(AFP)—Mas cu 40 pais a pidi gobierno Taliban diaranson pa kita inmediatamente tur restriccion riba derecho di muher y mucha muhe na Afganistan.
Luna pasa a marca cinco aña desde cu Taliban a bolbe na poder y a impone loke Nacionnan Uni a yama “restriccionnan sofocante” riba hendenan di Afganistan, specialmente muhernan.
Actualmente rond di 2.4 miyon mucha muhe y hoben muher Afgano ta keda priva di educacion secundario, segun UNESCO.
“Desde augustus 2021, Taliban a implementa un politica di segregacion basa riba genero, practicamente kitando muhernan y mucha muhe for di bida publico y limitando severamente nan acceso na educacion, cuido di salud y trabou,” representante di Francia na Nacionnan Uni, Jerome Bonnafont, a bisa na nomber di e 43 pais cu a firma e declaracion.
Nan ta inclui varios pais Europeo, como tambe Liberia, Emiratonan Arabe Uni, Mexico y Hapon.
“Muhernan cu ta nenga of cu ta keda considera di ta nengando di cumpli cu e restriccionnan aki ta enfrenta aresto y detencion arbitrario,” Bonnafont a sigui bisa, prome cu un reunion di Conseho di Seguridad tocante e situacion. “Hendenan cu ta sostene nan y esnan cu Taliban ta considera critico di su gobierno tambe ta enfrenta detencion y represalia.”
E paisnan cu a firma a pidi autoridadnan Taliban “pa kita inmediatamente tur restriccion riba derecho di muher y mucha muhe, den tur nan diversidad, y pone fin na tur violacion di derecho humano.”
A pesar di e situacion humanitario grave di e pais, cu gran parti di poblacion ta biba den pobresa, migrantenan debolbi obligatoriamente pa Afganistan ta sigui.
Mas cu 400,000 Afgano a ser manda back e aña aki, segun Nacionnan Uni, principalmente for di Iran y Pakistan.
