Dos homber a resulta herida den un tiramento na San Nicolas e siman aki, agregando na varios incidente relaciona cu arma di candela investiga pa polis na Aruba e aña aki. A pesar cu estadistica oficial ta mustra cu tabatin considerablemente menos tiramento na 2025, e cantidad di caso registra di posesion di arma di candela ilegal a aumenta, generando preocupacion tocante e presencia continuo di arma ilegal na nos isla.
Segun Cuerpo Policial di Aruba (KPA), e tiramento a tuma lugar pa aproximadamente 1:30 di mainta riba Caya St. Maarten, cerca di cancha di basketball na San Nicolas.
Inicialmente, polis a ricibi informacion cu posiblemente un persona a ricibi tiro. A despacha un patruya na e sitio, pero ora e agentenan a yega, no tabatin niun persona. Sinembargo, oficialnan a descubri sanger y huls, indicando cu un tiramento a tuma lugar.
Tiki despues, polis a ricibi informacion cu un persona a yega IMSAN cu herida di bala.
Ora otro patruya a yega, polis a descubri dos victima, ambos homber, di 18 y 27 aña di edad.
Ambos a keda transporta cu hospital bao guia di polis, unda nan a ricibi tratamento medico inmediato. Segun KPA, ambos por a bay cas un tiki despues.
Durante investigacion, specialista forensico y detective a confisca huls y un celular haya na e escena. Polis tambe a confisca un scooter sin plach’i number, cu nan ta sospecha por a ser horta pa joyriding. Su conexion cu e tiramento no a keda estableci.
Polis no a anuncia ningun aresto, y e circunstancianan rond di e tiramento ta keda bao investigacion.
Varios tiramento durante 2026
E incidente di diamars marduga no ta e prome tiramento investiga pa polis e aña aki.
Dia 24 di mei, un hoben di 17 aña di edad a perde su bida despues di a keda tira den parkinglot di Fat Tuesday na Palm Beach.
Dos dia despues, polis a investiga otro tiramento na Sero Colorado, unda un chauffeur a reporta cu a tira riba su vehiculo. Tres sospechoso a keda deteni.
Dia 21 di juni, otro tiramento a sucede cerca di Pacifico Restaurant na San Nicolas. Polis a investiga reportahenan di tiramento cu arma di candela invol;ucrando vehiculo, y despues a detene cuatro sospechoso.
Dia 26 di augustus, un homber di 20 aña a keda herida den tiramento na Mandolinstraat na Dakota. Polis a reporta subsecuentemente cu a haci aresto adicional conecta cu e investigacion ey.
Mas recientemente, KPA a investiga un incidente serio na Sero Biento, involucrando un motociclista cu a descubri cu un bala a keda pega den su back brace. Polis a indica cu varios incidente di tiramento den e area tabata bao investigacion.
E incidentenan aki ta demostra cu tiramento ta tumando lugar na diferente parti di Aruba durante 2026. Sinembargo, e casonan identifica den rapportnan di polis publica no ta duna un bista estadistico completo. Un cantidad total oficial pa tiramento registra durante prome dies luna di 2026 ainda no ta establci.
Menos tiramento, pero mas arma di candela
E cifranan anal completo mas recien ta duna un imagen complica.
Na januari 2026, Alto Comisario di Polis, Ramon Arnhem a reporta cu KPA a registra 21 incidente di tiramento na 2024, compara cu nuebe na 2026. Esaki ta representa un reduccion di aproximadametne 57 porciento. Cantidad di robo arma tambe a baha, di 17 na 2024 pa 12 na 2025.
Sinembargo, estadistica publica pa Ministerio Publico (OM) ta mustra un desaroyo diferente tocante posesion ilegal di arma di candela.
Segun e rapport anual di OM, a registra 78 caso di posesion di arma di candela na 2023. E cantidad a aumenta na 79 na 2024, y a alcansa 86 na 2025.
Esaki ta representa un aumento di aproximadamente 9 porciento entre 2024 y 2025, a pesar di e reduccion den tiramento.
OM tambe a reporta cu a confisca 38 arma di candela na 2025, compara cu 31 na 2025. Posesion ilegal di arma di candela a bolbe riba lista di e 10 delito registra mas frecuentemente na Aruba, ocupando e di nuebe lugar.
