(AFP) – Shakira y su ex-pareha, futbolista retira Gerard Pique, a presenta na corte di Barcelona diamars pa revisa acuerdonan di bishita pa nan 2 yiu homber, cu e cantante buscando cambionan cu ta limita nan biahe entre Merca y Spaña.
E cantante Colombiano a pidi menos biahe transatlantico pa nan yiu entre Miami, unda nan ta biba cu ne, y Barcelona, unda Pique ta biba, segun un declaracion di su ekipo legal.
E ta argumenta cu biahe frecuente por afecta nan bienestar emocional, fisico y academico, su representantenan a bisa.
Bao su proposicion, Pique lo bay Miami durante vakantienan mas cortico, permitiendo e muchanan pasa mas tempo den nan ambiente cercano y mantene nan rutina.
E peticion no tin intencion di reduci e cantidad di tempo cu e muchanan ta pasa cu nan tata, nan a agrega.
Shakira, di 49 aña, y Pique di 39, a cuminsa nan relacion na 2011 y tin dos yiu homber, Milan naci na 2013, y Sasha naci na 2015.
E pareha, ken a biba principalmente na Barcelona durante nan relacion a anuncia nan separacion na juni di 2022 despues di mas cu un decada hunto.
Nan a yega un acuerdo pa custodia y acuerdo di bishita varios luna despues, despues di cual e cantante di “Hips Don’t Lie” a muda pa Miami cu e muchanan.
Pique, ken a hunga pa Barcelona y Spaña prome cu el a retira for di futbol profesional na 2022, tin periodonan regular cu su yiunan cada luna ademas di durante vakantie di scol.
Shakira actualmente ta na Madrid pa e ultimo parti di su tour global, cu 13 concierto den schedule entre 18 di september pa 12 di october. El a agrega un fecha extra dialuna.
El a cuminsa su tour mundial “Las Mujeres Ya No Lloran” na februari di 2025, tumando e nomber for di su album di e mesun titulo.
E album ta inclui “Bzrp Music Sessions, Vol. 53,” su hit global cu ta un colaboracion cu productor Argentino Bizarrap, cual a referencia su separacion for di Pique.
