Sarah Wescot Williams di St. Maarten a bis’e na Ingles: “We feel your pain.” Rene Herdé di e delegacion di Aruba a bisa: “Nos ta sinti boso dolor. Nos ta reconoce loke boso ta experienci’a: un negligencia di boso necesidadnan y un falta di oido pa boso grito pa trato husto.” Esaki ta loke e delegacionnan di Aruba, Corsou y St.Maarten den e reunionnan di IPKO na Hulanda a bisa e delegacionnan di “Eilandsraad” di Saba, St. Eustatius y Boneiro, diahuebs siman pasa.
E reunion di IPKO a tene un encuentro cu e Eilandsraad di e tres islanan di BES pa scucha e situacion na e tres islanan y en special e discusion cu nan tin cu gobierno di Hulanda riba diferente problema cu tin. Entre e problemanan cu nan tin ta e situacion di e fondonan di pensioen di e islanan, e falta di servicionan medico, e falta di inversion den infrastructura, e pobresa grandi, e falta di mehoracion di enseñansa, e cobramento di belasting dobel na St. Eustatius y otronan.
Un otro tema importante pa e islanan BES ta e proposicion di inclusion di Saba, St. Eustatius y Boneiro den Constitucion Hulandes. E islanan Boneiro, Saba y Sint Eustatius, a acerca parlamentonan di Aruba, Corsou y St. Maarten pa duna nan sosten den nan discusion cu gobierno Hulandes. Den nomber di parlamento di Aruba, Rene Herdé a expresa cu parlamento di Aruba ta sinti y compronde e preocupacionnan di e tres islanan ruman.
A palabra cu ora bolbe Aruba, lo trata e tema aki den parlamento di Aruba caminda henter e parlamento ta presente. Eynan lo dicidi cua posicion e parlamento di Aruba lo tuma. Tambe a sigura e miembronan di e delegacionnan di Boneiro, Saba y St.Eutatius, cu Aruba semper lo ta cla pa traha hunto cu e tres islanan ruman unda cu ta necesario y posibel.
Mescos cu a haci den pasado y ta haciendo por ehempel riba terenonan importante di salubridad y enseñansa. Pronto lo yama un reunion di parlamento pa trata e tema aki y tur e otro palabracionnan cu a haci den e reunionnan cu e otro tres paisnan di Reino.
