Aruba Birdlife Conservation (ABC) a pidi gobierno formalmente pa bisa cu palabranan cla unda e ta para. Dia 22 di october 2026, e fundacion, door di su abogado mr. G.W. Rep, a manda un carta na Prome Minister Mike Eman, Minister di Infrastructura Rene Herdé y Minister di Husticia Arthur Dowers.

E carta ta yega apenas ocho dia despues cu Corte a sugeri pa gobierno, ABC y un representante di tour operators busca un solucion hunto. Segun mr. Rep, despues di e decision ey ABC no a haya ningun señal di un reunion. P’esey e fundacion ta pidi gobierno pa pone su posicion riba papel prome cu e partidonan sinta na mesa.

E conflicto no ta algo nobo. Na mei di e aña aki ABC a entama un caso contra Gobierno di Aruba y Aruba Conservation Foundation (ACF). E argumento tabata cu areanan manera California Dunes, Tera Cora, Saliña Tierra del Sol y parti di Parke Arikok ta proteha riba papel, pero cu den practica nan a bira un tipo di “Wild West” pa vehiculonan off-road. E caso a bin den un momento di hopi preocupacion publico.

E caso tabata programa pa dia 10 di september, pero gobierno a haci un peticion na Corte pa pospone esaki. Minister Herdé a splica cu gobierno kier duna espacio pa dialogo cu tour operators, cu nan trabou ta depende di e actividad, y cu e ta prefera pa e partidonan mes yega na un acuerdo. Segun e minister, proteccion di naturalesa y empleo mester haya balansa.

Dia 14 di october hues mr. A.H.M. van de Leur a acepta otro peticion pa pospone, e biaha aki te dia 12 di november, a pesar cu ABC tabata contra esaki. Mr. Rep a argumenta cu e reunionnan anterior cu gobierno no a produci un proposicion pa proteha naturalesa suficientemente. El a menciona tambe menasa contra Greg Peterson y su famia como motibo cu Peterson no ta participa boluntariamente den reunion cu e grupo. Hues a tene na cuenta e interesnan di e partidonan y di comunidad, y ta spera cu nan lo acepta e invitacion pa un dialogo constructivo.

Segun ABC, Gobierno ainda no a contesta riba diferente propuesta cu e fundacion a presenta anteriormente. E carta di awor ta pidi un contesta concreto pa cada area menciona, incluyendo con gobierno kier controla y enforsa e reglanan. Mr. Rep ta enfatisa cu e documento no ta un acuerdo, sino un peticion formal pa claridad, como preparacion pa e dialogo cu Corte a indica.

Un punto central den e carta ta un conseho conhunto di DOW, DIP y DNM di dia 24 di september. Segun ABC, e tres departamentonan a recomenda pa uza e investigacion y rutanan cu ya a ser identifica anteriormente manera punto di salida pa un solucion duradero y legalmente sostenibel.

E conseho di 24 di september ta indica cu e solucion mester parti di e investigacion y recomendacionnan anterior, incluyendo e proteccion di Tera Cora. Segun e tres departamentonan, gobierno solamente mester desvia di e recomendacionnan si tin hecho of circunstancia nobo, y e decision mester ta explicito y debidamente motiva riba base legal y tecnico.

Un di e documentonan di referencia ta un rapport di 13 di october 2022, cu a señala tres ruta caminda ATV y UTV no mester drenta: for di Faro te Alto Vista, entre Natural Bridge y Indjek/Blackstone Beach, y e caminda di santo entre Sero Colorado y Rode Anker. ABC ta pidi e ministernan pa splica, cu argumentonan legal y tecnico, si gobierno kier bay den otro direccion

cu e recomendacionnan aki, y e motibo.

ABC ta enfatisa cu e no ta exigi pa tur ruta ser cera. E fundacion ta traha cu un distincion entre area. Pa Tera Cora y Saliña Druif, cu ta cay den diferente forma di proteccion ambiental, ABC

tin duda serio si trafico motorisa por ser permiti. Pa esaki e ta referi na e tratado RAMSAR, e ley di proteccion di naturalesa y e ROPV.

