Scol Pius X ta habri aña escolar cu bentananan nobo y airco na caminda

Awe den cuadro di apertura di aña escolar nobo 2017/18, e scol Pius X na Dakota ta inicia nan aña cu un situacion diferente compara cu e situacion cu a surgi prome cu e temporada di vakantie escolar a cuminsa.

Tres siman cu prome cu scol a cera nan docentenan a protesta y expresa nan preocupacion pa e situacion cu a presenta di e bentananan den mal estado cu tabata afecta e circulacion di biento ocasionando calor pa e docentenan y studiantenan. E bentananan nobo a keda instala y ya caba nan a cuminsa traha riba e sistema pa instala airco den full scol.

Instalacion di bentana
Ayera Bon Dia Aruba a bishita e scol aki y por a mira cu e panorama ta otro, aunke ainda no tur cos pendiente pa bin cla. Cabesante di e scol aki, Sheila Tromp a declara cu nan scol ta cla pa habri awe cu bentananan nobo. Aunke e tin cu bisa cu esaki a tarda un tiki pa e proceso bini cla pa cuminsa cu e trabou di instalacion. Pero nan a logra finalmente y den un siman di tempo e compania encarga cu e trabou aki a cumpli cu nan parti.

Nan a papia prome cu Directie Onderwijs, ya cu nan a puntra si nan mester di dos dia extra (diahuebs y diabierna) pa por habri dialuna. Pero nan a delibera cu e docentenan y nan tabata dicidido pa traha 24×7 pa habri awe.

E fastioso di e situacion aki ta cu nan tabatin solamente tres dia pa prepara e klasnan, y esaki a demanda cu e docentenan mester a dedica basta oranan di nan tempo, pero nan a logra. Nan ta 12 klas y nan ta alrededor di 250 mucha cu ta haya les den e scol di bario aki. E cifra aki lo por cambia ya cu nan ta bin hayando mas mucha, pero tin otronan cu a cambia di adres y nan ta bay un scol mas cerca di nan cas.

Sistema di airco
E cabesante a expresa su satisfaccion cu e bentananan nobo. Nan ta bentananan cu ta mustra di bon calidad y nan ta habri sin problema, y esaki ta produci suficiente di aire si tin biento y siguridad den scol tambe. Scol Pius X a keda cla cu nan solicitud pa haya airco tambe. E scol aki a bay den un proyecto di instalacion di airco hunto cu mas scol rond di nos isla.

Pa e sistema di airco bira un realidad, ya caba e cabesante di Pius X tabatin reunion cu empleadonan di DOW cu a bay haci midimento den e klasnan y evalua e situacion. Diamars y ayera nan a bay check e sistema di coriente den scol pa wak si e por carg’e full. Pero nan a dicidi di haci un instalacion di coriente apart, kiermen nan no ta bay mishi cu e coriente di scol. Nan ta bay traha un rapport pa manda pa minister di Enseñansa.

Colegialidad y solidaridad
Deseo di e maestronan ta di cuminsa den un bon ambiente di trabou, pero tambe pa e muchanan por sinti nan mes mas motiva cu nan klas geverf y bunita drecha. Cabesante di e scol a bisa cu specialmente na Pius X, e coleganan docente ta traha hopi hunto pa yuda otro. E aña aki nan tin hopi docente nobo y nan ta yuda otro pa bin cla cu nan trabou. Nan mes ta verf y drecha nan klas, y pone cosnan nobo. “Nos ta purba yuda pasobra eigenlijk no ta deber di e docente tampoco”, el a laga sa.

Normalmente e tipo di trabou aki ta tuma luga cu mas tempo, pero te dialuna ultimo nan por a cuminsa ya cu e trabou di instalacion di bentananan nobo a keda entrega oficialmente e dia ey.

E docentenan boluntariamente ta verf y nan mes ta cumpra cosnan pa nan klas. Tin algun di nan cu tambe ta drecha cierto cosnan cu no ta funciona den e klas cual no ta deber di un docente. “Bo mester por haya bo klas y bo infrastructura cla y up to date. Pasobra bo ta bin pa duna les.” E ta haya cu esaki ta refleha e amor cu nan tin pa nan trabou, ya cu cada docente ta duna di nan mes tempo, ya sea den oranan di anochi te hasta den fin di siman pa traha y haci e ambiente mas agradabel pa e mucha pa e sinti su mes na cas tambe.

You May Also Like

‘Haci miho escogencia di come pa spaar bo riñon’

Diaranson tabata Dia Mundial di Riñon, en conexion cu esaki tabatin diferente actividad pa conmemora ...

Ortografia di Papiamento a bira un simbolo di Betico su lucha

Den e lucha cu e estadista Gilberto François Betico Croes (d.f.m.) kende mañan nos ...

Productonan Dominicano hayando aceptacion riba mercado local

Vice Consul di Gestion Comercial y Negoshi di Consulado di Republica Dominicana na Aruba, ...

23juni, JM, Luis Oduber.jpg

Luis Oduber di WEB: Tecnologia di energia di biento mester di monitor continuo

Energia di biento ta algo cu mester di un monitor continuo y te ainda WEB ...

‘Exceso di remedi ta daña nos riñon y higra’

Algun siman atras, nos a publica un storia di un mucha di dos aña ...

DOW: Lo tuma 4 ora maximo pa inundacion di caya seca bek

Durante un conferencia di prensa Departamento DOW a informa cu proyectonan Green Corridor y ...