ABC ta exigi proteccion di zonanan natural contra UTV y ATV; Corte ta duna partidonan un siman pa yega na un acuerdo

E conflicto tocante uzo di vehiculonan UTV y ATV den zonanan natural di Aruba a yega dilanti di Corte, despues cu Aruba Birdlife Conservation (ABC) a cuminsa un caso contra Gobierno di Aruba y Aruba Conservation Foundation (ACF). E organisacion ta exigi medidanan concreto pa limita trafico motorisa den areanan protegi, particularmente na Tera Cora y otro localidadnan na costa noord.

Durante e tratamento di e caso, e partidonan a presenta nan posicion tocante proteccion ambiental, acceso na camindanan y actividadnan turistico. Hues a duna nan un siman pa busca un acuerdo, prome cu un posible sentencia dia 9 di december 2026.

E caso ta concentra riba e pregunta si gobierno ta cumpliendo cu su propio maneho y recomendacionnan tecnico pa proteccion di naturalesa. Segun ABC, diferente area vulnerabel ta sigui accesibel pa vehiculonan motorisa, a pesar di consehonan di departamentonan gubernamental y medidanan cu anteriormente a ser anuncia.

Abogado Geert Rep, representando ABC, a argumenta cu e organisacion a trata durante diferente luna di logra un solucion mediante dialogo cu gobierno y representantenan di sector turistico. Sinembargo, e combersacionnan no a produci suficiente garantia pa proteccion di e areanan concerni, motivando e organisacion pa pidi intervencion urgente di Corte.

Un di e puntonan principal den e caso ta Tera Cora, un area cu, segun ABC, tin importancia ecologico y ta sirbi manera localidad di reproduccion pa diferente especie di parha. E organisacion ta cuestiona intencion di gobierno pa permiti cu vehiculonan di tour core den e area aki, considerando cu tin rutanan alternativo y recomendacionnan tecnico cu ta sostene limitacion di trafico motorisa.

Durante e sesion, abogado Rep a referi na un informe di 2022 y un conseho conhunto di DOW, DIP y DNM, fecha 24 di september 2026. Segun ABC, e documentonan ta identifica zonanan caminda actividad motorisa mester ser restringi pa evita daño ambiental.

E abogado a cuestiona pakico gobierno ta considera apertura di cierto camindanan, mientras cu su propio departamentonan a recomenda proteccion di e localidadnan. Tambe el a señala cu un parti considerable di Tera Cora ta tereno priva y cu tin consehonan negativo relaciona cu posibilidad di establece un ruta nobo.

Andicuri Real Estate, representa pa abogado David Kock, a uni su mes na e procedimento na banda di ABC. Mientras tanto, diferente compania di tour, incluyendo Aruba North Coast Adventures, a busca participa den e caso pa defende nan interesnan relaciona cu acceso na e rutanan. Segun informacion presenta durante e sesion, nuebe compania di tour a busca participacion den e procedemento.

E preocupacionnan di ABC no ta limita na Tera Cora. E organisacion a menciona diferente localidad na costa noord, incluyendo e region entre California Lighthouse y Alto Vista, Bushiribana, Natural Bridge y areanan relaciona cu Parke Nacional Arikok.

Durante e tratamento, a haci referencia na documentacion cu ta identifica 16 zona cu ta rekeri proteccion y na rutanan caminda trafico motorisa ta permiti of restringi. Segun ABC, tin tres area principal caminda actividadnan di vehiculonan di tour mester ta limita.

Otro localidadnan menciona ta inclui Arashi, Saliña Bruin y e duinnan di California. Sinembargo, ABC a retira su exigencia tocante delimitacion di e duinnan, considerando cu e medida corespondiente ya a ser ehecuta.

Un elemento central den e demanda ta ponemento di bareranan fisico pa evita cu vehiculonan drenta areanan vulnerabel. Durante luna di mei, gobierno a pone piedranan grandi na diferente punto den area di California Lighthouse y Alto Vista. Segun ABC, e trabaonan tabata forma parti di un proceso cu mester a sigui cu otro fase pa limita acceso na mas localidad.

No obstante, e organisacion ta sostene cu e proceso no a ser completa y cu algun barera a ser kita sin ser reemplasa. ABC ta considera cu pone piedranan solamente no ta suficiente si vehiculonan por pasa rond di nan. P’esey, e ta pidi supervision efectivo y medidanan pa evita cu e bareranan ta ser kita.

