Un discusion entre turista tocante un advertencia pa no bebe awa di cranchi na hotel RIU Palace Aruba a lanta pregunta tocante calidad di awa potable na Aruba. Maske nos isla ta conoci internacionalmente pa su awa di calidad excepcionalmente halto, bishitantenan a reporta cu a haya advertencia den cambernan di hotel indicando cu e awa no ta safe pa consumo.
E situacion tambe a lanta pregunta tocante e mensahe cu advertencianan asina ta duna turista y e potencial consecuencianan pa reputacion di Aruba.
E discusion a aparece den e grupo di Facebook, All Thins Aruba, unda un bishitante a puntra pakico RIU a pone advertencia den e cambernan bisando cu e awa no ta safe pa bebe. E pregunta rapidamente a atrae reaccion di turista, incluyendo bishitante cu tabata sorprendi pa e advertencia, pasobra nan semper a compronde cu awa di cranchi ta perfectamente safe pa bebe na Aruba.
Un participante inicialmente a adverti cu bebe awa sin filter por pone bishitantenan bira malo, pero subsecuentemente a reconoce cu a confundi Aruba cu Cancun, Mexico. Despues di realisa cu e discusion tabata tocante Aruba, e persona a admiti cu nos isla ta conoci pa su awa excelente.
Otro participante a splica cu Aruba ta produci su awa di bebe mediante desalinacion y cu e awa ta safe pa consumo diario. Sinembargo, e mesun persona a sugeri cu RIU por tin su propio problema interno relaciona cu awa.
Otro bishitantenan a cuestiona si e advertencia tabata conecta na problemanan reciente cu produccion di awa na Aruba, mientras otro participante a bisa cu e advertencia tabat’ey pa añas.
E observacion mas reciente aki ta parce di ta consistente cu relatonan anterior publica riba TripAdvisor. Den un review bayendo back na december 2019, un huesped na RIU Palace Aruba a reporta mira un advertencia chikito cerca di sink di baño, indicando cu awa no ta pa bebe. Otro bishitantenan a haci observacionnan similar den e seccion di pregunta y contesta di e hotel.
E relatonan aki ta sugeri cu e advertencia no ta algo recien, maske e motibo pa su presencia falta claridad.
Awa di Aruba ta cumpli cu standard internacional
E discusion ta particularmente impactante pasobra Aruba a construi un reputacion internacional pa e calidad di su awa potable.
Segun compania di awa y coriente di Aruba, WEB, awa potable di nos isla ta entre e mihonan na mundo y ta comparable den calidad na awa di boter di marcanan bon conoci.
WEB ta splica riba su website oficial cu awa di cranchi na Aruba ta safe pa consumo humano y no ta rekeri tratamento adicional prome cu bebe.
A diferencia di paisnan cu ta depende riba riu, lago y fuentenan di awa dushi bao tera, Aruba ta produci su awa potable door di desalinea awa di lama. E awa ta pasa den purificacion y remineralisacion, durante cual ta agraga mineral esencial, incluyendo calcium, pa mehora su composicion y sabor.
WEB ta mantene proceduranan estricto di control di calidad pa sigura cu e awa potable ta cumpli cu standard internacional estableci pa Organisacion Mundial di Salud (WHO).
Ta haci test kimico tur dia, mientras varios parameter di produccion ta ser monitoria continuamente. Tambe ta analisa muestra di awa mensualmente na ubicacionnan strategico rond di e isla.
Adicionalmente, Landslaboratorium di Aruba ta haci chekeo independiente, mientras compania Mericano, National Testing Laboratories Ltd. ta haci un auditoria anual extenso involucrando 159 parameter.
Laboratorio di WEB ta acredita bao ISO 17025, un standard internacional pa competencia di laboratorio.
E proceduranan aki ta destina pa sigura cu e awa suministra door di red publico di distribucion na Aruba ta keda safe pa consumo.
Calidad di awa potable di Aruba tambe ta ser promociona activamente entre bishitantenan internacional. Website oficial di turismo di Aruba Tourism Authority (ATA) ta describi awa di cranchi di Aruba como safe, limpi, y agradable pa bebe, usando e slogan “paraiso den cranchi.”
Ta curasha bishitantenan specificamente pa bebe awa directamente for di cranchi di nan camber di hotel y yena boter reusable en bes di cumpra awa di boter.
