(AFP) – Organisacion Mundial di Salud (WHO) a bisa diaranson cu no por produci un evaluacion di riesgo completo pasobra no tin tur informacion for di Rusia tocante e sospecho di morto pa plaga di un tecnico di laboratorio.
WHO, Merca y Union Europeo tur a urgi Moscu pa comparti mas informacion despues di morto di un muhe di 28 aña di edad, kende tabata traha na Instituto di Investigacion Anti-Plaga Irkutsk na Siberia.
“E trahador di laboratorio a muri despues di keda hospitalisa cu pneumonia severo. Reportahenan inicial a sugeri plaga pneumonico despues di un exposicion accidental den laboratorio,” hefe di WHO, Tedros Adhanom Ghebreyesus. “WHO ta na haltura cu gobierno Ruso a tene un reunion dia 2 di october pasobra nan tabata sospecha cu un residente den region Irkutsk a contrae e infeccion peligroso,” el a bisa un conferencia di prensa.
Tedros a bisa cu WHO a pidi Moscu pa mas informacion diasabra, di acuerdo cu Regulacion Internacional di Salud (IHR). IHR ta duna un marco legalmente obligatorio definiendo derecho y obligacion di un pais atendiendo evento y emergencianan di salud cu por crusa frontera – y ta pidi paisnan pa responde dentro di 24 ora.
Rusia a responde – riba diamars – bisando cu no a reporta ningun caso di plaga den region Irkutsk y cu alrededor di 200 contacto a keda den cuarentena.
WHO a pidi mas informacion tocante e test di laboratorio ehecuta tocante e fatalidad, riba e contactonan, y detaye di nan estado di salud, Tedros a bisa.
“Nos no tin tur informacion di e evento ainda y nos no por a haci un evaluacion di riesgo completo,” el a insisti. “Comparti informacion completo y transparente na tempo bao di e regulacionnan internacional ta esencial pa clarifica rapportnan den conflicto y permiti un evaluacion corecto di potencial publico y riesgo.”
‘Di kico el a muri?’
Maria Van Kerkhove, director di WHO di maneho di epidemia y pandemia, a agrega: “Nos no ta compronde con el a keda infecta.” Si “descarta” plaga pneumonico, “di kico el a muri realmente?”, el a bisa.
Van Kerkhove a bisa cu e agencia di salud di UN tabata kier sa ki test a haci, e resultado specifico, y ki analisis adicional tabata haciendo si e causa di morto ainda no tabata conoci.
Ademas, “ki contacto a pone bao cuarentena of bao follow-up; kico esey ta involucra; y si e periodo di cuarentena a caba?” el a bisa.
Tocante si Moscu lo mester a duna mas informacion, el a bisa: “E contesta simpel ta semper: si.”
Infeccion ‘adkiri pa comunidad’
Silviu Ciobanu di unidad di operacion di respuesta y alerta di inteligencia di oficina di salud publico di Europa di WHO, a bisa cu “mirando e cronograma duna den IHR ta 24 ora, obviamente no ta OK.
“Mas prome nos haya informacion, miho e resultado.”
Moscu a bisa cu e persona a muri di un pneumonia severo adkiri pa comunidad di origen desconoci, el a agrega.
Van Kerkhove a bisa cu tin hende kende su morto ta atribui na causa desconoci di penumonia, pero awo tin metodo di laboratorio cu por determina e agente causativo, manera test PCR y secuencia genetico.
Infeccion adkiri pa comunidad “lo nifica pafo di e laboratorio,” el a agrega.
Rusia ta adverti contra informacion ‘falso’
Ayera, Rusia a adverti contra informacion ‘falso’ mientras reportahenan a aparece di sospecho di un di dos caso di plaga na Siberia, cu Washington y Bruselas exigiendo mas transparencia, y bisiña Mongolia reforsando vigilancia di salud.
Noticiero Ruso, Pueblo di Baikal, a reporta diabierna ultimo fayecimento di e trahador di laboratorio di 28 aña di edad. Mientras tanto, preocupacion a crece tocante sospecho cu un di dos empleado na e instituto a bira malo.
