(Infobae) – Partido y lidernan cu tabata distancia for di otro awo ta participa atrobe den actividadnan riba caya, mientras ganador di Premio Nobel di Paz a compromete su mes pa construi un “gran acuerdo nacional” pa amplia su base di sosten.

Aunke nan ta comparti color blauw, te recientemente nan tononan politico tabata hopi diferente.

Sinembargo, e “momento politico nobo” y regreso di Maria Corina Machado a haci posibel algo cu algun luna pasa tabata parse dificil: banderanan blauw di partidonan Vente Venezuela y Un Nuevo Tiempo (UNT), di Machado y Manuel Rosales respectivamente, a pasa pa diferente area di Caracas e fin di siman aki yamando pa unidad entre forsanan democratico di pais.

“Den fondo nos ta mescos, cu algun diferencia,” Carlos Valero, lider di UNT, a reconoce.

Na 2025, UNT a keda pafo di Platafoma Unitaria Democratica despues cu e no a sigui direccion di e ganador di Premio Nobel di Paz, kende a yama pa boycott di eleccionnan parlamentario y regional di e aña ey como medida di protesta contra e fraude denuncia den eleccion presidencial di 28 di juli 2024.

Tur cos a cambia despues di 3 di januari 2026, ora forsanan special Mericano a captura Nicolás Maduro y su esposa Cilia Flores na Caracas.

Delcy Rodriguez a asumi presidencia di Republica y panorama politico a cambia completamente, habriendo posibilidad pa un transicion democratico lidera pa Washington.

Valero ta bisa cu, dilanti di e realidad aki, UNT a redefini su posicion politico bao e siguiente lineanan: sostene e plan di tres fase promove pa Departamento di Estado pa transicion y e mesa di negociacion entre regimen Chavista y oposicion; traha pa “reconstruccion” di Platafoma Unitaria; y “sostene e liderato cu mayoria di pais ta reclama, cu awe ta Maria Corina Machado.”

Construi brug

Machado a yama un manifestacion dia 22 di october den centro di Caracas pa celebra di tres aniversario di e eleccion primario cu a pone e como figura principal di oposicion Venezolano.

Militantenan di Union y Cambio (Unica), un partido forma pa Henrique Capriles Radonski na 2025 despues cu e a kibra cu Primero Justicia y cu politica promove pa Machado, a participa den e actividad ey.

Desafiando strategia di Machado y Platafoma Unitaria Democratica, UNT y Unica a participa den eleccionnan parlamentario disputa di 2025, obteniendo solamente alrededor di dies asiento di un total di 285 diputado.

Laga atras su historia largo di desacuerdonan, Capriles Radonski a expresa cu e lo vota pa ganador di Premio Nobel di Paz den un eleccion presidencial, reconociendo asina cu actualmente ningun otro figura ta opaca e liderato ey.

“Mi ta kere cu tur loke a pasa den pais necesariamente a conduci na un reconfiguracion di relacionnan entre oposicion,” Ángel Medina, lider di Unica, a splica.

E ta enfatisa necesidad pa “crea un espacio pa dialogo” den alternativa democratico.

Medina a menciona un serie di hecho cu segun dje ta dificil pa nenga: “Merca a dicidi fortalece su relacion cu Delcy Rodriguez na costo di distancia su relacion cu oposicion. Pa henter proceso di negociacion, tene un fraccion hopi chikito ta limita capacidad y influencia den Parlamento, cu ta funcionando como canal institucional pa cambionan. Y ta un realidad cu Machado ta lidera scenario politico awe.”

“Tur esaki mester conduci na pensa relacionnan di nobo, construi brug y busca unda coincidencianan ta,” vocero di Unica a bisa.

E tambe a admiti cu e proceso aki “no ta un baile di amor”; tin biaha e ta complica, carga cu hopi prehuicio y tambe cu un historia desagradabel di atake entre e bandanan.

Despues di completa su regreso na Venezuela, Machado a compromete su mes pa construi un “gran acuerdo nacional” y amplia su base di sosten door di incorpora mas partido.

Mientras nan ta spera accionnan concreto di e liderato, riba cayanan di Venezuela diferente tononan politico di oposicion ya ta cuminsa busca un forma nobo pa traha hunto.