CAft: Aruba ta proyecta surplus di Afl. 203 miyon pa 2027, pero ta pidi plan concreto pa AIOF y mas atencion pa inversion publico

Aruba ta proyecta un surplus di Afl. 203 miyon pa sector colectivo den 2027, cual ta ekivalente na 2.3% di e Producto Interno Bruto (GDP). Segun College Aruba financieel toezicht (CAft), cu esaki e proyecto di presupuesto pa 2027 ta cumpli, pa awor, cu e norma financiero estableci den e Landsverordening Aruba tijdelijk financieel toezicht (LAft). Sinembargo, CAft ta señala varios punto cu mester haya atencion, particularmente e nivel limita di inversion publico, e fondo nobo pa inversion cu ainda no ta activo, e carga grandi di interes y e necesidad pa Aruba tene un bista mas completo riba su sector colectivo.

CAft a publica su conseho riba e proyecto di presupuesto 2027 di Aruba recientemente. E Colegio di supervision ta conclui cu e presupuesto ta cumpli cu e norma pa saldo financiero di sector colectivo y tambe cu e obligacion pa compensa deficit di añanan anterior. Pa periodo di 2028 te 2031, Aruba ta proyecta un surplus anual di por lo menos 1.5% di GDP.

Di e surplus di Afl. 203 miyon proyecta pa 2027, Afl. 87 miyon ta coresponde cu e surplus minimo di 1% di GDP exigi pa ley. E otro Afl. 116 miyon ta destina pa compensa parti di e deficit acumula den periodo 2015-2022.

Na nivel di pais solamente, gobierno ta calcula cu entrada total lo yega Afl. 2.005 miyon den 2027, compara cu Afl. 1.950 miyon pa 2026. Esaki ta un aumento di Afl. 55 miyon, of aproximadamente 3%. Ta proyecta un aumento di entrada di impuesto di Afl. 656 miyon pa Afl. 685 miyon, mientras impuesto indirecto ta subi di Afl. 903 miyon pa Afl. 930 miyon. Otro entrada ta keda practicamente mescos, na Afl. 391 miyon.

Di otro banda, gastonan total di e pais ta proyecta na Afl. 1.916 miyon, un aumento di Afl. 82 miyon of 4% compara cu 2026. Un parti importante di e aumento ta bin di gasto pa producto y servicio, cu ta subi cu Afl. 56 miyon, y di subsidio y pago destina pa metanan specifico, cu ta aumenta cu Afl. 22 miyon. Gasto di personal ta subi cu Afl. 16 miyon pa yega Afl. 532 miyon.

A pesar di e aumento den gasto di personal, CAft ta indica cu Aruba ta proyecta pa keda dentro di e norma legal. Cuminsando cu 2027, gasto di personal den sentido amplio mester keda bao di 10% di PIB. E calculacionnan inclui den e proyecto di presupuesto ta mustra cu te 2031 Aruba ta keda bao di e limite aki.

Un punto cu si ta sigui pone presion riba finanzas publico ta pago di interes. Pa 2027, Aruba ta proyecta Afl. 293 miyon na gasto di interes. CAft ta pone e cifra aki den perspectiva indicando cu aproximadamente 15 cent di cada florin cu gobierno ricibi lo bay pa pago di interes. E proyecto di presupuesto ta calcula refinanciamento riba un tasa di interes di 6%.

CAft ta señala cu e presupuesto ainda no ta tene cuenta cu posibilidadnan di refinanciamento y facilidad di prestamo cu por bira disponibel bao di Rijkswet Houdbare Overheidsfinanciën Aruba (HOFA). Segun e Colegio di supervision, uzo di e posibilidadnan aki por crea espacio adicional significativo den presupuesto.

Na mesun momento, Aruba ta proyecta cu su debe publico lo sigui baha den añanan binidero. Pa final di 2027, debe di sector colectivo ta calcula na Afl. 4.568 miyon, ekivalente na aproximadamente 53% di GDP. Si economia sigui crece y Aruba paga debe segun e plan, e porcentahe aki por baha te 39% na 2031. Cu e desaroyo aki, Aruba ta riba caminda pa cumpli cu e norma di LAft, cu ta exigi pa debe baha bao di 50% di GDP prome cu 2040.

Tin un diferencia chikito entre e porcentahe di debe cu Aruba mes ta reporta y esun calcula pa CAft. Gobierno ta yega na 54% pa 2027, mientras CAft ta calcula 53%. E diferencia ta resultado di un proyeccion diferente di e GDP cu cada instancia ta uza: Aruba ta basa su calculacion riba cifra di Directie Economische Zaken, Handel en Industrie, mientras CAft ta uza e proyeccion di Fondo Monetario Internacional di april 2026.

