispa, naci na Aruba. Famia di Sr. Glenn Marlon Helmut Obispa, di 68 aña di edad, tabatin algun siman buscando su paradero. Segun e famia a publica riba rednan social, e ultimo biaha cu a mir’e tabata dia 15 y 20 di augustus 2026. Den nan publicacion, e famia a bisa cu Sr. Obispa tabatin problema di salud y no tabatin su medicamentonan, y ademas tabatin problema cu rudia y no por a cana mucho bon. “Tur biaha cu Glenn a ser mira e ta bisti cu un camisa blanco manga largo, un carson kaki, un pechi shinishi, un tas chikito preto y e ta cana cu un rugtas color bruin. Tin posibilidad grandi cu su cacho “Boy” ta cune pasobra semper e ta cana cune. Boy ta un cacho color preto cu banchi berde,” e famia a bisa den un post seis dia pasa. A agrega cu a mira Boy ultimo biaha un siman prome den area di crusada Rondweg/Caya Papa Juan Pablo ll y Caya Juancho Kock.

“Glenn ta conoci pa bay for di cas entre 5 pa 10 dia pero nunca pa asina largo,” segun e famia, “y semper a logra hay’e e camindanan cu e mes a bisa cu e lo ta y a ser mira semper den e dianan cu e sa bay pa famia of conocir.”

Lamentablemente, a haya Sr. Obispa sin bida. No tin mas informacion di kico exactamente a sucede cu a resulta den su morto. Cuerpo Policial y Bon Dia Aruba ta manda palabra di condolencia na famia y sernan keri di e fayecido.