(AFP) – Cientificonan Hapon ta preparando un mision pa lunanan di Mars pa recoge muestranan cu por yuda revela origen di e Sistema Solar y bida riba Tera, den loke tin como meta bira e prome mision di ida y buelta pa region di Mars.
E sondeo no tripula Martian Moons eXploration (MMX), un colaboracion cu agencianan espacial Mericano y Europeo, como tambe varios universidad y compania tecnologico, por yuda tambe prepara base pa exploracion humano den futuro.
Raket principal H3 cu ta carga MMX ta programa pa lansa for di Tanegashima Space Center diamars 4:41 di mainta ora local, segun Japan Aerospace Exploration Agency (JAXA).
“Por ta involucra den un mision asina grandi ta algo increiblemente emocionante,” gerente di proyecto di team H3 di JAXA, Makoto Arita, a bisa periodistanan dos dia prome cu lansamento.
E nave espacial lo yega cerca di Mars alrededor di augustus otro aña, unda e lo drenta orbita rond di un di su lunanan, Phobos, prome cu baha riba su superficie y recoge por lo menos 10 gram di material durante tres aña di operacion den region di Mars.
Un rover cu nomber IDEFIX — nomber Frances di e cacho heroe di comic Asterix — lo haci observacionnan di superficie prome, pa yuda sigura un bahada safe.
“Recoge muestra for di Phobos ta naturalmente e prome haci, pero esaki tambe ta nifica… cu esaki ta e prome mision di ida y buelta pa e sistema di Mars,” gerente di proyecto di MMX, Yasuhiro Kawakatsu, a bisa AFP.
HAXA a bisa cu e mision tambe lo studia posibilidad di usa Phobos como un “stacion espacial natural” door di determina cua rekisitonan ta necesario pa un vuelo di ida y buelta pa Mars, algo cu e agencia ta considera “esencial pa exploracion humano di Mars”.
E mision lo observa tambe otro luna di Mars, Deimos, aunke e no lo baha riba dje, prome cu bolbe Tera.
Impacto of captura
HAXA ta spera cu e mision lo revela con Mars y su dos lunanan a forma, un piesa importante di informacion pa compronde con e Sistema Solar a nace.
Un teoria tocante origen di lunanan di Mars — e hipotesis di “impacto gigante” — ta cu nan a forma despues cu un cuerpo celeste a dal cu Mars.
E hipotesis di “captura”, por otro banda, ta propone cu e lunanan ta asteroidnan cu gravedad di Mars a captura.
Determina cua teoria ta corecto lo yuda revela “con un ambiente habitabel pa bida por a surgi riba planetanan terestre,” JAXA a bisa, referiendo na e cuatro mundonan mas cerca di Solo: Mercurio, Venus, Tera y Mars.
“MMX lo trece mas claridad tocante mecanismonan di transporte cu a hiba awa, materialnan volatil y compuestonan organico for di e parti exterior di e Sistema Solar pa region interior di planetanan — procesonan cu por a hunga un rol importante den haci e mundonan aki habitabel,” astrofisico Frances Patrick Michel, kende ta traha riba IDEFIX, a bisa.
“Si Phobos y Deimos realmente ta restonan di e sistemanan tempran di transporte aki, nan por contene pista tocante origen di bida mes, of, pa bis’e mas corectamente, tocante transporte di e materialnan cu tabata esencial pa surgimento di bida riba planetanan cu hopi piedra,” el a bisa AFP.
Mision di China
Agencianan espacial Mericano y Chines ta competi pa ta e prome pa trece muestranan di piedra for di superficie di Mars back Tera.
Rover Perseverance di NASA, cu ta move rond riba e Planeta Cora desde 2021, ya a recoge muestranan.
Sinembargo, e mision a ser efectivamente cancela pa administracion di Presidente Donald Trump despues di un voto di Congreso Mericano na januari.
China, mientras tanto, a anuncia cu su nave espacial Tianwen-3 ta programa pa lansa alrededor di 2028 y ta anticipa cu e lo trece muestranan di Mars pa Tera pa 2031, posiblemente prome cu MMX bolbe.
Cientificonan di JAXA ta bisa cu santo y piedranan for di Phobos por ofrece un variedad mas amplio di muestra cu esnan riba Mars mes, specialmente si e luna a forma door di un colision entre un cuerpo celeste y Mars.
