AHATA y minister di Turismo ta di acuerdo cu mester bin cambio, pero ta diferi tocante medida crucial

Maske e desacuerdo entre Aruba Hotel and Tourism Association (AHATA) y minister di Turismo, Wendrick Cicilia (AVP) a pone atencion riba e proceso di consulta rond di e plan Tourism 3.0, e dos banda ta di acuerdo cu un principio importante: Aruba mester cambia e direccion di su industria di turismo.

Segun CEO di AHATA, Tisa LaSorte, sinembargo, varios medida cu e asociacion ta considera esencial pa logra e cambio no a keda incorpora den e maneho proponi pa gobierno. Den un combersacion cu Bon Dia Aruba, LaSorte a splica cu no mester interpreta critica di AHATA como un oposicion pa e strategia di turismo di e minister. Al contrario, el a enfatisa cu tin alineacion considerable entre e asociacion y gobierno, particularmente tocante e necesidad pa genera mas balor economico di turismo en bes di depende riba crecemento continuo den cantidad di bishitante.

“Unda nos ta hopi alinea cu gobierno ta cu mester un rumbo nobo,” LaSorte a bisa.

Ambos banda ta reconoce cu Aruba ainda no a logra e balansa desea entre crecemento di bishitante y contribucion economico. Maske entrada di turismo ta keda aumenta, e cantidad di bishitante tambe ta creciendo, y e industria ainda no a haci e transicion pa mas balor economico pa cada bishitante.

E desacuerdo ta tocante con pa logra e obhetivo aki. Mientras gobierno kier pa e contribucion economico di turismo crece mas lihe cu e cantidad di bishitante, AHATA ta kere cu Aruba mester tuma e stap adicional di stop crecemento den volumen di bishitante.

Tres ronda di consulta

LaSorte a splica cu AHATA a participa den tres ronda di consulta cu stakeholder organisa pa Ministerio di Turismo. Esakinan tabata reunion individual cu organisacionnan participante, en bes di sesionnan cu ta trece tur stakeholder hunto.

Segun LaSorte, e prome reunion a consisti en gran parti di representantenan di gobierno splicando e documento cu nan a prepara caba. AHATA y otro participantenan a sinti cu nan tabatin tiki oportunidad pa contribui nan propio recomendacion.

Durante e siguiente reunionnan, AHATA a duna feedback mas detaya. Maske a ahusta e documento despues di cada ronda, e asociacion a haya ripitidamente cu su recomendacionnan principal no a keda incorpora. LaSorte a enfatisa cu AHATA ta aprecia di a keda invita y ta considera e combersacionnan generalmente constructivo. Na cierto momento, el a recorda, e minister mes a reconoce con alinea nan posicion tabata.

Sinembargo, e alineacion ey no a keda suficientemente refleha den e documento, segun AHATA.

E situacion eventualmente a resulta den un desacuerdo publico despues cu Cicilia a declara cu stakeholdernan individual no por determina futuro di turismo.

LaSorte a splica cu AHATA no tabata spera di dicta decision di gobierno. Sinembargo, e asociacion ta kere cu participacion den e consulta mester nifica cu su contribucionnan lo ricibi consideracion serio.

“Nos no kier participa den un teatro, nos kier participa den un combersacion real,” el a bisa.

El a agrega cu AHATA ta representa un variedad amplio di negoshi den turismo, en bes di e interes di un solo individuo. Su recomendacionnan, anto, ta refleha un perspectiva colectivo di e industria cu e asociacion ta kere merece consideracion substancial.

Falta di coordinacion

Segun LaSorte, un di omisionnan mas importante den Tourism 3.0 ta trata coordinacion entre e entidadnan responsable pa trece bishitante na Aruba.

AHATA kier un strategia cla splicando cu aeropuerto (AAA), Aruba Ports Authority (APA), sector cruceroy Aruba Tourism Authority (A.T.A.) ta bay traha hunto pa logra e perfil di turismo desea pa e pais.

E organisacionnan aki ta influencia cua crucero y aerolinea ta bin Aruba, con hopi bishitante ta yega, y ki mercado ta atrae mediante actividad di mercadeo.

Sin coordinacion entre e entidadnan aki, LaSorte ta cuestiona e intencion di gobierno pa traduci su obhetivonan di turismo den resultado concreto.

El a reconoce cu controla yegada ta complica, particularmente pasobra acuerdonan internacional di aviacion ta limita e habilidad di gobierno pa selecta aerolinea of restringi cierto conexion. Sinembargo, AHATA ta kere cu e dificultadnan aki ta hacie mas importante ainda pa cuminsa discuti e cambionan necesario awo.

Companianan priva tambe ta bay tin cu adapta nan servicio, inversion y operacion pa un modelo di turismo diferente. Segun LaSorte no por spera rasonablemente cu nan ta bay haci ahuste sin un direccion nacional cla.

Menos bishitante pero mas placa

Un di e preocupacionnan relaciona cu e propuestanan di AHATA ta e potencial efectonan di reduci cantidad di bishitante riba negoshi cu ta depende di turismo.

