Recientemente, Ministerio Publico (OM) y Cuerpo Policial di Aruba (KPA) a alerta comunidad tocante un estafa of “scam” cu tin andando, afectando comunidad na Aruba. Ayera, OM a indica cu e scam ainda ta andando, y a bolbe adverti comunidad pa sea alerta.
Segun OM, tin SMS (mensahe di texto), e-mail y hasta yamada cu ta parti di e estafa, cu ta pretende di ta bin for di OM. “Cualkier persona cu a ricibi e SMS fraudulento aki, Ministerio Publico ta conseha pa elimina esaki inmediatamente y raporta esaki como un ‘spam.’”
Tambe, Autoridadnan a urgi pueblo pa no click riba e link, no haci ningun pago, no yena ningun informacion personal of bancario, y no reacciona riba e SMS cu ‘si’ ni di ningun otro manera. Basicamente, mester ignora e mensahe, y report’e como ‘spam.’
“Ministerio Publico ta urgi pueblo pa keda alerta y comparti e advertencia aki cu famianan, amistadnan y coleganan pa yuda preveni cu otro persona por bira victima di e estafa aki,” a bisa den un comunicado.
Finalmente, a confirma cu KPA hunto cu Openbaar Ministerie Aruba ta na altura di e situacion aki cu ta andando, y ta urgi comunidad pa eherce cautela.
