Na september, Aruba Conservation Foundation (ACF) a entrega un carta oficial na gobierno di Aruba den cual a expresa preocupacion tocante e plan di Iberostar pa construi un hotel den area di Arashi. E organisacion ambiental a haci nan posicion cla riba e asunto, declarando cu nan ta contra di cualkier construccion y operacion di un hotel nobo eynan. Bon Dia Aruba recien a obtene e carta di preocupacion di ACF.

Den e carta a elabora extensivamente riba e dañonan cu por anticipa a causa di construccion masal, ademas di con e proyecto aki ta den violacion di varios ley local y internacional. Pa e motibonan menciona den e carta, ACF ta spera cu gobierno lo actua responsablemente pa protege herencia cultural y natural di Aruba, como tambe exigi cumplimento cu leynan di zonificacion y naturalesa di e isla.

Violando varios ley y politica

ROPV
 ACF ta remarca den su carta cu e desaroyo proponi ta bay directamente contra di leynan nacional di conservacion, obligacionnan internacional y ta viola rednan legal cu ta inclui e marco pa planificacion espacial riba Aruba.

Segun e fundacion, e proyecto ta bay directamente contra di loke ley di ROPv ta permiti. Pa prome, e sitio lo toca e frontera di e ‘buffer zone’ di Malmok. Esaki ta viola Articulo 17.2.11 cu ta stipula cu “no mag di construi edificionan nobo pa unidadnan di hospedahe recreativo nobo” dentro di sub-zona di Malmok.

E proyecto tambe ta viola e limite di unidadnan stayover den e area, cual segun Articulo 22.2.5 sub a, ta 991 unidad maximo.

Na tercer luga, e sitio ta coincidi cu e area turistico di Westkust, y segun Articulo 22.2.4, e ta limite haltura di edificionan construi na 8.5 maximo y un total di 2 piso maximo. Articulo 22.2.5 (b y c) ta prohibi construccion di fundeshi structural nobo pa minorista, restaurant of barnan.

Bao regulacion di ROPv relaciona cu areanan designa como ‘woongebied met waarden’, actividadnan espacial cerca di paisahenan protegi tambe ta prohibi di causa daño na activonan natural. ACF ta considera e proyecto di Iberostar di tin potencial pa causa daño indesea.

Naturalesa
ACF tambe ta nota violacion di leynan local di naturalesa, incluyendo e Natuurbeschermingsverordening—cu ta prohibi destruccion, modificacion of rosamento di flora natural dentro di areanan protegi—y e Landsbesluit Bescherming Inheemse Flora & Fauna cu ta stipula cu construccion den e buffer zone aki lo trece menasa na especienan di flora y fauna nativo y protegi di Aruba.

Banda di leynan local, e proyecto tambe ta contradeci Aruba su compromisonan cu tratadonan internacional pa cu proteccion di naturalesa, segun e NGO ta subraya. Regionalmente, Aruba a firma e SPAW Protocol pa preveni cualkier desaroyo comercial cu ta trece zonanan di preservacion di especie den peliger. Aruba tambe ta obliga pa adheri na e convencion di Ramsar, cu ta bisa cu gobierno di Aruba mester mantene preservacion ecologico y “uzo consciente” di wetlands globalmente designa, incluyendo esunnan di Aruba.

Politicanan di sostenibilidad
Banda di viola ley, ACF ta nota cu e proyecto destina pa bisindario di Arashi tambe no ta den cuadra cu marconan nacional pa percura crecemento sostenibel na Aruba. E organisacion ta referi na e National Biodiversity Strategy and Action Plan (NBSAP) 2024-2030 di Aruba cu ta guia con pa maneha, protege y restaura biodiversidad di Aruba mientras integra conservacion den planificacion nacional.

Tambe mester a resalta e falta di integracion di politica nacional “Build with Nature.” Segun ACF ta splica, e plannan structural di e desaroyador no ta mustra ningun mecanismo pa engrandece biodiversidad natural of contribui na resiliencia climatico riba e isla.

Dañonan anticipa

ACF ta adverti cu construccion di e scala aki por tin impacto grave y ireversibel cu por afecta diferente sistemanan interconecta den e area.

