(AFP) – China a pidi Merca diamars pa “stop di prepara pa guera” den espacio, despues cu US Space Force a confirma cu pa prome biaha e pais a pone arma den orbita.
Beijing y Washington ta rivalnan geopolitico importante y pa hopi tempo nan ta busca pa amplia nan interesnan y presencia strategico den espacio.
US Space Force a bisa dialuna cu e a coloca “arma di control espacial den orbita cu capacidad pa defende contra accion hostil di adversarionan”, sin duna detaye specifico tocante e armanan.
Ministerio di Asuntonan Exterior di China a expresa su oposicion contra e medida y a adverti contra “pone arma den espacio, converti espacio den un campo di bataya y crea un carera armamentista eynan.”
US Space Force a señala China specificamente como un menasa den su anuncio, indicando cu Beijing “ta desaroya y opera capacidadnan espacial y contraespacial como parti di un strategia di modernisacion militar.”
Tambe el a menciona Rusia, un otro rival geopolitico, cu segun Space Force “ta kere cu supremacia den espacio lo ta un factor decisivo den conflictonan futuro.”
Militarisacion di espacio ta casi mesun bieu cu e carera espacial mes. Desde cu Union Sovietico a lansa Sputnik, e prome satelite artificial di mundo, den orbita na 1957, Washington y Moscu a cuminsa explora maneranan tanto pa pone arma den espacio como pa destrui e tipo di aparato espacial.
Na e tempo ey, e preocupacion mas grandi tabata presencia di arma nuclear den espacio. Sinembargo, na 1967 e superpotencianan y otro paisnan a firma Tratado di Espacio Exterior, cu a prohibi arma di destruccion masivo den orbita.
Desde e tempo ey, Merca, China, Rusia y India a explora maneranan pa combate den espacio fuera di loke e tratado ta prohibi, incluyendo ataca satelitenan di rivalnan.
E satelitenan aki ta esencial pa comunicacion militar, vigilancia y nabegacion.
