Fundacion Contra Violencia Relacional (FCVR), hunto cu diferente organisacion na Aruba, a anuncia inicio di campaña Orange Aruba 2026, como parti di e iniciativa internacional Orange the World. Durante un conferencia di prensa, e organisadornan a presenta diferente actividad pa conscientisa comunidad tocante violencia contra hende y mucha muhe. Tambe nan a expresa preocupacion pa e casonan reciente di abuso domestico, control den relacionnan y uzo di tecnologia pa vigila victima.
Director di Fundacion Contra Violencia Relacional (FCVR), Esther Broeksema, a splica cu Orange the World ta un campaña internacional di UN Women cu tin como meta combati violencia contra hende y mucha muhe. E campaña ta cuminsa oficialmente dia 25 di november, Dia Internacional pa Eliminacion di Violencia contra Hende Muhe, y ta termina dia 10 di december, Dia Internacional di Derecho Humano.
E periodo aki ta conoci mundialmente como 16 Dia di Activismo, durante cual organisacion y instancianan ta uni esfuerso pa pone atencion riba violencia, promove prevencion y stimula comunidad pa contribui na un ambiente mas sigur.
E color oranje ta simbolisa speransa y un futuro liber di violencia. Na Aruba, e campaña ta carga e nomber Orange Aruba, cu un mensahe dirigi specificamente na comunidad local. E meta ta pa conscientisa poblacion cu violencia contra hende muhe no tin luga den sociedad y cu prevencion ta un responsabilidad comparti.
E comision di Orange Aruba ta consisti di FCVR, Departamento di Asunto Social, Centro di Desaroyo di Hende Muhe (CEDEHM), Bureau Sostenemi, Fundacion Respeta Mi y Soroptimist International. E instancianan aki ta colabora pa organisa diferente actividad durante e periodo di campaña.
Como parti di e programa, Orange Aruba lo inicia su actividadnan local cu un ceremonia di iluminacion na Bestuurskantoor. Minister di Asunto Social, Mervyn Wyatt-Ras, lo participa na e ceremonia, cu ta simbolisa e compromiso pa sigui combati violencia y apoya e personanan afecta.
Durante e conferencia di prensa, Broeksema a dedica atencion special na e situacion actual di violencia na Aruba. Segun e director, e casonan cu a sali den medio di comunicacion durante ultimo lunanan ta causa preocupacion, particularmente pa e nivel di crueldad y e diferente formanan di abuso cu ta saliendo na cla.
E preocupacion no ta limita solamente na violencia fisico. FCVR ta observa tambe comportamento di control, intimidacion y abuso psicologico den relacionnan, cu por afecta profundamente e seguridad y bienestar di victima.
Un di e desaroyonan menciona ta uzo di tecnologia pa controla of sigui movemento di un persona. Esaki por inclui aparato GPS, aplicacionnan riba telefon y otro medio digital cu ta permiti un agresor vigila actividadnan di su pareha.
Segun Broeksema, e fundacion ta encontra situacionnan den cual sobrevivientenan di abuso ta enfrenta diferente forma di control digital. Mensahenan persistente, vigilancia electronico y otro comportamento di intimidacion ta forma parti di e problematica cu trahadornan social ta observa den nan contacto cu victima.
E cambio aki ta pone exigencianan nobo riba e manera cu instancianan di asistencia ta trata casonan di violencia domestico. No ta suficiente pa enfoca solamente riba agresion fisico, ya cu e riesgo pa victima por inclui tambe control digital y abuso emocional.
FCVR ta traha directamente cu sobrevivientenan di abuso domestico mediante su servicionan di asistencia y guia. Un di e componentenan importante ta e programa di sosten despues di abuso, caminda trahadornan social ta yuda sobrevivientenan den nan proceso di recuperacion.
Den e trayecto aki, e fundacion ta traha hunto cu cada persona pa establece un plan di seguridad adapta na su situacion. E plan por tene cuenta cu diferente riesgo, incluyendo e manera cu tecnologia ta ser uza den e relacion.
Broeksema a indica cu e fundacion, cu ta cumpli 31 aña di existencia e aña aki, ta considera importante pa sigui profesionalisa su personal y mantene su conocemento actualisa. E desaroyonan internacional y experiencia di otro organisacionnan den region por contribui na mehoracion di e asistencia cu ta ser brinda na Aruba.