Gobierno di Mongolia a bisa diaranson cu “ta implementando medida di supervision y monitoreo di salud na e frontera” cu Rusia.
Autoridadnan Ruso a minimisa e reportahenan, determinando cu e persona a muri di pneumonia y insistiendo cu no tin riesgo di un brote.
Contestando tocante reportahenan di un di dos caso, vocero di Kremlin, Dmitry Peskov a bisa reporteronan cu “e gran mayoria di loke medionan ta reportando tocante e situacion ta informacion falso.”
Hende mester depende solamente riba declaracionnan oficial for di vigilante di salud Ruso, Rospotrebnadzor, el a insisti.
Presidente Mericano, Donald Trump, contestando si tabatin un arma biologico involucra, a bisa reporteronan den Oficina Oval: “Nos no ta kere. Nos ta bay haya sa suficiente pronto, pero nos no ta kere.”
“Si bo scucha nan, e ta bao control. Pero bo sa, hende a yega di bisa esey antes tocante otro cosnan,” el a agrega.
‘No tin riesgo di epidemia’
E agencia di salud Ruso a bisa anteriormente diaranson cu a determina cu “no tin riesgo di epidemia pa e poblacion.”
A bisa cu investigacion extenso no a descubri “ningun emergencia” y cu e laboratorio a cumpli cu “control adecuado ora di traha cu microorganismo patogenico.”
“Mas di 90 porciento di contacto a completa observacion medico,” a agrega.
“No a detecta ningun desorden di salud asocia cu patologia infeccioso,” a bisa, agregando cu “e resultado di casi 5 mil test di laboratorio no a revela ningun microorganismo patogenico peligroso.”
E agencia tambe a bisa cu e pashent cu a fayece tabata “vacuna y tabatin inmunidad pa infeccionnan peligroso cu cual e tabata traha.”
‘Falso’
Plaga ta un malesa baceteriano cu por sucede di diferente manera, incluyendo plaga pneumonico, e tipo mas contagioso, cu por plama mediante ‘droplet’ respiratorio.
Plaga bubonico ta transmiti pa purga.
Plaga pneumonico por ta fatal si no haya tratamento trempan, segun WHO.
Gobernador regional di Irkutsk, Igor Kobzev a bisa dialuna cu un inspeccion di Rospotrebnadzor a haya cu e persona a muri di “pneumonia di aetiologia indeterminado.”
“Ningun microorganismo vincula na trabao profesional di e muhe hoben a ser haya den su muestranan biologico,” el a bisa, agregando cu ningun otro trahador na e instituto a busca atencion medico desde su morto.
Na e pueblo di Shelekhov, unda a reporta cu el a fayece, residentenan a papia di aumento di precaucion pa salud na vigor.
‘Riesgo abao’
Merca a haci un solicitud formal presionando Rusia pa mas informacion, un fuente cercano na e asunto a bisa diamars, mientras presidente Trump a bisa cu e tabatin “un yamada programa” cu su contraparti Ruso, Vladimir Putin y lo papia cune pronto.
Contestando tocante esaki, Peskov a insisti diaranson cu e no tabatin informacion tocante un solicitud formal di Merca pa clarificacion, ni tocante un yamada programa entre e dos lider.
Vocero di Comision Europeo, Eva Hrncirova, mientras tanto, ayera a haci un yamado pa Rusia “comparti reportahenan transparente y na tempo” tocante e caso reporta di plaga.
Determinando cu no tin riesgo di epidemia, Rospotrebnadzor a bisa cu a implementa un set di “medida anti-epidemia” como precaucion y den linea cu legislacion sanitario.
Tambe a insisti cu a comparti informacion cu WHO di acuerdo cu regulacion internacional di salud.
WHO a bisa diamars cu su evaluacion inicial di riesgo, basa riba e informacion disponible, tabata entre modera te abao pa region Irkutsk, abao pa Rusia en su totalidad, y hopi abao pa Europa.
