Fundacion Ambiente  Feliz tabata sumamente contento di por a ricibi WEB y Aqua 48 y tambe e donacion di 3.500florin . 

 Manon Hekman di Aqua48 a entrega e donacion aki den forma di un check simbolico na Lukee Croes kende ta directora di Fundacion Ambiente Feliz, den presencia di Daniël Tecklenborg (CEDE ARUBA); Atan Lee Jr. (Peanuts Restaurant) y Asjan Donge kende vocero di WEB. Sra. Croes ta bisa cu e proyecto mes di Aqua 48 ta uno ‘hopi simpel pero hopi di admira’, ya cu pa medio di  paga 1 florin pa consumo di awa den glas di Aqua48 den e restaurantnan participante –manera Peanuts Restaurant), nan ta brindando ayudo na e fundacionnan.

Esaki ta e di shete biaha cu donacionnan ta wordo duna danki na e proyecto aki. Ambiente Feliz ta trahando riba e siguridad di e cas unda nan ta ofrece vivienda cu cuido 24 ora pa dia pa un grupo di 20 cliente cu un limitacion mental.  Nan ta bay pone cura nobo rond di e cas y pa pone un afdak y porch dilanti di e cas nan ta bay haci uzo di e donacion aki. Tambe e contribucion di lo yuda cu e landscaping, verf y mueblenan pa asina haci e porch di e cas agradabel pa e clientenan.

“Esaki sigur esaki ta un gran ayudo pa nos pa nos por realisa tur e proyectonan chikito cu nos tin pendiente ainda.”

Rol di CEDE Aruba
Daniël Tecklenborg kende ta director di CEDE Aruba cu ta un fondo di desaroyo di Aruba a bisa cu nan ta den e proyecto aki hunto cu Aqua48, y nan rol ta esun di administra nan fondo. Pero tambe nan ta conseha y haci e procedura di e peticion di e proyecto cu ta uno simpel y e ta wordo otorga pa kwartaal of cada tres luna. Pa cada aña nan ta parti e fondo crea a base di cada glas di awa bendi den e restaurantnan cu ta forma parti di e proyecto aki den cuater kwartaal.

Cada bes nan ta acerca fundacionnan pa wak si nan tin ideanan pa un proyecto. Nan ta pidi pa diligencia un peticion simpel pero formal unda nan ta haci concreto kico nan kier logra y kico e resultado ta bay ta y kico nan ta bay haci cu e fondo. A base di e peticion e comision di Aqua48 ta scoge pa un di e iniciativanan cu lo por resulta faborece cu e donacion di e fondo. Nan ta organisacion of fundacion cu tin di haber cu hubentud, hende grandi, hende cu limitacion y cuido di  bestia.

El a informa caba cu e siguiente kwartaal e fondo colecta pa Aqua48 lo bay pa e proyecto Crijojo Trappers Aruba di Nisi Canis Heart of Gold Foundation. E proyecto tin como meta pa baha e cantidad di cacho di caya y yega na un populacion di animal di caya saludabel y sterilisa. Na mes momento kier conscientisa pueblo con pa trata animal, kico ta encera e gastonan pa tene animal y enfatisa e importancia di sterilisacion pa evita cu ta dump puppies riba caya of manda nan pa e killcage.