(AFP) – Iran a adverti diadomingo cu cualkier guera renoba cu Merca lo por dura mas largo cu e ronda anterior di combate, despues cu presidente Donald Trump a bisa cu e ainda mester “atende” mas obhetivo.
Esfuersonan diplomatico pa caba cu e guera di Medio Oriente ta marca pa menasa ripiti di Merca y Israel pa reanuda bombardeo mientras nan ta tene eleccionnan crucial.
“Un potencial guera futuro por dura mas largo cu conflicto anterior, y e presidente Mericano no lo ta den posicion pa dicta e tempo of condicion di su conclusion,” segun vocero di ehercito, Mohammad Akraminia, segun television estatal Irani.
Den e fase mas intenso di e guera, cu a cuminsa dia 28 di februari cu atake di Merca y Israel contra Iran, Teheran a tuma represalia cu atake cu misil y drone na e region. Gruponan arma alinea cu Iran a join e bataya na Libanon y Yemen.
Comentarionan di Akraninia a sigui e sugerencia di Trump cu Merca por ataca rapidamente e resto di su obhetivonan na Iran.
“Ainda nos mester atende di, ami lo bisa, un of dos sitio, pero nos por haci esey den 10 minuut,” Trump a bisa reporteronan. “Probablemente bo por mira Pickaxe Mountain, y bo mester atende esey. Nos por haci esey hopi lihe,” el a agrega, referiendo na un compleho nuclear sospecha bao tera.
Medionan Mericano a reporta cu Trump a tene un yamada cu prome minister Israeli, Benjamin Netanyahu diasabra tocante ki momento lo aumenta operacion di combate contra Iran.
Axios a cita un oficial Mericano y un Israeli bisando cu e dos lider a discuti e estado di negociacion cu e republica Islamico, cu Netanyahu presionando e presidente pa ataca Iran inmediatamente despues di eleccion midterm na Merca, y Trump buscando pa laga negociacion cana su caminda.
E fuente Israeli a describi e yamada como “fuerte”, mientras e fuente Mericano a bisa cu e tabata “directo”, segun Axios.
‘No tin limitacion geografico’
Oficialnan top militar na Iran a adverti contra cualkier atake nobo.
Vocero di Guardia Revolucionario, Hossein Mohebbi diadomingo a echo un advertencia duna un dia prome den un mensahe por escrito di lider supremo nobo di Iran, Ayatollah Mojtaba Khamenei.
“Den un conflicto cu Merca, no tin limitacion geografico; un teatro amplio a keda defini pa infringi daño riba e enemigo,” Mohebbi a bisa, segun television estatal.
Minister di Exterior, Abbas Araghchi a bisa cu “nos ta spera e otro banda ta bay eherce racionalidad y scoge diplomacia,” agregando cu Iran “ta keda prepara pa tanto defensa como diplomacia,” segun noticiero oficial IRNA.
E advertencianan ta yega mientras hefe di seguridad Irani, Mohsen Rezaei a revela diasabra cu el a ricibi un carta di vice-presidente Mericano, JD Vance, buscando pa reanuda combersacion.
Rezaei a nota loke el a describi como un cambio positivo den e “tono” di e banda Mericano, pero a bisa cu ainda e no a responde. El a bisa cu Teheran anteriormente a bisa Washington cu si no cumpli cu su condicionnan, “ni lo habri Estrecho di Hormuz back ni lo tin ningun negociacion.”
E condicionnan ey ta inclui libera activo Irani den exterior, caba cu e blokeo naval Mericano di wafnan Irani, elimina sancionnan di hopi tempo, y caba e guera na tur frente.
Desde cu e guera a cuminsa, Iran a tuma control di Estrecho di Hormuz, un via vital pa energia global, y ripitidamente a ataca barconan purbando di crusa sin su autorisacion. Merca a impone un contrablokeo naval riba wafnan Irani.
‘Prepara pa lo pio’
Anwar Gargash, consehero diplomatico di presidente Emirati, a bisa diadomingo cu Emirato Arabe Uni tabata spera cu e intercambionan lo produci un avance, pero tabata preparando pa lo pio.
“Nos ta spera cu tin un avance diplomatico,” el a bisa un conferencia na Manama. “No ta den interes di e region pa bay den otro ronda… Pero mi ta kere nos tambe, nos a mustra antes, ta prepara pa lo pio.”
Na Teheran, algun residente a describi un sentido di impotencia mientras menasa di combate renoba ta aumenta. “E noticia saliendo ta realmente preocupante. Sinembargo… no tin nada mi por haci,” Mohadese, un inspector di salud di 27 aña di edad, a bisa AFP.
Otronan, incluyendo un bendedor di 48 aña, Ebrahim, no tabata preocupa. “Nos no tin miedo di otro guera; nos ta den guera pa 48 aña caba – nos semper tabata den guera,” el a bisa.
