Ta ora pa reconoce e balor y e contribucion grandi cu estadisticonan ta y por duna den e proceso di digitalisacion, cu alabes ta sostenibel y sigur. Asina e orado principal pa e conferencia di e Dutch Caribbean Digital Competence Network, DCDC, Hadeikaye Peterson a bisa. Peterson, kende ta concluyendo su estudio di doctorado, ta hefe di Departamento di Estadistica di St Maarten.

Minister di Relacion di Reino, Educacion, Asunto di Hubentud, Innovacion y Deporte, mr. Gerlien Croes a habri e conferencia,ilustrando su compromiso na digitalisacion, ya cu e ta parti di con ta siňa awendia. Sinembargo pa percura cu e proceso di digitalisacion ta responsabel, mester traha a base di evidencia. “Ademas, mester anda hopi responsabel cu e informacion,” e Minister a enfatisa. Gerlien Croes a aplaudi DCDC cu tin e meta pa pone e base di colaboracion riba e tereno di digitalisacion. “Investigadonan mester duna nos guia,” e Minister a enfatisa, “pasobra ya no por opera mas sin data. Tin hopi pa haci si,” Croes a conclui.

DCDC ta un organisacion cu danki na sosten financiero di Open Science NL por a conecta investigadornan, institucionnan y profesionalnan for di tur e seis islanan di Reino Hulandes den Caribe, kendenan a mustra compromiso na asina yama ‘Open Data,’ investigacion colaborativo, pa asina construi capacidad digital den nos region. Open Data ta informacion cu ta habri, disponible gratis pa tur hende pa usa, modifica y comparti pa cualkier proposito, suheto na e rekisitonan basico di acreditacion. Ta trata aki por lo general na informacion publico di Gobierno, institutonan academico y otro institucionnan publico, cu generalmente ta habri pero cu no tur ora ta facilmente accesibel pa medio digital. E meta di DCDC ta pa trece cambio den esaki, entre otro dor di educacion y colaboracion, investigacion y traha riba capacidad digital den region.

Beneficionan di Open Data ta diverso y ta varia di mehoracion di eficiencia di administracionnan publico, crecemento economico den sector priva pa mehoracion di bienestar social. Open Data ta mehora funcionamento y ta contribui na con servicio publico ta bira eficiente. Ora ta comparti data entre diferente sector publico ta eleva eficiencia y ta baha gasto tambe, tanto pa e usuario y Gobierno mes. Economia di su parti ta beneficia pa motibo di acceso mas facil na informacion, contenido y conocemento cu a cambio ta contribui na desaroyo di servicionan innovativo y creacion di modelonan empresarial nobo. Y finalmente bienestar social tambe lo por conoce mehoracion ya cu sociedad ta bon sirbi cu informacion cu ta transparente y accesibel. Open Data como tal ta traha na interes di colaboracion, participacion y innovacion social.

Institucionnan cu ta forma parti di DCDC ta Universidad di Corsou, Universidad di St. Maarten, IPA y Universidad di Aruba cu a haya sosten di OpenScienceNL cu ta financia e proyecto te cu September 2029. Coordinador ta Esther Plomp di UA, kende a splica cu e obhetivo ta pa kibra habri e separacion di informacion entre institucionnan investigativo den Caribe y promove practicanan habri y honesto di colaboracion riba data, conoci bou e termino FAIR, cu ta para pa Findable, Accessible, Interoperable, Reusable, esta facil pa haya, accesibel, facil pa usa pa otro, y reusable. DCDC ta traha pa hisa competencia digital pa medio di traha di persona cu persona y programanan di entrenamento, facilita colaboracion strategico entre isla y sector, conecta profesionalnan cu interes comparti y desaroya un vision colectivo den comparti conocemento den Caribe Hulandes.

Otro miembronan di directiva di DCDC ta Rendell de Kort di UA, Marjorie Alfonso di Universidad di Corsou, Raymond Jessurun di Universidad di St. Maarten, y Marvin Odor y Regine Croes di IPA.

E orado principal, Sra. Peterson a ilustra cu na principio, estadisticonan tabatin hopi miedo di digitalisacion pero cu experiencia propio a mustra con miho e informacion ta pa lesa, interpreta y comparti. Su enfoke tabata miedo cu a transforma den locual e ta yama ‘fe.’

Sandy Odor, kende a obtene su maestria den ley for di Universidad di Aruba ta trahando como experto den privacidad pa un consorcio bancario, a enfoca riba open data y e importancia pa sigura privacidad di personanan y kico mester haci pa garantisa cu por proteha esakinan.

E privacidad aki ta esencial awor cu Gobierno ta bay lansa un proyecto piloto unda Censo, Departamento di Impuesto (DIMP) y Dimas lo comparti data. E proyecto aki ta cay bou Ministerio di Innovacion cu ta dirigi pa Sr. Jeremy Erasmus kende durante e anochi a ilustra e progreso di digitalisacion den sector publico. Erasmus a bisa cu mester a reevalua kico a haci caba riba e tereno di digitalisacion, adapta nan pa asina por cumpli cu e exigencianan di siguridad cu mester tin pa proteha e data.

Bon Dia Aruba lo dedica atencion riba e discursonan presenta durante e anochi di apertura di e conferencia y nan relevancia, ademas di e conclusionnan di e tayernan organisa na Aruba pa DCDC.