E “wrakingsverzoek” presenta pa Chania Fernandes Pedra contra e hues encarga cu tratamento di su caso penal a ser rechasa diabierna mainta door di tres hues.
E peticion tabata basa riba preocupacion tocante imparcialidad di e proceso, pero segun Corte, e argumentonan presenta no ta suficiente pa hustifica cambio di hues. Cu e decision aki, e caso penal relaciona cu e accidente fatal na brug di Renaissance, den cual dos persona a perde nan bida, lo sigui dia 18 di november.
E audiencia publico a tuma luga despues cu Fernandes Pedra a presenta su peticion diaranson 4 di november 2026. E acusado ta involucra den e caso penal relaciona cu e accidente di trafico fatal cu a sucede dia 4 di januari di e aña aki, na altura di brug di Renaissance.
Durante tratamento di e caso, Fernandes Pedra a expresa falta di confiansa den imparcialidad di e hues cu ta dirigi e proceso. Esaki a resulta den un wrakingsverzoek, un procedimento hudicial mediante cual un acusado por pidi pa un hues ser reemplasa si tin circumstancianan cu por pone su imparcialidad den duda.
Pa evalua e peticion, un camara di tres hues a reuni diabierna mainta. Durante e audiencia, abogado Jairon Odor a presenta e argumentonan na nomber di Fernandes Pedra. E abogado a representa e acusado solamente durante e procedimento specifico di diabierna mainta.
Prome cu e audiencia mes a cuminsa e abogado a pidi huesnan permiso pa asina lesa e peticion di e acusado. El a splica cu apenas e anochi prome el a ser contacta pa representa Fernandes Pedra den e procedimento aki y e mainta prome cu e aduiencia a cuminsa el a reuni cu e acusado.A pesar di e tempo limita, el a presenta diferente punto cu, segun e posicion di su cliente, tabata relevante pa cuestiona e manera cu e proceso penal ta wordo conduci.
Un di e puntonan principal tabata relaciona cu peticionnan pa haci investigacion adicional den e caso. E defensa a expresa desacuerdo cu e manera cu cierto solicitudnan a ser trata durante e procedimento penal.
Sinembargo, e tres huesnan a determina cu un procedimento di wraking no ta e instancia apropiado pa evalua solicitudnan di investigacion adicional. Segun Corte, e tipo di peticionnan aki mester ser presenta y trata den e proceso penal regular, unda e hues encarga cu e caso tin competencia pa tuma decision riba nan.
Otro punto cu a bin dilanti durante e audiencia tabata e derecho di e acusado na un abogado y acceso na e dossier penal. Defensa a menciona preocupacion tocante posibilidad di Fernandes Pedra pa dispone di un abogado y consulta e documentonan relevante pa su caso.
Corte a reconoce cu un acusado tin derecho na un abogado y acceso na su dossier penal. No obstante, e huesnan a señala cu e argumentonan aki no tabata forma parti di e peticion original di wraking entrega dia 4 di november. Pa e motibo ey, nan no por a forma base pa acepta e solicitud den e procedimento actual.
Durante su splicacion, Corte tambe a pone enfasis riba e momento cu un peticion di wraking mester ser presenta. Segun e huesnan, ora un acusado considera cu un circumstancia ta pone imparcialidad di un hues na duda, e mester actua na momento cu e situacion surgi.
E procedimento no ta destina pa acumula diferente desacuerdo of incidente durante un periodo prolonga y despues presenta nan hunto como fundamento pa solicita cambio di hues. E huesnan a bisa Fernandes Pedra mester a entrega e wrakingsverzoek prome cu dia 4 di november si ya caba e tabatin duda di e imparcialidad di e hues.
Despues di scucha e argumentonan, e tres huesnan a retira pa delibera. Despues di alrededor di 10 minuur nan a bin back den sala y a anuncia cu e peticion di wraking a ser rechasa.
Como consecuencia di e decision, no lo tin cambio di hues basa riba e peticion aki y e tratamento di e caso penal contra Fernandes Pedra por continua. E proximo audiencia ta programa pa dia 18 di november, ora Corte lo sigui cu e tratamento di e caso relaciona cu e accidente fatal di januari.
