Conexion via satelite… Bendicion, o algo otro…?

Goberna semper ta continuacion, den cos bon y cos malo. Esaki nos por ripara den varios asunto cu ta capta atencion den e dianan aki. Un suceso o incidente por surgi awe, pero casi semper e contesta cu mester den e asunto ta hiba nos na pasado pa por comprende e solucion cu mester, sin ignora presente.

Un ehemplo di esaki ta surgi awor cu e tema di servicio di telecomunicacion di empresa Starlink. E compania internacional aki a haya permiso caba pa opera na e otro teritorionan Hulandes den Caribe, loke ta indica cu tabatin un evaluacion di gobierno Hulandes pa loke ta e teritorionan insular goberna directamente for di Den Haag. E compania por a inicia operacion na Corsou tambe, otro señal cu nan a pasa cierto escrutinio. Y Aruba? Aki nos ta bay na e pasado referi anteriormente, pasobra ta a base di e pasado ey nos por anticipa kico gobierno di Aruba ta bay haci.

E pasado ta siña nos cu gobierno tabata ataca cualkier intento di competidor cu por a menaza e compania nacional di telecomunicacion Setar. A bin cambio si den ultimo añanan, entre otro pa via di e casonan den corte cu a tuma lugar, entre otro na Corsou tambe, cu a crea un hurisprudencia faborable pa otro proveedor nobo. Esaki a conduci na un trato diferente pa Digicel, cu lo haya su propio cable submarino dentro di e proyecto di e compania mes pa henter Caribe. Pa keda un rato na e tema di uso di cable submarino cu ta conecta Aruba cu resto di mundo, tin desaroyo faborable den esaki. Por señala cu e compania nacional mes ta dispone caba di dos cable submarino, loke ta garantiza e asina yama ‘redundancia’ cu ta necesario pa den caso di calamidad por keda conta cu conexion digital cu mundo. Por anticipa anto cu gobierno no ta bay subi e caminda di bringa tur cos, te den corte. Loke si por spera ta un concentracion riba e condicionnan specifico cu ta pone na presencia di e compania di satelite na Aruba. Esey lo ta tema di discusion interno pa basta tempo y no ta vale la pena specula encuanto esey.

Ta bin anto un servicio digital cu no ta haci uso di un cable submarino, sino di comunicacion via satelite. E bentahanan ta obvio, mirando e prijsnan ofreci pa e compania Starlink na e otro islanan. Manera splica den un anterior edicion di BDA, e costo mensual ta bastante bao di e tarifa minimo di Setar. Permiti un competidor asina lo tin su debido consecuencia pa ingreso di e compania nacional. Loke no ta conoci ta si e prijs ofreci ta contempla tur costo di e infrastructura cu e compania lo mester crea na nos pais. En todo caso, mirando e situacion na e otro islanan, y sigur tumando na cuenta e batayanan legal hiba den corte cu a crea e hurisprudencia al caso, lo ta un cuestion di tempo pa gobierno, mas specifico Departamento di Telecomunicacion, emiti permiso pa e compania Starlink opera na Aruba.

Cu esey nos a yega na final di e storia? No. Nos lo ta ignorando tur loke a sucede na nivel internacional cu e compania aki, cu tabata y ta involucra den uso di su red di distribucion como arma politico, segun deseo di su propietario unico. Un incidente, por cierto den e dianan aki, ta ilustra e peligro aki. Na inicio di e guera Ruso contra Ucrania, e propietario unico a percura pa Ucrania por a defende su mes contra e agresion Ruso, cu suministro di e señal di Starlink. Esaki a resulta di gran valor pa e pais, pero el a keda suheto na e humor di e propietario ken, segun cu Ucrania su manera di hiba su guera di defensa no tabata cuadra cu e ideanan politico di e propietario mes y di presidente Trump, a corta comunicacion pa pone presion politico. De repente siman pasa ainda Ucrania a manece sin señal, aparentemente pasobra presidente Zelensky no a actua segun instruccion cu Trump tabata pretende di duna. Esaki tabata pa para ataque riba infrastructura petrolero na Rusia, cu lo tabata causa escasez di diesel riba mercado internacional. Algo cu ademas no tabata e causa principal di escasez, sino e guera na Medio Oriente cu Trump mes a inicia desde fin di februari caba.

Finalmente, protesta tanto na Merca como na Europa, acompaña pa critica riba e ‘diesel-deal’ di Trump cu Rusia, a haci cu a restablece e señal pa Ucrania. Tambe nos por a mira recientemente con medida ta ser tuma contra entidad internacional, estableci dentro di nos Reino: e caso di Corte Penal Internacional, cu a mira su mes exclui di e sistema di pago internacional, domina pa Merca. Nos lo mester tene cuenta cu un eventual ‘castigo’ di e compania pa cualkier incidente, na algun lugar den Reino, na cual e cliente local tin ‘arte ni parte’? Nos no ta mira un peligro directo ey, pa motibo di e redundancia cu ya ta existi den forma di cable submarino. Ta solamente den caso di un calamidad cu ta obstaculiza uso di e cablenan, e compania di satelite ta bira importante pa mantene comunicacion, y por abusa esaki. Pero pa esey por establece condicion den e convenio cu mester firma ainda. Ademas, keto bay e compania mester cumpli cu ley na Aruba, y por perde su licencia manera tur otro. Aruba no ta den e condicion unda comunicacion via satelite lo ta ‘bendicion y desgracia’ pareu, como e unico servicio disponible.