Ademas di asistencia directo na victima, prevencion y educacion ta ocupa un posicion importante den e campaña di e aña aki.
Departamento di Asunto Social (DAS) a reafirma su compromiso cu e lucha contra violencia di hende y mucha muhe. Marceylaine Paskel, vocero di DAS, a splica cu e departamento ta brinda sosten mediante su servicionan regular, pero ta considera colaboracion cu otro instancia indispensabel pa yega na mas persona.
Durante e campaña, DAS lo organisa diferente tayer cu enfasis riba relacionnan saludabel, respet mutuo, limitacionnan personal y conscientisacion tocante violencia. E actividadnan aki lo ser realisa den colaboracion cu diferente otro organisacion.
Un parti importante di e tayernan ta dirigi na hobennan, cu ta ser considera un grupo esencial den prevencion di violencia. E intencion ta pa hobennan siña reconoce comportamento saludabel den un relacion, compronde importancia di respet mutuo y identifica situacionnan cu por conduci na abuso.
E departamento ta spera cu e conocemento aki lo contribui na formacion di relacionnan mas saludabel y na un comunidad cu ta reconoce mas tempran e señalnan di violencia.
Durante e conferencia di prensa Paskel a splica tambe cu DAS tin diferente servicio pa persona cu ta enfrenta situacionnan dificil. Den Seccion di Guia Social, trahadornan social por compaña persona y yuda establece un plan di sosten adapta na nan necesidad.
Ademas, den seccion di Bida di Famia, tin asistencia psicologico disponibel. E servicio aki por ser pidi mediante un carta di referencia di dokter y ta ser brinda gratuitamente.
Otro actividad importante den e programa di Orange Aruba ta un simposio organisa door di SEDEM, dirigi specificamente na profesionalnan cu ta traha den e campo social y cu ta encontra cu situacionnan di violencia.
Gender Consulent na CEDEHM, Jeanine Tromp, a splica cu e simposio lo tuma luga dia 9 di december. Participacion ta destina na un grupo specifico di profesionalnan cu lo ricibi invitacion personalmente.
E simposio, cu ta carga e tema ‘Dare to Talk Hardcore’, lo enfoca riba e relacion entre desigualdad di genero y violencia interfamiliar. Tambe lo trata e factornan di riesgo y comportamento di agresornan.
Tromp a splica cu un panel di profesionalnan lo intercambia conocemento y experiencia tocante violencia di genero y violencia den famia. E meta ta pa amplia conocemento tocante e problematica y mehora e manera di brinda asistencia y preveni violencia.
Tromp a indica cu CEDEHM su participacion den Orange Aruba ta forma parti di su compromiso cu derecho di hende y mucha muhe. E centro ta mantene contacto cu hende muhe cu ta enfrenta violencia y ta ofrece un espacio caminda nan por acerca pa papia tocante nan situacion.
Fuera di e programa oficial, diferente iniciativa externo ta contribui na e campaña. Tambe lo tin actividadnan di conscientisacion y colecta di placa riba caya y na diferente rotonde, cu participacion di boluntarionan.
FCVR a haci tambe un apelacion na comunidad, scol, clubnan di servicio y sector priva pa participa activamente den e campaña. Scolnan por dedica atencion na e tema den nan actividadnan educativo, mientras cu empresanan por contribui mediante iluminacion oranje di nan edificionan.
E organisadornan ta considera cu participacion di comunidad ta esencial pa e campaña logra su meta. E color oraño cu lo ta visibel na diferente luga durante e periodo aki ta sirbi manera un recordatorio di e necesidad pa combati violencia y promove relacionnan basa riba respet.
Cu fin di aña acercando, Broeksema a haci un apelacion particular na famianan pa reflexiona riba nan relacionnan, tanto den cas como cu otro miembronan di famia y amistadnan.
E campaña Orange Aruba 2026 ta busca no solamente pone atencion riba e casonan di violencia, sino tambe pa fortalece prevencion, acceso na asistencia y colaboracion entre instancianan. E organisadornan ta spera cu e actividadnan lo contribui na un comunidad mas consciente di e diferente formanan di abuso y di importancia pa actua na tempo.
E mensahe central ta cu violencia contra hende y mucha muhe no mester ser acepta como algo normal den sociedad, y cu tanto institucionnan como comunidad tin un papel den creacion di un Aruba mas sigur.



