Corte Comun di Husticia (Hof) a condena ex-minister Otmar Oduber na dos aña di prison incondicional den caso Flamingo. Ademas, durante cinco aña Oduber no por postula pa un cargo politico ni ocupa un puesto como funcionario publico. E decision di Hof, dicta ayera 17 di september 2026, ta considerablemente mas severo cu e castigo cu el a haya na Prome Instancia.

E sentencia ta significantemente diferente compara cu e sentencia di Corte den Prome Instancia. Na januari 2025, Oduber a keda condena na 365 dia di prison, di cual 319 dia tabata condicional, kitando e dianan cu el a pasa den detencion preventivo. El a haya ademas 240 ora di trabao comunitario. Awor, den apelacion, Hof a impone un castigo di dos aña di prison completamente incondicional y a determina cu durante cinco aña Oduber no por postula pa un cargo politico ni ocupa un puesto como funcionario publico.

Hof a dicta sentencia contra tres acusado den investigacion Flamingo: Oduber, Esser y Wever. Esencialmente, e investigacion ta trata iregularidadnan den reparticion di terenonan di gobierno, nombramento di asina yama funcionarionan fantasma (spookambtenaren) y trato preferencial na personanan cu tabata bon cu Oduber, tempo cu e tabata minister.

E hechonan ta relaciona cu e periodo 2017 te cu 2019. Segun Hof, durante e periodo aki Oduber, den su funcion di minister, a percura pa personanan di su confiansa haya posicionnan strategico den servicionan publico. Pa medio di esaki, segun Hof, el a influencia entre otro reparticion di tereno na dos persona den su circulo directo.

Un di e otro acusadonan, Wever, cu segun Hof a haya trabao na DIP cu ayudo di Oduber, a haya instruccion pa duna prioridad na e dos conocirnan durante proceso di reparticion di tereno. Den e contexto aki, Hof a considera proba cu Wever a falsifica documento.

Ministerio Publico a acusa Oduber di a gaña Pais Aruba den e proceso relaciona cu reparticion di e terenonan, specificamente tereno na Malmok. Sinembargo, Hof no a considera e acusacion aki proba y a absolve Oduber riba e punto ey. No obstante, Hof si a considera proba cu Oduber a haci mal uso di su funcion mediante su influencia den reparticion di e terenonan.

Wever tambe a ser absolvi di parti di e acusacionnan relaciona cu tereno na Malmok. Hof, sinembargo, a considera proba cu el a falsifica documento y a haci mal uso di su funcion.

Otro aspecto importante di caso Flamingo ta e nombramento di e asina yama funcionarionan fantasma (spookambtenaren). E parti aki ta trata di dos persona cu a ser nombra como coordinador, pero cu, segun Hof, nunca a ehecuta trabao pa Pais Aruba. Gobierno, no obstante, tabata paga nan. Un di e dos personanan tabata traha pa compania di un yiu di Oduber, mientras cu su salario tabata sali for di fondo publico.

Pa loke ta e acusacion aki, Hof a haya Oduber culpabel di engaño y mal uso di su funcion.

E di tres parti di caso ta relaciona cu personanan leal na partido POR cu a haya trabao, mientras cu procesonan regular destina pa nombramento di personal no a ser sigui manera mester ta.

Riba e punto aki, Hof a condena tanto Oduber como Esser pa soborno di funcionario y mal uso di funcion. Segun Hof, personanan cu tabata leal na POR a ser yuda pa haya trabao mediante un proceso cu no a sigui e procedementonan regular.

Riba varios punto, pues, Hof a yega na otro conclusion cu Corte den Prome Instancia. Esaki a resulta tambe den otro castigonan, particularmente pa Oduber.

Durante tratamento di apelacion, Procurador General a solicita castigonan mas severo contra e tres acusadonan.

Contra Wever, PG a exigi 240 ora di trabao comunitario, of alternativamente 120 dia di prison, ademas di seis luna di prison condicional cu un periodo di prueba di tres aña. Pa Esser, el a exigi 18 luna di prison.

Contra Oduber, PG a exigi tres aña di prison incondicional. Ademas, Ministerio Publico a pidi pa durante seis aña e no por postula pa un cargo politico. Hof no a sigui e exigencianan completamente.

Pa Oduber, e resultado ta dos aña di prison incondicional y cinco aña durante cual e no por postula pa un cargo politico ni ocupa un puesto como funcionario publico.

