(AFP) – Un huurdo rabia a mata administrador di su edificio cu arma di candela y a herida cuatro otro persona den un bario exclusivo na Washington diahuebs, prome cu el a kita su propio bida, segun polis.
E tiramento, cu a tuma luga mas o menos un miya pa nort di Cas Blanco, a provoca un mobilisacion grandi di polis den capital Mericano, cu decenas di vehiculo policial a core bay na e sitio y helicopter di polis tabata bula rond di e area.
Jeffery Carroll, hefe interino di polis di Washington, a declara na periodistanan cu e agresor, identifica como Matt Lambert, di 55 aña, tabata envolvi den un disputa continuo tocante mantenemento cu asociacion di propietarionan di e compleho di apartamento unda e tabata doño di un apartamento.
Lambert, un dokter specialisa den medicina di emergencia, a mata administrador di e edificio cu arma di candela den un gym conecta na e compleho, situa den bario Logan Circle. Despues el a cera su mes aden di su apartamento na di siete piso, segun Carroll.
Despues el a cuminsa tira for di su balcon riba personanan abou, heridando cuatro persona. Un di e personanan herida tabata den condicion critico, mientras cu e otro tres no tabatin heridanan cu ta pone nan bida na peliger.
Lambert a tira por lo menos dos biaha riba polis door di porta di su apartamento, prome cu el a tira riba su mes, Carroll a declara. A declara su morto na e sitio.
Carroll a declara cu Lambert a inicia accion legal contra asociacion di propietarionan di e compleho di apartamento unda e tabata biba, debi na loke e tabata considera falta di mantenemento di e edificio.
Un cuenta riba X cu segun informacion ta relaciona cu Lambert, cu nomber @OfMiceandMold, ta contene un serie largo di kehonan tocante beskem y daño causa pa awa. E ultimo publicacion, describi como un “manifesto”, ta un informe di ingenieria cu ta detaya problemanan cu su apartamento.
Alcalde di Washington, Muriel Bowser, a condena loke el a describi como un “acto di violencia cu arma di candela sin sentido”.
E tiramento a tuma luga durante e oranan ocupa di trafico den mainta, causando congestion mientras cu polis a cera cayanan rond di e area y a evacua residentenan.
Corant The Washington Sun a cita un miembro di gym VIDA Fitness, kende a declara cu e tabata riba un mashin di cana den e gym ora e tiramento a cuminsa.
Michael Carney a declara cu el a tende un zonido manera un tiro y despues a mira un persona riba vloer di e gym cu a ser tira den cabes.
“Practicamente tur hende tabata scondiendo tras di pochinan di mata y otro cosnan”, Carney a declara na The Sun.
Bario Logan Circle ta un di e barionan mas caro di Washington y ta conoci pa su restaurantnan elegante y luganan di entretenimento nocturno. E bario tambe ta situa na tiki distancia di un area cu tin hopi embahada di paisnan stranhero.