Como parti di su demanda, ABC ta pidi un multa di Afl. 10.000 si gobierno no cumpli cu un eventual orden di Corte.

A pesar di su exigencianan, ABC no ta rechasa tur actividad turistico motorisa den e region. E organisacion a indica cu r ta dispuesto pa considera acceso limita riba cierto rutanan, bao di condicionnan estricto y eventualmente di manera temporal mientras ta realisa un estudio di impacto ambiental.

Entre e condicionnan menciona tin orario specifico, velocidad maximo, cantidad limita di vehiculo y control efectivo. ABC ta considera cu e problema ta inclui tambe operadornan cu ta organisa excursion sin e autorisacionnan corespondiente y cu ta circula den areanan prohibi.

Durante e sesion, hues a cuestiona e urgencia di e procedemento, considerando cu e actividadnan aki ta existi pa hopi aña caba y cu e partidonan recientemente ainda tabata den combersacion.

Rep a splica cu ABC a participa den diferente reunion desde mei 2026, incluyendo contacto den augustus, october y november. E organisacion a presenta proposicionnan dia 6 y 8 di november, pero segun su representante legal, e dialogo no a produci un solucion satisfactorio.

Na banda di gobierno, abogado mr. Crouch a cuestiona necesidad di un procedemento urgente mientras cu e negociacionnan ainda tabata andando. Segun e posicion presenta, gobierno ta buscando un solucion cu ta tene cuenta cu proteccion ambiental, acceso na camindanan y interesnan di diferente usuario.

E abogado a indica cu gobierno a presenta proposicionnan na operadornan turistico, pero cu ainda no a ricibi reaccion suficiente. Si no logra un acuerdo, gobierno por considera otro medidanan.

Tambe a menciona dificultadnan practico relaciona cu implementacion inmediato di bareranan, incluyendo disponibilidad di material y e temporada di fin di aña. Gobierno ta considera ta importante pa mantene cierto camindanan accesibel pa autoridadnan, incluyendo Polis, cu mester por circula den e region pa supervision y intervencion.

Aruba Conservation Foundation, encarga cu maneho di Parke Nacional Arikok, a presenta un posicion cu ta reconoce importancia di proteccion ambiental, pero cu ta cuestiona e forma den cual ABC ta pidi implementacion di e medidanan.

Abogado Arends Marchena, representando ACF, a argumenta cu cualkier limitacion di acceso mester ta basa riba e cuadro legal corespondiente. Segun e fundacion, no tur caminda por ser cera inmediatamente sin considera su status legal y derecho di acceso di otro usuario.

ACF ta considera cu naturalesa mester keda accesibel pa comunidad, semper cu e actividadnan no ta causa daño. Entre e alternativanan menciona tin ceramento temporal durante temporada di reproduccion di parha y otro bestia, limitacionnan di velocidad y regulacion mas estricto di trafico motorisa.

E fundacion a señala cu ponemento di bareranan riba camindanan publico ta rekeri coordinacion cu autoridadnan competente, incluyendo DOW y Domeinbeheer. Tambe a enfatisa cu un eventual rechaso di e demanda di ABC no ta nifica cu proteccion di naturalesa ta innecesario, sino cu e medidanan mester ser implementa mediante proceduranan legal.

Na banda di e operadornan turistico, abogado mr. Ruiz a pidi oportunidad pa continua cu dialogo. El a presenta regulacion estricto como alternativa pa ceramento completo di diferente ruta, haciendo referencia na experiencia cu sector di watersports, caminda violacion repetitivo di reglanan por conduci na perdida di permiso.

Durante e discusion, Hues a menciona posibilidad di uza tecnologia GPS pa controla e rutanan di vehiculonan. Un sistema asina por identifica ora un vehiculo ta sali for di un ruta permiti y eventualmente limita su funcionamento, creando un mecanismo adicional pa controla cumplimento cu reglanan.

Na final di e tratamento, Hues a duna e partidonan un siman pa explora posibilidad di un acuerdo y informa Corte tocante resultado di e combersacionnan. Si no logra un solucion, ta contempla pronuncia sentencia dia 9 di december 2026.

E caso ta pone na cla e desafio pa combina actividadnan turistico na costa noord cu proteccion di naturalesa y acceso na camindanan. Mientras ABC ta exigi aplicacion efectivo di e maneho existente, gobierno, ACF y operadornan turistico ta defende un proceso cu ta considera tambe aspectonan legal y practico. E decision pendiente por determina cua medidanan lo ser implementa pa regula trafico motorisa den e areanan concerni.