Esser a ser condena na 240 ora di trabao comunitario, considerablemente menos cu e 18 luna di prison cu Ministerio Publico a solicita.

Den e caso di Wever, Hof a declara e hechonan menciona proba, pero no a impone ningun castigo of medida. Segun Hof, e hecho pa cual Wever a ser condena ta considerablemente menos serio cu e otro condenanan. Ademas, Hof a tene cuenta cu Wever a actua bao instruccion y cu el a expresa obhecion contra actuacion di e minister.

Den determina e castigonan, Hof a pone enfasis riba responsabilidad cu ta bin cu un cargo publico.

Segun Hof, Oduber tabatin como minister un funcion di ehempel den sociedad y, pa e motibo ey, por exigi e nivel mas halto di integridad di su actuacion. E otro dos acusadonan tabata funcionario publico y tabata na altura di actuacion di e minister.

Hof a califica e hechonan proba como delito serio. Segun e instancia hudicial, e acusadonan a mustra un falta grave di sentido moral tocante confiansa y responsabilidad cu Pais Aruba a pone den nan.

Hof ta considera cu nan manera di actua a haci daño serio na confiansa cu ciudadano mester por tin den administracion publico. Ademas, segun Hof, e tipo di actuacion aki tin un influencia cu ta mina sociedad den su totalidad.

E hecho cu e sucesonan a tuma luga varios aña pasa no ta kita gravedad di e delitonan, segun Hof. No obstante, den determina e castigonan, Hof si a tene cuenta cu e proceso a dura mas largo cu e termino considera rasonabel segun hurisprudencia.

E caso penal tambe tabatin un impacto grandi riba bida di e tres acusadonan. Den caso di Oduber specificamente, Hof a tene cuenta cu e cantidad grandi di publicidad cu caso Flamingo a genera alrededor di su persona como figura publico den un comunidad chikito.

Sinembargo, Hof a determina cu e circunstancia aki no ta suficiente pa conclui cu un castigo di prison incondicional ya no ta apropia.

Hof a pone enfasis tambe riba prevencion general. Segun Hof, sociedad mester tin claridad cu un manera di actua asina no ta permiti. Esaki ta ser considera importante pa proteha integridad di administracion publico y di funcionarionan di Pais Aruba.

E decision tocante derecho di Oduber pa postula politicamente tambe ta diferente di loke Corte den Prome Instancia a dicta.

Na januari 2025, Corte inicialmente a determina cu durante tres aña Oduber no por ser eligi pa un cargo politico. Algun dia despues, Corte a coregi e parti ey di su propio sentencia, pasobra no tabatin base legal pa impone e sancion pa e delitonan pa cual Oduber a ser condena na e momento ey. Como consecuencia, el a conserva su derecho pa postula como politico.

Den apelacion, e situacion tabatin un resultado diferente. Hof a considera cu soborno di funcionario tambe a keda proba y a determina cu durante cinco aña Oduber no por postula pa un cargo politico.

Caso Flamingo ta andando desde 2019. Durante e proceso, defensa di Oduber a cuestiona e manera cu e investigacion a ser conduci y a argumenta cu tabatin problema den e dossier. Oduber mes a mantene su inocencia durante e proceso.

Ministerio Publico, di su parti, a sostene cu tabatin suficiente prueba pa e diferente acusacion. Tanto Ministerio Publico como defensa a apela parti di sentencia di Prome Instancia, loke a resulta den apelacion.

Durante fase di apelacion, testigonan adicional a ser permiti y e diferente partinan di e dossier a ser trata di nobo.

Cu sentencia di 17 di september, Hof a absolve e acusadonan riba algun punto, pero a considera otro hechonan proba cu Corte den Prome Instancia no a trata di mesun manera. E diferencia mas grandi den consecuencia ta pa Oduber, cu awor ta enfrenta un castigo di prison di dos aña.

Na salida di Corte abogado di Oduber, mr. Vito Carlo, a expresa cu e sentencia tabata algo completamente inespera. Contestando e pregunta si nan lo apela e sentencia di Hof den Cassatie, abogado Carlo a indica cu primeramente nan mester pasa door di e sentencia detayadamente, despues lo discuti esaki cu su cliente y asina lo tuma un decision si ta apela e sentencia den Cassatie of no.

Manera ta conoci den Cassatie no ta bolbe evalua henter e caso. Corte Supremo ta examina entre otro si derecho a ser aplica corectamente y si sentencia di Hof ta suficientemente motiva.