(AFP) – SpaceX di Elon Musk ta busca pa recauda USD 40 biyon via prestamonan bancario y debe pa amplia su compranan di chip di AI di Nvidia, segun un rapport di Financial Times cu ta cita fuentenan cerca di e negociacionnan.
E financiamento enorme aki ta bin apenas cuatro luna despues cu SpaceX a recauda USD 86 biyon den e IPO mas grandi di mundo, y ta subraya demanda enorme entre companianan tecnologico pa chipnan cu nan tin mester pa desaroya nan ambicionnan den AI.
Ningun di e dos companianan kier a comenta riba e rapport publica diaranson anochi, cu a bisa cu SpaceX ta busca USD 30 biyon via emision di debe nobo y USD 10 biyon via prestamonan bancario.
E rapport a bin despues di un serie di compranan fuerte di accionnan di Nvidia, cu a manda balor di mercado di e compania rumbo pa un nivel nunca mira prome di casi USD 6 triyon.
“Esakinan ta cantidadnan extraordinario, y toch semper ta parce cu tin otro ronda di financiamento ta bin,” analista senior di Swissquote, Ipek Ozkardeskaya, a bisa tocante e rapport di SpaceX diadiahuebs.
“Simplemente no tin fin na e apetit.”
Analistanan di Lombard Odier a señala cu e cantidad grandi di prestamo cu companianan di AI ta tuma “ta cuminsa competi directamente cu emision di debe soberano pa e mesun fondo di capital di inversionista.”
Esaki a contribui na aumento di rendimento riba debe gubernamental den paisnan rond mundo, loke ta subi costo di prestamo tanto pa paisnan como pa companianan.