Por ehempel, companianan organisando transporte y excursion pa pasahero di crucero por preocupa cu menos cliente ta nifica automaticamente cu lo gana menos placa.

Sinembargo, AHATA ta argumenta cu cantidad di bishitante so no ta determina con hopi placa un negoshi ta gana. Un compania sirbiendo menos cliente por mantene of aumenta su entrada potencialmente si e clientenan gasta mas. Por ehempel, un operador di tour sirbiendo 100 cliente cu cada un ta gasta $50 ta genera $5000. Pero sirbi 80 cliente cu cada un gasta $75, ta genera $6000.

E ehempel aki ta ilustra e principio economico tras di propuesta di AHATA, maske logra resultadonan asina lo rekeri pa negoshi atrae cliente dispuesto pa paga mas y adapta nan servicio en consecuencia.

LaSorte a enfatisa cu e transicion aki ya ta visible den partinan di industria di hotel. Segun cifranan cu el a menciona durante combersacion cu Bon Dia Aruba, anochi di bishitante a crece apenas modestamente desde 2018, mientras ADR a aumenta. Esaki ta demostra, segun AHATA, cu crecemento economico no ta rekeri necesariamente pa keda aumenta e cantidad di cliente.

Sinembargo, atrae bishitante dispuesto pa gasta mas tambe ta rekeri pa Aruba ofrece un experiencia cu ta hustifica prijs mas halto. Bishitante pagando pa un vakantie premium generalmente ta spera conveniencia, comfort y calidad. Trafico, aglomercion na beach y warda den rij ta mina e experiencia aki.

Consecuentemente, AHATa ta considera controla e volumen di bishitante como un parti esencial pa atrae e tipo di turista cu Aruba ta bisa cu nos kier.

LaSorte tambe a enfatisa cu e profiel di bishitante desea no mester ta defini exclusivamente pa con hopi nan ta gasta. AHATA kier bishitante cu ta aprecia naturalesa y cultura di Aruba y experiencianan local.

Turismo crucero y ‘National Ocean Rest Day’

E desacuerdo tambe ta extende na propuesta specifico inclui den Tourism 3.0.

LaSorte a clarifica cu AHATA no ta boga necesariamente pa un reduccion den e cantidad total di pasahero di crucero bishitando Aruba anualmente. Mas bien, e asociacion kier mas control riba con hopi pasahero ta yega riba un solo dia.

E obhetivo ta pa reduci presion concentra riba beach, caminda, atraccion natural y servicio turistico.

“Loke nos ta bisa ta cu riba un cierto dia, bo kier controla cuanto ta yega Aruba,” el a splica.

AHATA ta kere cu e cantidad cu ta discutiendo actualmente ta keda demasiado halto pa logra e reduccion desea den presion diario.

E asociacion tambe a cuestiona e propuesta pa Dia Nacional di Descanso di Lama (National Ocean Rest Day), durante cual lo restringi actividadnan marino pa permiti medio ambiente un dia di descanso. Segun LaSorte, controla cumplimento di un medida asina lo ta dificil, particularmente si restriccion tambe ta afecta piscado y otro hende usando e area. AHATA ta considera mas efectivo pa reduci presion ambiental consistentemente durante siman, en bes di restringi actividad riba un solo dia, mientras ta permiti activiad potencialmente intensivo e siguiente dianan.

El a bisa cu e asociacion tambe a discuti e maneho aki cu organisacionnan ambiental.

Diferente interes den industria

LaSorte tambe a papia di e aparente contradiccion entre e posicion di AHATA y e plan di hotel individual pa expansion continuo.

AHATA ta representa aproximadamente 260 compania, cada un cu su propio interes comercial y obhetivonan di negoshi. Miembronan individual por sostene plan di inversion of expansion cu no ta coresponde completamente cu e strategia mas amplio di e asociacion.

Segun LaSorte, hunta di AHATA ta responsable pa considera e interesnan colectivo a largo plaso di e industria, hasta ora miembronan individual no ta di acuerdo cu cierto recomendacion.

El a argumenta cu e asociacion mester considera no solamente e rentabilidad actual, sino tambe si industria di turismo di Aruba por keda exitoso den e proximo decadanan.

Speransa pa continuacion di dialogo

A pesar di e desacuerdo publico, LaSorte a enfatisa cu AHATA ta keda reconoce e esfuersonan di gobierno y ta spera cu e proceso di consulta por produci mas mehoracion. E ta kere cu Aruba actualmente tin un oportunidad pa haci decisionnan dificil for di un posicion economico fuerte. Demanda pa turismo ta keda halto, y e industria ta generando entrada substancial. En bes di warda te ora sobreturismo of circunstancia externo forsa cambio, AHATA ta kere cu Aruba mester usa e posicion faborable aki pa cuminsa e transicion pa un modelo di turismo mas sostenible.

Pa LaSorte, e desacuerdo cu e minister no ta elimina e alineacion substancial entre e dos banda.

“E speransa ta keda. Nos speransa ta cu e dialogo ta keda importante, cu e relacion ta keda uno productivo, y cu ainda tin un chens cu por bin algun cambio cu nos ta desea tambe.”