E cifranan aki no ta nifica necesariamente cu mas arma ilegal a drenta Aruba durante 2025. Un aumento den caso registra of confiscamento tambe por refleha mas investigacion y operacion di polis.
Asina mes, e cifranan ta mustra cu posesion di arma ilegal ta keda un preocupacion, hasta durante periodonan unda tin menos tiramento.
Arma confisca durante operacion di polis
Operacion di polis reciente a demostra cu ta keda descubri arma ilegal.
Dia 2 di october, Unidad Narcotica di KPA, trahando cu Team di Aresto y otro departamento specialisa, a haci inval na residencianan na Seroe Patrishi y Tanki Leendert. E operacion a resulta den seis aresto y confiscamento di droga, un rifle, municion y un cargador di arma di candela.
Maske e investigacion tabata principalmente relaciona cu droga, e descubrimento di un arma di candela ta ilustra cu arma tambe por ta involucra den investigacion tocante otro crimen.
Anteriormente e aña aki, KPA y OM a organisa un campaña di entrega boluntario di arma di candela, permitiendo residentenan entrega arma y municion ilegal anonimamente sin enfrenta persecucion pa entrega di e arma.
Entre maart y mei di 2026, tres arma y 359 municion a keda entrega.
Mientras tanto, durante un esfuerso mas amplio di aplicacion di ley entre 1 di december 2025 y 29 di mei 2026, polis a reporta 40 aresto den investigacion involucrando arma di candela ilegal. Diestres arma di candela a keda confisca, incluyendo dos fabrica usando tecnologia di 3D printing.
Despues di e campaña, autoridadnan a anuncia cu accion lo continua cu e mensahe “Nos ta bin busc’e,” indicando cu polis lo busca arma ilegal activamente en bes di warda pa e doñonan entrega nan boluntariamente.
Di unda arma di candela ta drenta?
Un di e preguntanan importante rond di arma di candela ilegal na Aruba ta trata nan origen.
Como un isla cu conexion maritimo y aereo internacional, Aruba ta depende riba cooperacion entre polis, Aduana y partnernan regional pa combati trafico di arma.
Na november 2025, Aruba a participa den un iniciativa regional conoci como War Room 2.0, cu a trece hunto partnernan hudicial y di ley pa examina e movemento, comercio y distribucion di arma di candela ilegal entre teritorionan Caribense.
Sinembargo, origen di e arma involucra den tiramentonan individual no semper ta conoci.
Den e tiramento diamars na Caya St. Maarten, polis no a anuncia si a recupera un arma di candela, Tampoco tin confirmacion si e incidente ta conecta cu trafico internacional of crimen organisa.
Kico e cifranan ta bisa?
E estadisticanan disponible ta mustra cu Aruba a registra considerablemente menos tiramento na 2025 cu na 2024. Na mes momento, caso registra di posesion y confiscamento di arma di candela a aumenta.
E desaroyonan aki no ta contradictorio. Un incidente di tiramento, un caso di posesion di arma y un arma confisca ta midi diferente aspecto di crimen relaciona cu arma di candela.
Otro pregunta importante ta si cada tiramento ta conoci pa autoridadnan. Den declaracionnan anterior, KPA y OM a reconoce cu algun incidente relaciona cu tiramento por nunca keda reporta formalmente. Esaki ta hacie dificil pa determina e grado total di e problema usando incidentenan registra so.
E tiramento na San Nicolas tambe ta ilustra e retonan cu investigadornan ta enfrenta. Pa ora polis a yega, esnan involucra ya a bandona e escena, rekeriendo detectivenan pa reconstrui eventonan usando evidencia fisico y informacion di testigo.
Pa awo, ambos victima a sobrevivi y e investigacion ta continua.
E pregunta mas amplio ta si Aruba por mantene e reduccion den tiramento reporta durante 2025, mientras ta sigui combati posesion ilegal di arma di candela. E cifranan oficial di 2026 lo determina si e reduccion a continua.
Mientras tanto, polis ta pidiendo cualkier persona cu informacion tocante e tiramento diamars pa yama e tip line anonimo, 11141.