Advertencia no ta necesariamente un contradiccion
Maske e advertencianan reporta na RIU ta parce di contradeci e reputacion di awa di Aruba como safe pa bebe, tin un distincion tecnico importante.
E calidad di awa produci y distribui pa WEB no ta necesariamente identico na e calidad di awa despues cu el a pasa door di instalacion di tuberia di un edificio priva.
WEB mes ta splica cu su responsabilidad pa monitoria calidad di awa potable ta extende na su propio red di distribucion. Unabes awa drenta un propiedad priva, e condicion y mantencion di e instalacion interno tambe por influencia su calidad.
Por ehempel, awa warda den tanki manteni inadecuadamente, transporta door di tuberia inadecuado, of exponi na contaminacion den un edificio por no tin e mesun calidad mas manera ora el a drenta e propiedad. Esaki ta aplica no solamente na hotel, pero tambe edificio residencial, restaurant y otro establecimento comercial.
Consecuentemente, un hotel por teoreticamente ricibi awa perfectamente safe for di WEB mientras ta mantene un advertencia di precaucion tocante awa for di cierto cranchi na su tereno.
Sinembargo, actualmente no tin informacion verifica indicando cu RIU Palace Aruba tin problema cu su instalacion interno di awa of cu su awa di cranchi ta contamina.
Tambe ta posible cu e advertencia ta refleha un politica standard di precaucion usa pa e cadena internacional di hotel na tur propiedad na diferente pais. Si esaki ta e caso na Aruba no ta confirma.
E distincion, anto, ta keda importante: un advertencia tocante awa den un edificio individual no ta nifica necesariamente cu e suministro publico di awa potable no ta safe.
Imagen di Aruba
Asina mes, e discusion ta lanta otro pregunta cu ta bay mas leu cu calidad di awa mes: ki mensahe e advertencianan aki ta duna nos bishitantenan internacional?
Aruba a inverti esfuerso considerable den establece su mes como un destinacion ofreciendo servicio y facilidad di calidad halto. Su awa potable ta un di e bentahanan distintivo, particularmente compara cu destinacionnan unda frecuentemente ta conseha turista pa no bebe awa di cranchi.
Pa bishitantenan cu no conoce Aruba, un advertencia cu awa no ta safe pa bebe por facilmente crea impresion cu e suministro publico di awa na e isla no ta safe. E impresion aki por persisti, hasta ora e advertencia ta trata solamente instalacion interno di un hotel particular, of ta refleha maneho general di un compania.
E reaccionnan riba Facebook ta ilustra con lihe confusion ta desaroya. Algun participante inmediatamente a asocia e advertencia cu awa potable no safe den otro destinacion Caribense, mientras otronan a specula tocante contaminacion of problema den infrastructura di awa na Aruba.
Discusionnan asina por potencialmente mina un di e caracteristicanan positivo di Aruba como destinacion turistico, particularmente ora advertencianan ta presenta sin splica pakico nan ta necesario.
Tambe tin un consideracion ambiental. Aruba ta curasha activamente pa bishitantenan yega boter reusable y reduci consumo di plastic di un solo uso. Un advertencia pa no bebe awa di cranchi por curasha mas dependencia riba awa den boter, maske suministro di awa potable na Aruba ta generalmente safe pa bebe.
Esaki no ta nifica cu hotel mester retira advertencia legitimo pa salud. Si tin un motibo genuino pakico mester evita consumi awa di un cranchi particular, mester informa bishitantenan. Sinembargo, duna un splicacion cla por yuda turista distingui entre un precaucion specifico di un hotel, y e calidad di awa potable na Aruba en general.
E asunto central anto no ta si Aruba ta produci awa cu ta safe pa bebe. Informacion di control di calidad publica pa WEB ta establece cu su suministro di awa potable ta suheto na monitoreo intensivo y ta cumpli cu standard internacional.
Loke falta contesta ta pakico RIU lo conseha su huespednan pa no bebe awa di e cranchi den nan camber. Te cu tin un splicacion pa esaki, e discusion ta demostra con un advertencia chikito den un baño di hotel por crea incertidumbre rond di algo cu Aruba pa largo a considera un fuente di orguyo nacional.



