Den nos anterior Editorial a trata e papel cu gobierno tin den garantiza un prensa local viable y independiente, algo sumamente importante den e temponan turbulento aki. No ta e unico lugar unda gobernacion mester asumi un papel di garante di trabao efectivo pa mantene un sistema gubernamental eficaz, transparente y integro. Esaki a pesar di, y hustamente pa sobrepasa e limitacionnan cu nos tamaño como pais ta impone. Casonan asina, unda nos tamaño como pais ta traha contra nos, ta sigur cierto tarea gubernamental cu ta indispensable, pero caro pa logra y mantene. Un ehemplo ta nos organonan institui pa Constitucion, manera Raad van Advies (RvA) y Algemene Rekenkamer (ARA). E obligacion pa duna e organonan aki tur loke nan mester pa opera adecuadamente ta algo cu realmente no mester di discusion, pero nos practica durante e 40 aña di gobernacion autonomo a mustra nos un experiencia diferente. Pa e edicion aki nos ta concentra riba nos contraloria general (ARA), tambe pasobra recientemente e organo a anuncia nan intencion di amplia nan capacidad di operacion, incluyendo no solamente e tarea di controla e cuentanan anual di gobierno, sino tambe haci investigacion pa mehora transparencia y contribui na un administracion publico mas responsable. Esaki por zona manera algo nobo pero e no ta. Durante su existencia e organismo a percura pa un serie di investigacion, cu a toca un gama amplio di topico dentro di gobernacion. Esnan cu conoce pasado di nos gobernacion lo recorda e tempo cu ARA a emiti na 1998 un informe impactante tocante e forma di maneha cuatro proyecto: e ampliacion y renobacion di aeropuerto, e proyecto di waf, e proyecto di radar y e contrato di Setar cu Fabela. E decision pa e investigacion a bin di dos banda, di parlamento di Aruba cu a pidi esaki pa dos di e proyectonan, y tabatin un decision di Gobierno di Reino pa tur cuatro caso. Den centro di atencion tabata e ministro encarga cu Trafico y Comunicacion, cu a enfrenta un informe den cual su maneho, y di e dirigentenan di e entidadnan involucra, a haya critica severo den tur caso. ARA a conclui cu e contratonan pa e proyectonan “notabata cumpli cu criterio di legitimidad y eficiencia, tabata insuficientemente garantiza o realiza, y cu e proceso di toma di decision no tabata suficientemente transparente.E defectonan constata a conduci na riesgo intolerable.”E rapport tabatin consecuencia grandi pa e mandatario, cu no por a continua den e siguiente gabinete y a recuri na e opcion di nombra un familiar como ministro. No ta pornada cu mas recientemente su regreso como mandatario den e gabinete 2021- 2025 a topa cu un evaluacion negativo na Den Haag, basa riba e experiencia describi den e rapport, mientras na Aruba tabata reina un ambiente mas positivo dentro di e partidonan di coalicion, basa posiblemente riba un memoria selectivo y temporal, un enfermedad conoci den e circulonan aki. Hulanda a accede den e caso y e nombramento a tuma lugar; e resto di e storia nos tur conoce.

Nos a desvia aki un poco di nos tema central, cu ta e rcursonan di cual ARA mester dispone pa cumpli cu nan tareanan. Den e caso menciona ariba, ARA tabata conta cu colaboracion di Rekenkamer di Hulanda. Esaki a percura pa imposicion di autoridad di Reino pa exigi y haya documentacion necesario di cualkier entidad envolvi. Den hopi otro investigacion tabata y por trata di iniciativa propio di ARA, cu e mesun legitimidadbasa riba Constitucion. Pero, si ta investigacion confidencial, unda ta clave pa posible persona y/o entidad externo no ta na altura di e investigacion, con mester haci? Aki ta mustra con importante ta cu ARA por conta cu su propio equipo di investigacion, pa dos motibo. Uno ta: mester interpreta ‘independencia’ segun e manera con ARA mester actua: no tin responsabilizacion di antemano. Dos, ta importante pa conta cu un equipo interno pa asina por limita riesgo di ‘leak’ den e proceso investigativo, unda esey ta necesario. No tur tarea ta exigi investigacion confidencial, pero ora ta necesario e organismo no por bay ‘shop’ externamente pa wak con ta bay haci esey. Y no mester pensa cu esaki ta un problema puramente teorico; tin varios proceso cu ta requeri confidencialidad, tin ora interdepartamental, tin ora dentro di un departamento, unda mester tuma e medidanan necesario pa garantiza esaki. E no ta anto algo unico di ARA, pero nan posicion independiente ta exigi cu nan mester por opera asina.

Financiamento di partido politico

Ya cu nos ta papiando di tarea di ARA, ta parce nos indispensable discuti e control financiero riba partido politico. Manera e asunto ta formula actualmente, e actor supervisor ta Conseho Electoral, cu asina leu cu nos ta na altura, no ta dispone di un aparato di apoyo permanente, sigur no pa realmente supervisa y sanciona partido y/o politico. Ta parce nos recomendable pa pone esaki directamente den man di ARA (y CAD), tambe pasobra financiamento di partido politico no ta core solamente via administracion di e asociacion. Henter e serie di fundacion politico cu ta maneha donacion pa partido y pa politico individual no ta aparece mes den e ley (Landsverordening registratie en financiën politieke partijen),mientras tur conocedor di e materia sa cu gran parti di e fluho financiero ta core via e fundacionnan. Si ta desea garantiza integridad y transparencia den e proceso aki tambe, ta un necesidad pone e tarea aki unda e mester ta. Mas motibo ainda pa un ARA fuerte, bon equipa y independiente.