Segun e NGO, Arashi Beach caba ta un sitio sobrecarga cu ta menasa su “caracter ecologico”. Introduccion di trabao di construccion pisa lo añadi na e fragmentacion di habitat, degradacion di vegetacion y strobacion di bida salvahe.

Construccion y mantencion duradero di e hotel lo trece contaminacion hidrologico y exceso den awa libera. Por ehempel, uzo di fertilisante kimico na Tierra del Sol caba ta presenta un sobrecarga di nutriente kimico di e tera. Esaki por ta peligroso pa santuarionan marino den e zona, ya cu e ta invita crecemento di alga toxico. E proyecto cerca di Arashi Beach lo aumenta e menasa aki y lo pone mas presion riba e ambiente acuatico. Construccion pisa tambe por cambia e structura di tera, cual naturalmente ta funciona como un rooi cu ta permiti fluho di awa di yobida. Daño na e structura natural aki por causa sedimento severo durante yobida fuerte, resultando den degradacion di ecosistemanan marino. Trabao sistematico tambe por stroba con e tera ta absorba awa di yobida, resultando den erosion di e tera y causando cu sedimento por core bay den saliñanan y stroba bida marino.

Aplicacion di cement, construccion di cura of otro structura por stroba tambe e ruta biologico di nos flora y fauna. Por ehempel, infrastructura nobo den e area por stroba migracion di bida salvahe manera nos cangreu blauw (Cardisoma guanhumi).

Ademas tin e menasa di contaminacion di luz, aire y zonido, cual ta specialmente peligroso pa nabegacion sensorial di varios animal, incluyendo e driekiel, caret y cawama cu ta conoci di uza Arashi Beach como sitio pa traha neishi. Otro especienan vulnerabel ta e shoco, coneu, cododo y tambe cadushinan nativo manera e breba, tuna y bushi, entre otro.

No por keda sin menciona e consecuencianan pa Arashi Beach mes. Segun ACF ta adverti, aumento den bishitante ta pone mas presion riba e beach, stimulando medidanan pa cumpli cu demanda di bishitante (por medio di pone mas palapa, stoel, bari di sushi etc.). Medidanan continuo asina por stroba salud y funcion natural di e beach, resultando den erosion di costa y destabilisando e sedimento den lama. Actividadnan recreacional, manera kite surfing y jet ski, tambe lo aumenta, treciendo peliger na parhanan migratorio, turtuga y otro especie den e area.

Recomendacion pa gobierno

Considerando e menasanan, ACF a duna par recomendacion na gobierno pa mitiga daño na naturalesa den e area. Entre otro, a conseha gobierno pa duna ordo di paro inmediatamente pa cualkier trabao di construccion cu ta tuma luga den e buffer zona di rooinan mapa. Tambe mester reforsa liña di guia pa construccion y mester establece limitenan estricto riba contaminacion.

ACF ta urgi gobierno pa exigi e desaroyador prueba cu en berdad lo no tin impacto riba e area protegi cerca di Arashi. Tambe mester entrega rapport di evaluacion pa Directie Natuur en Milieu (DNM).

E organisacion ambiental a pidi gobierno explicitamente pa entrega su carta den file di corte.

For di aña 2017 caba, rumornan tabata circula cu Arashi lo mira construccion di un otro hotel. E tempo ey, Bon Dia Aruba a acerca Departamento di Infrastructura & Planificacion (DIP) pa confirmacion, pero e instancia a informa nos cu no tabatin informacion tocante esaki. Ex-parlamentario Desiree Croes (AVP) tambe a rechasa rumornan, bisando: “Esaki no ta berdad. Please guys, stop di comparti mentira. Nos a tuma nota tambe cu Juan David Yrausquin a reacciona riba e noticia aki bisando cu e ta fake news.”

Durante e ultimo tres añanan, e rumornan a surgi atrobe online, unda varios ciudadano a expresa nan preocupacion y indignacion pa cu e proyecto. E aña aki, durante un conferencia marcando e prome aniversario di JOIA Aruba by Iberostar, gerencia a clarifica cu e hotel no lo ser construi riba Arashi Beach, sino den e tereno existente di Tierra del Sol y lo ta accesibel via entrada principal di e residencia. Asina mes, disgusto pa e proyecto no a baha y activistanan a keda critico di e plan anticipa.