(NLTimes) – Ademas di uza programa di inteligencia artificial (AI) pa prepara publicacionnan riba nan rednan social, parlamentarionan Hulandes ta recuri regularmente na programanan manera Claude y ChatGPT pa redacta nan contribucionnan durante debatenan parlamentario. Segun un investigacion di Investico y De Groene Amsterdammer, por lo menos 68 di e 150 miembro di Parlamento Hulandes a presenta discurso na comienso di debate, den cual mas di mita di e contenido a ser genera door di inteligencia artificial.
E investigadornan a recopila tur transcripcion di e discursonan presenta durante debatenan parlamentario entre 1 di januari y 30 di september. E investigacion a concentra riba e contribucionnan cu parlamentarionan ta presenta na comienso di un debate, cu normalmente nan ta prepara di antemano. Pa analisa e textonan, e investigadornan a uza e programa Pangram, cu ta detecta contenido genera door di inteligencia artificial. Solamente casonan den cual mas di mita di e contribucion a ser redacta door di un chatbot a ser conta como uzo di AI.
Segun Investico, den casi dos tercera parti di tur debate, por lo menos un parlamentario a uza texto redacta door di un chatbot. Den total, casi 300 contribucion parlamentario tabata consisti pa por lo menos mita di contenido genera door di inteligencia artificial.
Esmah Lahlah, anteriormente parlamentario di PRO y actualmente Consejal na Amsterdam, ta aparece entre e parlamentario cu mas frecuentemente a uza inteligencia artificial. Den cuatro di e cinco debatenan na cual el a participa, el a uza texto genera door di AI. Rachel van Meetelen di PVV tambe ta entre e usuarionan frecuente, hunto cu Fatimahzra Belhirch di D66 y Wendy van Eijk di VVD.
BBB ta e fraccion parlamentario cu mas ampliamente a incorpora inteligencia artificial den su contribucionnan. Segun e investigacion, 30% di e discursonan di e partido, cu principalmente ta representa interesnan di sector agricola, a ser genera door di AI. Otro fraccionnan cu ta hasi uzo frecuente di e tecnologia aki ta Groep Markuszower, Mona Keijzer y VVD. Solamente PvdD, SP y Volt no a registra uzo di inteligencia artificial den nan discursonan, segun e analisis.
E investigadornan a descubri cu principalmente parlamentario menos conoci y miembronan recientemente eligi ta haci uzo di inteligencia artificial. Mitar di e parlamentarionan cu ta uza e tecnologia frecuentemente no tabata miembro di Parlamento un aña pasa. Varios parlamentario a indica cu nan ta uza AI principalmente pa haci nan textonan mas cortico.
Sinembargo, algun parlamentario a expresa preocupacion tocante nan propio uzo di inteligencia artificial. Parlamentario di CDA, Harmen Krul, a confirma na Investico cu e ta uza AI durante preparacion pa debatenan. No obstante, el a indica cu lo preocup’e hopi si surgi e impresion cu su contribucionnan ta completamente genera door di un chatbot.
Parlamentario di FvD, Peter van Duijvenvoorde, a describi su propio uzo di inteligencia artificial manera algo bergonsoso y poco honorabel. El a splica cu el a uza e tecnologia durante e periodo cu e ainda tabata buscando su mesun estilo y manera di expresa su mes. Sinembargo, el a indica cu el a dicidi di no sigui uza AI pa e proposito aki.
Segun Tom Dobber, profesor asistente di Comunicacion Politico na Universidad di Amsterdam, e uzo di inteligencia artificial pa redacta discurso parlamentario ta representa un problema mas serio cu e uzo di chatbot door di Prome Minister Rob Jetten pa prepara hopi di su publicacionnan riba rednan social. Dobber a declara na Investico cu e practica aki ta afecta directamente e fundamento di democracia.
Marc van Oostendorp, profesor di idioma Hulandes y comunicacion na Universidad Radboud, ta comparti e preocupacion aki. Segun e, ta bin dilanti e pregunta tocante e balor di un debate parlamentario ora un representante politico ta limita su mes na lesa texto cu a ser produci door di un programa di inteligencia artificial.
E investigacion ta pone atencion riba e uzo creciente di inteligencia artificial den trabao parlamentario Hulandes y e preguntanan cu esaki ta lanta tocante autenticidad di contribucionnan politico, responsabilidad di representantenan eligi y e papel di tecnologia den proceso democratico.
