(AFP) – Hefe di Nvidia, Jensen Huang, ta para den centro di boom di inteligencia artificial, y e Scandal di espionahe cu a sali na fin di siman ta menasa cu sacudi compania na un momento cu confiansa den ola di inversion den AI ya ta fragil.
Huang, cu a nace na Taiwan, ta ser mira como un di e figuranan principal tras di economia di AI, e ehecutivo cu casi tur actor den industria mester conta cu dje pasobra e tecnologia ta depende di graphics processing units (GPU) cu su compania ta diseña.
E chipnan ey a haci Nvidia un di e dos companianan cu mas balor den mundo, hunto cu Apple.
GPU ta scars, y e ehecutivonan y companianan tecnologico mas poderoso ta depende di Huang pa mantene suministro na centronan di data cu ta ehecuta modelonan tras di ChatGPT di OpenAI y Claude di Anthropic.
Huang tambe a inverti gran parti di ganashi extraordinario di Nvidia den startup y laboratorionan di AI cu, na nan turno, ta gasta e placa riba chipnan di Nvidia. E tipo di relacion circular aki por haci cu cualke problema na Nvidia plama den henter industria.
“Nvidia sin Jensen — mi no sa cuanto esey lo bal. Nvidia ta Jensen Huang,” Stephen Witt, autor di un buki tocante Huang y Nvidia, a bisa CNBC.
E scandal tocante relacion di Huang cu un hende muhe Chines cu ta sospecha di spionahe ta bin algun dia prome cu IPO spera di Anthropic, un oferta riba Wall Street cu ta ser mira como un prueba importante pa un industria bao presion mientras inversionistanan ta mustra mas cautela tocante historia di AI.
E cautela ey a aumenta despues di eleccionnan Mericano di siman pasa, unda votadornan a mustra rabia contra AI, miljardarionan tecnologico y data centernan unda chipnan di Nvidia ta ser usa.
“Ireemplasabel”
Figuranan di Silicon Valley a sali na defensa di Huang.
Shaun Maguire, socio na Sequoia Capital, a skirbi riba X cu Huang “a haci algo increiblemente bobo” cu “tabata malo pa Merca”, pero a bisa cu e no ta kere cu tabatin mala intencion y cu Huang ta “ireemplasabel pa liderazgo Mericano den AI”.
“Mi simplemente no ta kere cu e lo haci algo conscientemente cu ta pone Merca of Nvidia den desventaha,” inversionista Gavin Baker, kende conoce Huang pa casi 30 aña, a bisa.
Otro inversionistanan tabata menos sigur cu Huang lo sobrevivi investigacion inicia pa hunta directivo di Nvidia.
“Mi ta duda cu Jensen Huang lo por keda como CEO di Nvidia,” Gary Black di Future Fund, cu tin Nvidia entre su inversionnan mas grandi, a skirbi.
El a agrega cu Huang no tin “un sucesor natural den compania”.
“Huntanan directiva ta institucionnan cu ta evita riesgo, forma pa personanan cu ta preocupa constantemente cu nan por ser demanda,” el a bisa.
Dan Ives di Yorkville Ives & Co a yama e situacion “un momento cu ta laga un marca malo” pa Huang y a bisa cu hefe di Nvidia ta “DNA central di Nvidia”.
“Jensen no ta remplasabel,” Ives a bisa, agregando cu e ta spera cu Huang keda CEO na corto plaso, pero cu conclusionnan di hunta ainda por conduci na su salida.
