(AFP)—Rusia a declara dialuna cu el a bende paisnan Europeo mas di 320 biyon dollar den hidrocarbononan desde 2022, a pesar di e sancionnan imponi contra e pais pa motibo di e guera na Ucrania.
“Pa e periodo desde 2022 te dia di awe, e cifra aki ta yega na 320.7 biyon dollar. Esaki ta e balor di suministro di recursonan energetico na paisnan di Union Europeo,” vice-prome minister Ruso encarga cu energia, Alexander Novak, a declara riba television.
El a bisa cu den e prome nuebe lunanan di 2026 so, paisnan Europeo a cumpra 21.3 biyon dollar na hidrocarbononan Ruso. “Den otro palabra, a pesar di e restriccionnan relaciona cu sancionnan, nos ta sigui suministra recursonan energetico den cierto areanan pa cual a concede excepcionnan,” el a agrega.
Novak a declara cu exportacion di petroleo Ruso por yega back na su nivel di prome cu guera pa fin di aña. Union Europeo a adopta varios sancion contra Rusia desde comienso di guera na Ucrania na 2022. Sinembargo, hopi pais, incluyendo Francia, ta sigui cumpra hidrocarbononan for di Moscu, specialmente gas natural likido (LNG).
Varios pais cu no tin salida directo na lama, incluyendo Slovakia y Hungria, tambe ta beneficia di excepcionnan cu ta permiti nan cumpra petroleo Ruso transporta via tuberia.
E cifra total aki no ta inclui produccion Ruso cu ta yega Europa indirectamente despues di ser procesa den otro paisnan, manera India of Turkia. Mescos cu China, e paisnan aki a aumenta drasticamente nan compra di petroleo crudo Ruso desde 2022.
Paisnan Europeo a critica un acuerdo anuncia diabierna cu ta permiti Merca importa diesel Ruso, y dialuna presidente Mericano Donald Trump a responde na e criticanan. “Union Europeo a paga Rusia 250 biyon dollar pa energia, y e prensa di noticia falso no kier ni acerca e storia ey. Mi a haci e escogencia corecto pa pueblo Mericano—SEMPER, MERCA PROME!”, el a publica riba Truth Social.
Diadomingo, Secretario di Tesoro Mericano Scott Bessent a critica loke el a yama e “hipocresia” di e Europeonan, pasobra nan “ta sigui financia Vladimir Putin” mientras nan ta critica e acuerdo di Merca pa cumpra diesel Ruso.
