Centrale Bank van Aruba (CBA) ta proyecta surplus den balansa di pago di Aruba te 2030, principalmente danki na turismo. Segun su informe di november 2026, Aruba a registra un surplus di Afl. 873,7 miyon durante prome mitar di 2026, contribuyendo na fortalecemento di reserva internacional. Sinembargo, CBA ta adverti cu prijs halto di petroleo, tensionnan internacional y posible desaceleracion di turismo por afecta e perspectiva economico.

E publicacion mas reciente di CBA, “Economic Outlook – External Sector november 2026” ta presenta un evaluacion di e desaroyonan den sector externo di economia di Aruba durante prome mitar di 2026, hunto cu proyeccionnan pa e periodo 2026 te 2030. E informe ta actualisa e perspectiva publica na maart di e aña aki y ta basa riba informacion disponible te october 2026.

Balansa di pago ta registra e transaccionnan economico entre Aruba y resto di mundo, incluyendo entrada di divisa procedente di turismo, inversionnan, importacion di producto, prestamo y pago na exterior. Un surplus ta indica cu, den tur e transaccionnan registra hunto, gobierno a haya un resultado positivo cu ta contribui na su reserva internacional.

Durante prome mitar di 2026, cuenta coriente di Aruba a registra un surplus di Afl. 685,4 miyon. E resultado aki ta indica cu entrada procedente di comercio, servicio, inversion y otro transaccionnan den exterior a supera e pagonan relaciona cu e mesun actividadnan.

Turismo a desempeña un papel importante den e resultado positivo. Segun CBA, cantidad di turista cu ta keda na Aruba a aumenta cu 10.9% durante prome seis lunanan di 2026, compara cu e mesun periodo di 2025.

Como consecuencia, entrada di divisa relaciona cu turismo a aumenta di Afl. 2.860,3 miyon na Afl. 3.218,4 miyon. E crecemento aki a contribui considerablemente na e resultado positivo di cuenta coriente, confirmando e importancia di turismo como fuente principal di entrada di divisa pa Aruba.

Sinembargo, e aumento den actividad turistico y consumo di hogarnan a genera tambe mas demanda pa productonan importa. E balor di importacion di mercancia a aumenta di Afl. 1.380,8 miyon durante prome mitar di 2025 na Afl. 1.618,7 miyon den e mesun periodo di 2026.

Ademas, pagonan pa servicionan cu ta bin di exterior a aumenta cu Afl. 55 miyon. E gastonan aki ta inclui, entre otro, servicio di administracion hotelero, servicio bancario y tecnologia di informacion. Tambe a registra mas pago den exterior relaciona cu dividendo di empresanan den sector hotelero y bancario.

E desaroyonan aki ta mustra cu, mientras turismo ta genera mas entrada di divisa, crecemento economico ta aumenta simultaneamente e necesidad di paga pa producto y servicio cu ta bin di exterior.

Otro aspecto importante den e informe ta e cambio registra den cuenta financiero. Durante prome mitar di 2026, Aruba a registra un entrada neto di Afl. 206,2 miyon, compara cu un salida neto di Afl. 330 miyon den e mesun periodo di 2025.

E cambio aki ta relaciona principalmente cu un prestamo grandi cu Gobierno di Aruba a ricibi di exterior den luna di mei. Ademas, persona y organisacionnan di exterior a deposita mas placa na Aruba, mientras cu empresanan local a reduci e cantidad di placa cu nan ta fia na empresanan relaciona cu nan den exterior.

Pa henter 2026, CBA ta proyecta un surplus di Afl. 452,5 miyon den balansa di pago, sigui pa Afl. 404,7 miyon na 2027. Aunke e cifranan ta representa un resultado positivo, e proyeccion pa 2027 ta indica un surplus un tiki mas abao cu esun di 2026.

Cuenta coriente, na su turno, ta proyecta un surplus di Afl. 903,1 miyon na 2026 y Afl. 936 miyon na 2027. E resultado aki ta ser sosteni principalmente door di entrada di divisa genera door di turismo y otro servicionan.

CBA ta calcula cu entrada total di divisa procedente di servicionan lo yega na Afl. 6.804 miyon na 2026 y Afl. 7.027,1 miyon na 2027. Sinembargo, pago pa servicionan di exterior tambe lo aumenta, entre otro debi na crecemento economico y prijsnan internacional.

Importacion di mercancia ta proyecta na Afl. 3.151,2 miyon na 2026 y Afl. 3.238,1 miyon na 2027. E aumento ta relaciona cu actividad turistico, consumo di hogarnan, inversion y costo di petroleo.

Otro elemento cu ta influencia balansa di pago ta composicion di debe publico. CBA ta splica cu prestamonan di gobierno cu ta bin di exterior tin consecuencia directo pa entrada y salida di divisa.