Segun e carta, Tera Cora ta registra manera Important Bird Area (IBA), mientras cu Tera Cora y Saliña Druif ta forma parti di areanan proteha bao di e tratado RAMSAR. Saliña Druif y e area rond di Saliña Tierra del Sol tin tambe status di reserva natural desde 2020. ABC ta argumenta cu e proteccionnan aki, hunto cu e reglanan di ordenacion teritorial, mester forma parti esencial di cualkier decision tocante trafico di ATV y UTV.

Pa e trayecto entre Alto Vista y Bushiribana, ABC ta dispuesto pa tolera ATV y UTV temporalmente, pero solamente bao di condicionnan estricto: limite di velocidad y di cantidad di vehiculo, control riba zonanan prohibi, midimento di desordo y stof, y un reduccion paso pa

paso. Entre Bushiribana y Natural Bridge, e fundacion no tin problema cu e vehiculonan sigui circula. Pa e area despues di Natural Bridge, cu ta inclui Andicuri te Parke Arikok, ABC ta mantene cu e zona mester keda cera.

ABC a presenta caba propuesta pa e diferente areanan dia 11 di september. Pa e trayecto entre Alto Vista y Bushiribana, e fundacion ta propone permiso temporal bao di condicionnan estricto y reduccion gradual di e actividad. Pa e area entre Bushiribana y Natural Bridge, e ta acepta

continuacion di trafico, mientras cu e zona despues di Natural Bridge mester keda cera. E carta ta pidi gobierno pa aclaria tambe su posicion tocante e ruta entre Sero Colorado y Rode Anker, cu a ser identifica como zona unda ATV y UTV no mester drenta.

Mr. Rep tambe ta cuestiona e idea di traha un caminda nobo cu material DirtGlue. Segun e, e calculacion di costo cu a ser presenta no ta completo. ABC ta pidi un presupuesto completo y detaya y un splicacion di pakico gobierno lo gasta miyones di florin riba un caminda nobo, mientras cu tin ruta y recomendacionnan cu ya a ser prepara.

ABC a tuma nota di e iniciativa anuncia recientemente pa uza tecnologia GPS pa controla ruta y velocidad di ATV y UTV. Pa e fundacion esaki ta un paso den bon direccion, pero e tin miedo cu e sistema lo trece resultado, den mayoria caso, despues cu e violacion a sucede caba. P’esey ABC ta propone pa considera vehiculonan electrico programa cu GPS, cu por limita velocidad y para automaticamente ora nan sali for di nan ruta autorisa. Segun ABC, e opcion aki lo reduci tambe e boroto y lo mehora e experiencia di bishitantenan cu ta bin pa disfruta di naturalesa.

Tecnologia so no ta suficiente, segun ABC. Control efectivo ta pidi suficiente personal, reglanan cla, boet, posibilidad di confiscacion y bareranan fisico adecuado. Manera ehempel di loke por

 

bay robes, e fundacion ta menciona cu e piedranan grandi cu gobierno a pone na un momento pa cera acceso a ser kita sin autorisacion, y asina vehiculonan a bolbe drenta areanan cu tabata cera.

Tras di e carta tin un discusion politico mas hancho. Na october 2024 Conseho di Minister a

aproba e Strategia y Plan di Accion Nacional pa Biodiversidad 2024–2030, cu ta identifica UTV y ATV manera un actividad recreacional cu impacto halto riba naturalesa y ta bisa cu nan mester ser elimina gradualmente te 2030. Na april di e aña aki, minister Dowers a bisa cu e gabinete actual no tin intencion di prohibi e vehiculonan, y cu e enfoke ta riba comportacion di usuarionan y mantencion di reglanan existente.

Mientras tanto, tour operators a expresa nan preocupacion pa continuidad di nan trabao, y doñonan di tereno na Wariruri, representa pa Rainbow Warriors Core Foundation, a reclama respet pa nan propiedad priva den e conflicto aki.

E pregunta central cu ABC ta pone dilanti gobierno ta simpel: lo respeta e consehonan tecnico y legal cu ya ta existi, of lo permiti trafico di ATV y UTV den areanan cu anteriormente a ser identifica manera zonanan proteha. Te ora gobierno contesta, e caso ta keda pendiente. Corte lo trata e caso dia 12 di november, y e dianan prome cu e fecha ey lo ta decisivo pa wak si e partidonan por yega na mesa cu propuestanan concreto.