Un di e puntonan principal di preocupacion den e conseho ta inversion publico. Aruba tin intencion di pone mayoria di su inversionnan den e Algemeen Investerings- en Ontwikkelingsfonds (AIOF) nobo. Pa 2027, gobierno ta reserva Afl. 11 miyon pa e fondo. Den presupuesto 2026 ya tabatin Afl. 2.5 miyon reserva pa AIOF, y intencion ta pa sigui pone placa den e fondo den añanan binidero.

E problema, segun CAft, ta cu AIOF ainda no ta activo y su presupuesto ainda no a ser presenta na e Colegio. CAft tampoco a ricibi un agenda di inversion pa varios aña. Como resultado, ainda no ta suficientemente cla con y na unda e placa den e fondo lo ser gasta. Fuera di AIOF, Aruba ta presupuestando solamente Afl. 3.5 miyon na inversion pa 2027, un nivel cu CAft ta considera minimo compara cu e necesidadnan grandi di inversion cu e pais tin.

P’esey CAft ta pidi gobierno pa presenta e presupuesto di AIOF pa 2027 prome cu e proyecto di presupuesto nacional bay Parlamento. CAft tambe ta recomenda gobierno pa presenta un agenda di inversion pa varios aña, conecta cu prioridadnan di politica publico y cu capacidad real di gobierno pa ehecuta e proyectonan.

Segun CAft, un plan di inversion pa varios aña por yuda identifica necesidadnan den infrastructura y otro tereno cu por contribui na productividad y capacidad di Aruba pa genera entrada. Un plan asina tambe por yuda determina cua inversion tin mas beneficio pa comunidad. CAft ta considera cu ta importante pa mantencion forma parti di e planificacion, pa inversionnan haci awe por sigui genera beneficio riba termino largo.

Otro punto importante ta definicion di sector colectivo. Na juni 2026, sector colectivo di Aruba pa añanan 2023 y 2024 a ser amplia di seis pa 34 entidad. Sinembargo, e proyecto di presupuesto 2027 ainda ta basa su calculacionnan riba e composicion anterior. Esaki ta nifica cu algun entidad publico importante cu awor ta forma parti di sector colectivo ainda no ta inclui den calculacion di debe presenta den e presupuesto.

CAft ta indica cu, segun LAft, composicion di sector colectivo pa 2027 mester tabata determina no mas laat cu 1 di april 2026. E ampliacion pa 34 entidad ainda no ta procesa den proyecto di presupuesto, haciendo cu efecto completo riba presupuesto y cumplimento cu normanan financiero ainda no ta cla. CAft ta pidi gobierno pa determina sector colectivo pa periodo 2025-2028 mas pronto posibel y uza e definicion mas reciente pa calcula saldo financiero y debe.

Segun e composicion anterior di sector colectivo, e surplus di Afl. 203 miyon pa 2027 ta consisti di un resultado positivo di Afl. 84 miyon pa pais y Afl. 119 miyon di e otro entidadnan. AZV ta proyecta un surplus di Afl. 74 miyon, SVb Afl. 40 miyon y Aruba Tourism Authority Afl. 17 miyon. Despues di coreccionnan di Afl. 12 miyon, esaki ta resulta den e surplus colectivo di Afl. 203 miyon.

E surplusnan di AZV y SVb ta importante tambe pa reduccion di debe. Aruba ta inclui den su proyeccion cu surplus di pais y di e dos fondo social lo ser uza pa paga debe. Acuerdonan entre gobierno y e fondonan social ta ser prepara pa regla esaki. CAft ta considera e paso aki importante, tanto pa cumpli cu LAft como pa reduci gasto di interes.

Sinembargo, CAft ta señala cu embehecemento di poblacion lo pone presion creciente riba AZV y SVb. Aunke ambos fondo ta proyecta surplus den añanan binidero, nan resultado ta baha gradualmente. E surplus di AZV, por ehempel, ta proyecta pa baha di Afl. 74 miyon na 2027 pa Afl. 9 miyon na 2031. Pa SVb, e reduccion ta di Afl. 40 miyon pa Afl. 11 miyon den mesun periodo. CAft ta considera cu ta necesario pa Aruba tuma medida na tempo pa mantene gastonan di cuido y seguridad social sostenibel riba termino mediano.

Finalmente, CAft ta mira progreso den manera cu e presupuesto ta presenta informacion. E colegio ta positivo cu Aruba ta move den direccion di un presupuesto basa riba politica publico, unda ta establece un conexion mas cla entre placa gasta y e metanan cu gobierno kier logra. CAft ta recomenda pa sigui desaroya esaki, entre otro door di inclui indicadornan cu por ser midi y evaluacionnan pa determina si gasto publico di berdad ta logra e resultado desea.

E proyecto di presupuesto tambe ta inclui informacion financiero di 15 compania y entidad cu participacion di gobierno. CAft ta considera esaki un paso positivo, pero ta señala cu pa un gran parti di e entidadnan ainda no tin cuenta anual di 2024 disponibel. Segun e colegio, informacion actualisa ta necesario pa identifica y controla riesgonan financiero cu eventualmente por tin consecuencia pa presupuesto nacional.