(AFP) – Thomas Markle, tata di esposa di prins Harry, Meghan Markle, cu kende e no tin contacto, a keda aresta na Florida ayera, pa motibo di presunto posesion di imagen di abuso sexual di mucha, oficialnan a bisa.

Markle, 82, ta acusa di un cargo di “posesion di pornografia infantil” y ta programa pa un presentacion inicial den corte na Tampa diabierna, fiscal federal Bill Essayli a bisa den un declaracion.

“Sr. Markle ta acusa di posesion di material di abuso sexual di mucha, incluyendo potret cu ta mustr’e cu mucha muhe menor di edad,” Essayli a bisa. “E acusacionnan aki ta extremadamente serio, y nos ta bay persigui Sr. Markle cu tur forsa permiti pa ley federal.”

Agentenan di FBI a hiba Markle den custodia diabierna trempan na e cas di pensionado unda e ta biba na Lakeland, Florida.

Departamento di Husticia Mericano a bisa cu Markle “tabatin material di abuso sexual di mucha (CSAM), incluyendo potret explicito di su mes cu mucha muhe prepubescente, na dos unidad di almacenahe den area di Los Angeles cu el a huur pa casi dos decada.”

“Den e unidadnan, agentenan a confisca aproximadamente 78 articulo, incluyendo slides, negativo di potret, y buki cu tabata contene CSAM,” a bisa.

Markle por enfrenta hasta 20 aña den prison si e keda condena di posesion di material di abuso sexual di mucha.

Potret di abuso sexual di mucha tambe presuntamente a ser haya den e cas anterior di Markle na Filipinas, y na un unidad di almacenahe cu e tabata huur na Mexico.

Tabloide Britanico, The Sun a reporta luna pasa cu yiu homber di Markle, Thomas Markle Jr., a descubri e imagennan di abuso sexual di mucha mientras e tabata pasa door di cahanan haya den e cas anterior di su tata na Filipinas.

Markle tabata biba na Cebu, Filipinas, prome cu bolbe Merca e aña aki.

Meghan Markle a bisa luna pasa cu e tabata “profundamente perturba” pa acusacionnan cu su tata tabata den posesion di imagen di abuso sexual di mucha. El a bisa cu el a blokea contacto cune y su yiunan tocante acusacionnan “preocupante y perturbador” anterior.

Harry, di dos yiu di Rey Charles III y ruman di heredero na trono, Prins William, cu kende e no tin contacto, a casa cu Meghan, un actriz Mericano, na Windsor Castle na mei 2018.

E pareha a bandona Reino Uni y a retira di nan deber real na 2020, pero a haci un regreso inespera cu nan dos yiu pa biba na Inglatera na augustus.