Gobierno di Aruba mester examina con hopi placa ta gana di impuesto y companianan estatal prome cu exigi pa negoshi haci mas pa baha costo di bida. Esaki tabata e mensahe central di Frans Ponson, presidente di Comerciante Uni Aruba (CUA) durante un conferencia di prensa ayera mainta.

Ponson a critica loke e ta considera un relacion desigual entre gobierno y sector comercial.

Mientras frecuentemente ta culpa negoshi pa prijs halto y ta presiona nan pa limita nan margen di ganashi, el a argumenta cu gobierno ta sigui colecta entrada substancia di producto y servicio esencial.

Su critica ta yega memey di discusion tocante bestaansminimum di Aruba, e entrada minimo rekeri pa cubri costo di bida basico, y posible medida pa mehora poder di compa.

Segun Ponson, no por separa e discusionnan aki for di prijs di coriente, awa, gasolin y internet – necesidadnan den tur hogar.

El a enfatisa cu gobierno ta eherce influencia considerable riba e sectornan aki mediante compania estatal y impuesto. A diferencia di negoshi ordinario, el a argumenta, e companianan aki no tin competencia.

Gasolin

Pa ilustra su argumento, Posnon a presenta documento y calculacion tocante prijs di gasolin.
El a splica cu pompstation ta cumpra gasolin pa aproximadamente Afl. 2,50 pa liter y ta permiti pa bend’e na Afl. 2,91 pa liter bao e prijs regula estableci pa Departamento di Asunto Economico.

Segun Ponson, e structura di prijs ta inclui accijns y dos ronda di BBO.

El a bisa cu loke gobierno ta cobra ta yega aproximadamente 71 cen pa liter, mientras e diferente componente di impuesto y ganashi relaciona cu e proveedor estatal di combustible, FMSA, ta contribui substancialmente na e prijs final cu consumidor ta paga.

Basa riba su calculacion, Ponson a bisa cu aproximadamente 40,3 porciento di e prijs retail di gasolin por keda atribui na entrada y impuesto relaciona cu gobierno, incluyendo un margen calcula pa e proveedor estatal, FMSA.

En comparacion, el a bisa, pompstation ta permiti un margen ekivalente na aproximadamente 7,3 porciento di e prijs retail.

Ponson a enfatisa cu pompstation mester usa e margen aki pa cubri nan gasto operacional, incluyendo huur, mantencion, limpiesa, y otro costo asocia cu opera un negoshi. El a argumenta cu esaki ta crea un situacion inhusto, den cual negoshi priva ta enfrenta competencia y gasto operacional mientras gobierno ta colecta entrada mediante impuesto y un proveedor estatal.

E porcentahenan presenta durante e conferencia di prensa tabata calcula pa Ponson basa riba documentonan oficial di Departamento di Impuesto.

Su argumento mas amplio tabata cu gobierno no por exigi rasonablemente pa negoshi baha nan ganashi sin examina su propio porcion di e prijs cu consumidornan ta paga.

Prijs mas halto, entrada mas halto

Ponson tambe a cuestiona e efecto di impuesto basa riba porcentahe riba entrada di gobierno ora prijs di consumidor ta subi.
El a splica cu ora e balor di un producto riba cual ta paga impuesto ta subi, e cantidad di impuesto colecta tambe ta aumenta.

“Ora un prijs subi na Aruba, ken ta esun cu ta gana mas placa? Gobierno,” Ponson a bisa.

El a ilustra su argumento comparando prijs di Afl. 2 y Afl. 3 pa liter di gasolin, bisando cu e cantidad colecta mediante e dos stap di BBO lo aumenta mientras e prijs ta aumenta.

Ponson tambe a referi na e posibilidad cu prijs di gasolin lo aumenta otro siman na Afl. 3,15 pa liter, maske a presenta esaki como un expectativa en bes di un ahuste oficial confirma.

El a cuestiona e enfasis di gobierno riba surplus financiero mientras hogarnan ta sigui cu dificultad pa paga pa producto y servicio esencial. Den su opinion, discusionnan tocante poder di compra mester inclui e structura di entrada di gobierno, particularmente impuesto y accijns aplica riba producto cu realisticamente, hende no por evita di cumpra.

E tambe a argumenta cu gobierno mester examina e dividend cu ta ricibi di companianan estatal ora di evalua si tin espacio pa baha e peso financiero riba consumidornan.

