Dave Holloway kende ta tata di Natalee Holloway a declara recientemente na e noticiero Mericano NBC durante The Today Show, cu despues di un investigacion haci pa 18 luna largo, e hunto cu investigado T.J. Ward lo a descubri locual posiblemente ta restonan humano di e hoben Holloway kende a disparce 12 aña pasa despues di a bin di vakantie na nos isla. Nan ta pendiente resultado di DNA pa asina confirma esaki.
E desaparicion di Natalee Holloway, kende a wordo mira ultimo cu e sospechoso principal Joran van der Sloot, a trece hopi atencion negativo pa Aruba. Entre otro e personahe popular Nancy Grace a propaganda nos isla manera e luga mas malo pa bishita. Den pasado John Larmonie di Cuerpo Policial a splica con un noticia asina haci un impacto riba nos economia pero tambe riba e imahen di cuerpo policial.
Por tuma nota cu diferente medio di comunicacion tanto regional como internacional tin nan bista atrobe riba Aruba ya cu e declaracion di Dave Holloway lo por nifica cu e caso ta keda resolvi. Segun e portal Noticia Cla, nan tin confirmacion cu e wesonan cu a ser haya no ta di ser humano sino di bestia, posiblemente di un cacho. Nos redaccion a tuma contacto cu Ministerio Publico pero no a logra haya un reaccion na momento di redacta e noticia aki.
Mester remarca cu no ta permisibel pa coy y/of bay cu wesonan haya den subsuelo di Aruba sin autorisacion di e autoridadnan competente, sigur no ora ta trata di un caso cu ainda ta andando. No ta conoci ainda si locual a wordo haci pa Dave Holloway a bay cu autorisacion di autoridad local. Bon Dia Aruba lo ta buscando mas informacion riba esaki y pa sa si esaki no ta e caos, kico ta e pasonan cu lo wordo tuma.
