Gobierno di Aruba ta traha riba un plan pa regula e uzo di vehiculonan UTV y ATV na costa noord, cu e meta di busca un balansa entre proteccion di naturalesa, turismo recreativo y e interes di comunidad. E plan ta contempla rutanan predestina, condicionnan mas estricto pa tour operators y medidanan di control.

Durante un entrevista cu Minister di Infrastructura Rene Herde a indica cu e proceso ta inclui dialogo cu Aruba Birdlife Conservation (ABC), Aruba Conservation Foundation (ACF), tour operators, tour guides, piscadonan y diferente departamento di gobierno. E intencion ta pa busca un solucion duradero pa e situacion, sin limita e discusion solamente na e posibilidad di cera camindanan.

E asunto ta relaciona cu un caso legal entre Aruba Birdlife Conservation, Gobierno di Aruba y ACF, cu ta maneha Parke Nacional Arikok. ABC a inicia e caso pa motibo di preocupacion tocante e impacto di actividadnan motorisa riba areanan natural.

Segun e mandatario, e situacion actual ta resultado di un proceso cu a cuminsa bao di gobierno anterior, durante cual diferente decision a ser tuma, pero no tur medidanan a ser implementa. E herment necesario pa regula e actividadnan a keda atras, mientras cu e preocupacionnan ambiental y e actividad turistico a sigui.

Minister Herde a señala cu turismo recreativo cu UTV y ATV ta un actividad popular y importante pa un parti di e sector turistico di Aruba. Sinembargo, e impacto riba naturalesa y comunidad no por keda sin ser atendi.

E meta di gobierno, el a enfatisa, ta pa busca un modelo cu ta permiti actividad recreativo den areanan adecua, mientras cu e areanan natural mas sensitivo ta keda protegi.

Pa esaki, gobierno a cuminsa un proceso di dialogo cu diferente grupo. E reunionnan a inclui tour operators, tour guides, piscadonan, ACF, ABC, representantenan di sector priva y departamento di gobierno.

Minister Herde a indica cu e prome reunionnan tabata enfoca riba scucha e preocupacionnan di cada grupo y comprende nan posicion. Despues, e dialogo a pasa pa e posibilidad di imagina un scenario den cual proteccion di naturalesa y turismo recreativo por co-existi bao di condicionnan specifico.

E proceso a tuma varios siman y a inclui reunionnan cu diferente stakeholder pa scucha nan opinion y e necesidadnan di e sector.

Como resultado di e dialogo, gobierno y departamentonan involucra a prepara un prome propuesta riba papel. E documento ta inclui rutanan sugeri y diferente condicion cu lo por aplica pa e uzo di UTV y ATV.

Minister Herde a splica cu entre e puntonan cu ta ser considera tin e ruta exacto cu e vehiculonan por sigui, e periodo di aña durante cual nan por opera, e oranan permiti, e velocidad, e cantidad di vehiculo y medidanan di supervision.

E propuesta ta contempla tambe un sistema di geofencing, cu ta permiti pa instala un aparato GPS riba e vehiculonan. E sistema lo limita e circulacion na rutanan previamente defini. Ora un vehiculo sali di e ruta permiti, e sistema por activa un mecanismo pa stop e vehiculo.

Minister Herde a indica cu e medidanan aki ta parti di e intento pa traha un plan cu ta mas estricto y cu por ser controla efectivamente.

E propuesta ta contempla tambe e posibilidad di limita e actividadnan na cierto temporada di aña, na luga di permiti nan durante henter aña. E condicionnan por inclui control di velocidad, reduccion di stof y zonido, y supervision pa garantisa cu e vehiculonan no ta drenta den areanan cu ta proteha.

E plan ta inclui diferente ruta cu departamento di gobierno a identifica manera posibilidad. E ruta tras di California Lighthouse y e area di Tera Cora ta parti di e discusion, mientras cu otro ruta tambe ta ser considera pa duna e sector alternativa.

Segun minister Herde, e documento ta busca pa defini cu mas precision unda e vehiculonan por pasa, bao di ki condicion y ken ta responsabel pa e control.

E mandatario a indica cu e plan no ta enfoca solamente riba e interes di e sector turistico, sino tambe riba e necesidad di habitante y piscadonan pa tin acceso na e areanan costal.

Piscadonan tin necesidad di por yega na costa noord pa practica nan actividad. E uzo di camindanan pa habitante cu kier pasa tempo den e area tambe ta un aspecto cu mester ser considera.

E meta ta pa evita cu un medida pa proteha naturalesa ta crea obstaculo innecesario pa comunidad. Gobierno ta busca un modelo cu por mantene acceso pa actividadnan cu ta compatibel cu e proteccion di e area.

Alabes, minister Herde a reconoce cu e actividadnan di UTV y ATV ta genera molester pa cierto habitante. E kehonan ta inclui zonido, stof y e manera cu e vehiculonan ta circula den grupo.

E propuesta ta busca pa atende cu e diferente preocupacionnan sin elimina automaticamente tur posibilidad di turismo recreativo motorisa.

E prome documento a ser comparti cu e diferente stakeholdernan pa nan por revisa e contenido y duna reaccion. Gobierno a indica cu e plan mester pasa ainda pa un siguiente fase di dialogo, cu e intencion di incorpora e observacionnan di e stakeholdernan y busca un acuerdo mas amplio.

E documento a ser manda tambe na Aruba Birdlife Conservation, cu a ricibi un invitacion pa participa den un siguiente reunion. E reunion ainda no a tuma luga na e momento cu minister Herde a duna e entrevista.

Gobierno ta sigui traha riba e documento y ta spera pa bolbe sinta cu e diferente partidonan. E plan ta den proceso di ahuste, teniendo na cuenta cu e reaccionnan cu a ser ricibi. E intencion ta pa presenta un version mas completo cu ta defini ruta, condicionnan, e periodo di operacion y e responsabilidadnan di e diferente instancianan.

Gobierno ta considera importante pa e siguiente reunionnan inclui tur grupo cu ta directamente envolvi, pa e solucion no keda limita na un acuerdo entre solamente dos partido.

E caso legal ta pone presion riba e proceso di dialogo, pasobra e diferente partidonan mester avansa cu e buskeda di un solucion. Segun minister Herde, e meta ta pa yega na un siguiente etapa di e dialogo prome cu e prome siman di november.

E intencion ta pa presenta e plan ahusta y sigui e combersacion cu e diferente stakeholdernan, incluyendo Aruba Birdlife Conservation, pa evalua si e propuesta por forma un base pa un acuerdo.

Minister Herde a indica cu e ta mira e proceso cu optimismo, aunke e ta reconoce cu e solucion no ta simpel. E interesnan ta diferente y e plan mester atende cu e preocupacionnan ambiental, economico y social di forma responsabel.

E proceso ta busca pa pasa di un situacion di conflicto pa un modelo di maneho cu ta cla y cu por ser ehecuta. E propuesta ta inclui instrumento di control y condicionnan cu lo por reduci e impacto di e vehiculonan, mientras cu e sector turistico por sigui opera den areanan cu ta ser considera adecua.

E resultado final ainda no ta determina. E siguiente fase di dialogo y e revision di e documento lo indica si e diferente partidonan por yega na un acuerdo riba e condicionnan pa uzo di UTV y ATV na e costa noord.

Gobierno ta considera cu e solucion mester tene cuenta cu naturalesa, turismo y comunidad. E meta ta pa busca un balansa cu por dura, cu regla cla pa e sector y cu proteccion efectivo pa e areanan natural di Aruba.