Ora gobierno ricibi un prestamo internacional, esaki ta genera entrada di divisa. Sinembargo, pago di interes y pago back di e prestamo despues ta representa salida di placa pa exterior.

Segun e proyeccionnan, proporcion di debe publico cu Aruba tin den exterior lo disminui gradualmente durante e periodo 2026 te 2030. E cambio aki por contribui na reduci pagonan di interes na acreedornan internacional y baha presion riba reserva di divisa.

CBA ta indica cu, actualmente, condicionnan di interes den mercado local ta mas faborabel cu esunnan internacional. Esaki por haci financiamento local mas atractivo, dependiendo di necesidadnan financiero di gobierno.

Pa 2027, CBA ta asumi cu gobierno lo refinancia Afl. 248,1 miyon di debe externo cu ta vence, completamente den mercado local. E operacion aki lo genera salida di divisa pa paga e acreedornan internacional, sin un entrada ekivalente di prestamo nobo cu ta bin di exterior.

Den sector priva, CBA ta anticipa cu inversionnan directo di exterior lo registra un entrada neto di Afl. 75,6 miyon na 2026, compara cu Afl. 107,9 miyon na 2025.

E reduccion ta relaciona parcialmente cu compra di accionnan di un hotel local, anteriormente den man di inversionistanan stranhero, door di residentenan di Aruba. Ta proyecta tambe menos inversion stranhero den casnan di vakantie, considerando escasez di tereno, opinion local y posible regulacion.

Pa 2027, sinembargo, CBA ta anticipa un recuperacion di inversionnan directo, particularmente relaciona cu posible aumento di construccion hotelero. E actividad aki por genera oportunidadnan nobo pa inversionistanan local y internacional.

Un di e resultadonan mas importante di e informe ta e perspectiva positivo pa reserva internacional. CBA ta proyecta cu reserva internacional, sin inclui cambionan di baloracion, lo yega na Afl. 4.189,8 miyon na final di 2026 y Afl. 4.594,5 miyon na 2027.

Ora ta inclui cambionan di baloracion pa evalua suficiencia di reserva, e cifranan ta mas halto. Segun e calculacionnan, reserva internacional lo por cubri aproximadamente 8,9 luna di pagonan di cuenta coriente na 2026 y 9,3 luna na 2027.

E nivel aki ta considerablemente mas halto cu e minimo recomenda di tres luna. E resultado ta indica cu Aruba ta proyecta di mantene un posicion relativamente fuerte pa cumpli cu su obligacionnan financiero internacional.

No obstante, CBA ta dedica atencion particular na e riesgonan relaciona cu prijs di petroleo. E informe ta analisa un scenario desfaborabel den cual prijs internacional di petroleo ta keda halto durante un periodo prolonga, den contexto di conflicto entre Merca y Iran.

Den e scenario aki, prijs di petroleo WTI ta permanece na USD 97,3 pa bari te final di 2027. Como consecuencia, costo di importacion di petroleo pa Aruba lo aumenta y surplus di cuenta coriente lo resulta mas chikito.

Pa 2027, e surplus di cuenta coriente por baha di Afl. 936 miyon den e proyeccion principal na Afl. 832,9 miyon den e scenario desfaborabel. Surplus di balansa di pago, na su turno, por reduci di Afl. 404,7 miyon na Afl. 301,6 miyon.

A pesar di e impacto negativo, reserva internacional ainda lo keda suficiente, cu capacidad pa cubri aproximadamente 9,1 luna di pagonan di cuenta coriente na 2027.

CBA ta aclaria cu e scenario aki ta considera principalmente impacto di petroleo mas caro. Den realidad, un aumento fuerte di prijs di petroleo por coincidi cu otro desaroyonan negativo, incluyendo desaceleracion economico mundial, inflacion y reduccion den actividad turistico.

Ademas, CBA ta identifica diferente otro riesgo cu por influencia e proyeccionnan, incluyendo guera comercial internacional, aumento di interes, escasez di personal, retraso den proyectonan di inversion y cambio den maneho fiscal di gobierno.

E informe ta menciona tambe cu posibilidad di refinancia prestamonan di likides na tarifanan di interes mas faborabel ta depende di aprobacion di legislacion di Reino den Parlamento di Aruba y Tweede Kamer na Hulanda. E decisionnan aki por influencia costo di financiamento y pagonan futuro na exterior.

Pa e periodo 2028 te 2030, CBA ta mantene un perspectiva positivo. E institucion ta proyecta surplus di Afl. 455,8 miyon na 2028, Afl. 237,2 miyon na 2029 y Afl. 421,8 miyon na 2030.

E proyeccionnan ta indica cu Aruba por sigui registra mas entrada cu salida di divisa, principalmente danki na turismo. Sinembargo, e resultado final lo depende di desaroyonan economico internacional, nivel di importacion, inversion y decisionnan financiero di gobierno.