Centro di Bario Noord ta haciendo un yamada na residentenan y miembro di nos comunidad cu tin interes pa contribui activamente na e bienestar y desaroyo di nos bario. Centro ta buscando boluntario entusiasta, compromete y cu iniciativa, cu ta dispuesto pa comparti nan talento, energia, ideanan y tempo pa yuda organisa y realisa diferente actividadnan pa nos comunidad.

Boluntario ta hunga un papel importante den e funcionamiento di un centro di bario. E participacion di personanan cu ta dispuesto pa yuda no solamente ta haci e organisacion di actividadnan mas facil, sino tambe ta crea oportunidad pa mas hende bira activamente envolvi den e bida social di nos comunidad.

Pa motiva mas participacion, Centro di Bario Noord ta buscando boluntario pa principalmente dos areanan: Social / Evento y Cushina.

Social / Evento

Den e area di Social / Evento, boluntario lo por contribui cu e preparacion y organisacion di actividadnan y eventonan. Esaki ta inclui yuda cu diferente tarea prome, durante y despues di un actividad, pa asina garantisa cu tur cos ta cana bon.

Centro di Bario Noord ta tambe buscando personanan cu tin propio ideanan y iniciativa. Hende cu tin un bon idea pa un actividad nobo, un encuentro social, un proyecto pa e comunidad of un manera diferente pa reuni residentenan, ta wordo cordialmente invita pa comparti nan sugerencianan.

Un otro aspecto importante ta yuda crea un ambiente agradable y positivo pa tur miembro di nos comunidad. E participacion di boluntario por contribui na un ambiente unda hende por sinti nan mes bon bini, participa y disfruta di e diferente actividadnan.

Cushina

Pa e area di Cushina, Centro di Bario Noord ta buscando boluntario cu ta gusta yuda cu e preparacionnan culinario durante actividadnan y eventonan.

E tarea por inclui yuda cu preparacion y organisacion di cuminda, y tambe traha hunto cu e otro miembronan di e team pa prepara tur cos pa e actividad. Bon cooperacion, trabou di team y un actitud positivo ta elementos importante pa haci e actividadnan un exito.

Pa Centro di Bario Noord, e yamada aki no ta solamente un buskeda pa personanan cu tin experiencia. Tambe ta trata di participacion, iniciativa y e deseo pa yuda. Cada persona tin algo diferente pa ofrece, sea su experiencia, creatividad, habilidad, energia of simplemente su disposicion pa yuda.

“Bo iniciativa, talento y participacion por haci un diferencia.” Cu e mensahe aki, Centro di Bario Noord ta invitando mas residentenan pa bira parti di e team di boluntario y hunto contribui na un comunidad mas activo y uni.

Personanan cu ta interesa pa forma parti di e ekipo di boluntario por tuma contacto via WhatsApp na 568-2935 pa mas informacion. Centro di Bario Noord ta spera di por yama “Bon Bini” na tur esnan cu ta dispuesto pa comparti nan tempo y talento.

Hunto nos por haci mas pa nos comunidad!