(AFP)—Legisladornan Democrata a haci un yamado dialuna, ocho dia prome cu eleccion di mitar termino na Merca, pa apunta un conseho special pa investiga Presidente Donald Trump su conexion na delincuente sexual condena Jeffrey Epstein.
Den un rapport di 53 pagina, Democratanan riba e House Judiciary Committee a rebiba acusacionnan di mal conducta sexual haci contra Republicano Trump, ken tabata amigo di e financier condena.
Epstein a muri den costudia federal na 2019 mientras e tabata wardando huicio riba cargonan di traficacion di sexo envolviendo menornan di edad den loke a determina tabata un suicidio.
Trump a lucha pa varios luna pa preveni Department of Justice (DOJ) libera e yamado “Epstein Files” pero eventualmente a firma un ley pasa den Congreso rekeriendo publicacion di e rapport. E presidente su nomber ta aparece repetidamente den e documento pero e ta nenga cualkier mal hecho y no a ser acusa di ningun ofensa criminal conecta na e asunto.
Representante Jamie Raskin, e Democrata mas halto riba House Judiciary Committee, a acusa e departamento di husticia di tapa “crimennan pa protege e presidente.”
“Cinco muher a acusa Trump directamente di abuso y agresion sexual den compania of presencia di Epstein”, Raskin a bisa. E Democrata a haci yamado pa Abogado General Todd Blanche apunta un conseho special independiente pa investiga Trump su conexion na Epstein.
“A lo minimo, esfuersonan di DOJ y FBI pa protege Trump en bes di persigui husticia ta rekeri apuntamento di un conseho special independiente”, nan a bisa.
“Esaki ta un conseho special cu mester tin e tarea di investiga no solamente e presidente…pero tur Epstein su posibel complice y co-conspiradornan.”
Democratanan di House a reconoce, sinembargo, cu DOJ bao Blanche, ken ta Trump su ex-abogado personal, no tabata probabel di “tuma ni e stap minimo aki.”
“Determina pa protege e presidente cueste lo que cueste, DOJ mes awor ta liderando e tapamento di Epstein su operacion di trafico di sexo”, nan a bisa.
Director di comunicacion pa Cas Blanco Steven Cheung a denuncia e rapport den un publicacion riba X, yamando e “mentira completo.”
“Esaki ta loke media y Democratanan ta haci net prome cu tur ciclo electoral—fomenta mentira y acusacionnan ridiculo contra e presidente pa ganashi politico”, Cheung a bisa.
“Pueblo Mericano ta mira door di e payasada aki.”
Net prome cu eleccion dia 3 di november cual lo dicidi ken ta controla Congreso, Democratanan a gasta mas cu 35 miyon riba avisonan relaciona cu Epstein.