Gobierno mester duna ehempel

Ponson tabata particularmente critico di propuestanan cu ta rekeri negoshi priva pa absorbe costo adicional pa protege consumidornan. El a referi na esfuersonan pa regula prijs di Canasta Basico di producto esencial, cuestionando pakico no ta duna atencion similar na prijs cobra pa companianan estatal.

Segun Ponson, frecuentemente ta bisa negoshi cu nan margen di ganashi mester keda limita pasobra pueblo mester producto pagable. Sinembargo, el a argumenta cu e mesun principio di prijs mester aplica pa servicionan controla pa gobierno. El a acusa gobierno di purba di ta generoso riba custia di negoshi priva en bes di usa su propio recursonan pa duna alivio.

Su mensahe tabata cu gobierno mester examina prome unda e por baha su propio impuesto, tarifa y accijns prome cu impone responsabilidad adicional riba sector comercial.

Ponson tambe a adverti contra introduccion di medida amplio sin haci estudio serio prome tocante nan consecuencia economico. El a menciona specificamente discusion tocante bestaansminimum y aumento den salario minimo.

Mientras el a reconoce e importancia di yuda hende cu no por paga pa nan necesidadnan basico, el a cuestiona si medida cu ta afecta tur negoshi y trahador ta necesariamente e solucion mas eficiente.

Subsidio di coriente y Airbnb

Otro punto importante tabata trata prijs di coriente y e manera cu ta distribui subsidio.

Ponson a argumenta cu usuarionan di coriente comercial efectivamente ta yuda subsidia prijs mas abao pa consumidornan residencial. El a argumenta cu e areglo aki ta crea un peso adicional pa negoshi, cu ya ta enfrenta prijs operacional mas halto.

El a cuestiona si ta rasonable pa usuarionan comercial yuda financia subsidio di coriente cu tambe ta beneficia propiedadnan usa pa short-term vacation rental (STVR).

Ponson a referi specificamente na propiedadnan Airbnb, incluyendo esnan opera pa hende pafo di Aruba, y a expresa preocupacion tocante actividadnan di huur cu no ta cumpli cu paga impuesto. El a reconoce cu no tur operador di STVR ta cay den e categoria aki. Asina mes, el a argumenta cu un subsidio residencial general por beneficia doñonan di propiedad operando negoshi comercial di acomodacion, en bes di solamente hogarnan cu genuinamente mester di asistencia.

“Bo ta kere ta husto cu nos mester subsidia coriente pa un Airbnb?” el a puntra.

Pa Ponson, esaki ta ilustra e problema mas amplio cu subsidio distribui sin distingui suficientemente entre beneficiario.

El a sugeri cu hogarnan enfrentando dificultad financiero genuino por ricibi asistencia mas directo, potencialmente incluyendo reduccion substancial den nan recibo di coriente. Esaki, el a argumenta, lo ta mas efectivo cu mantene subsidio amplio cu tambe ta hende y negoshi capaz di paga e prijs completo.

Yamado pa estudio y cooperacion

Enfatisando e importancia di planificacion economico responsable, Ponson a argumenta cu gobierno mester haci estudio pa calcula ken mester di asistencia, cua subsidio ta hustifica, y con e medidanan proponi ta bay afecta prijs.

“Si mi tende cosnan cu kier wordo haci, mi tin miedo di loke ta bay pasa,” el a bisa

Ponson a adverti cu medidanan cu intencion pa yuda consumidor por tin e efecto opuesto si nan aumenta costo operacional pa negoshi y resulta den prijs mas halto.

El a enfatisa ripitidamente cu su critica no ta contra yuda hende cu tin dificultad financiero. Su preocupacion ta con ta organisa asistencia, y ken ta paga pa esaki na final.

Contestando un pregunta tocante con ta usa entrada di gobierno, incluyendo preocupacion tocante caminda, scol, y capacidad di polis, Ponson a insisti cu esakinan ta preguntanan cu comunidad mester haci na gobierno, particularmente ora oficialnan ta punta riba surplus financiero mientras ta sigui colecta entrada.

El a haci un yamado pa mas transparencia tocante entrada di gobierno, e costo real di subsidio y estudionan economico serio prome cu implementa medida adicional.

Su mensahe central ta cu no por trata reduccion di costo di bida solamente como un responsabilidad di sector comercial. Pa Ponson, un maneho husto ta rekeri pa gobierno examina su propio impuesto y companianan estatal, determina unda por baha gasto, y sigura cu asistencia yega esnan cu tin mas necesidad.