E CPI pa juli 2017 tabatin un caida di 0.1 porciento, ekivalente na 116.55, compara cu na juni 2017 (116.70). Esaki ta acumula un caida di 1.2 porciento te na juli di e aña aki.

Pa loke ta e ultimo 12 lunanan, pues di juli 2016 pa juli 2017, e cambio ta -1.1 porciento, cual ta virtualmente mescos cu e periodo corespondiente pa aña pasa. E promedio anual di tasa di inflacion pa e periodo ey ta -0.4 porciento, cual ta un aumento di 0.4 ppt compara cu e -0.8 registra di juli 2015 pa juli 2016.

Na juli 8 di e 12 sectornan a registra caida den prijs, cual tabatin efecto riba e CPI. Transporte (0.3%), cuminda y bebida no alcoholico (-0.3%), recreacion y cultura (-0.3%), a causa un efecto di -0.05, -0.04 y -0.03 ppt. E otro sectornan tabatin un caida hunto di -0/06 ppt riba e CPI di juli 2017.

Sector di paña y sapato (0.3%) y vivienda (0.1) a contraresta e caida, cada un cu un efecto di 0.02 ppt riba e CPI di juli 2017.

E caida den e sector di “Transporte” a wordo causa door di un caida di 1.4% den e categoria “Gasto relaciona cu uso di vehiculo di transporte personal”, causando un efecto di -0.12 ppt. E caida den e sector di “Cuminda y bebida no alcoholico” a wordo causa principalmente door di un caida den e categoria “Cuminda” (-0.3%), causando un efecto di -0.03 ppt. E caida den e sector di “Recreacion y cultura” a wordo causa door di principalmente un caida di 4.0% den e categoria “Vacacion”, causando un efecto di -0.03 ppt.

E subida den e sector di “Paña y sapato” a wordo causa door di un subida di 0.6% den e categoria “Paña”, causando un efecto di 0.03 ppt. E subida den e sector di “Vivienda” a wordo causa door di un subida den e categoria “Huur di vivienda” (0.1%), causando un efecto di 0.02 ppt.

E canasta di consumo di e CPI ta consisti di 452 bienes y servicionan. Compara cu juni 2017, 25.4% di e bienes y servicionan aki a conoce un aumento di prijs causando un efecto di 0.32 ppt, mientras cu 31.6% ta mustra un caida di prijs, cu a contribui cu efecto di -0.45 ppt y pa e resto 43.0% no tawata tin cambio den prijs. Prijsnan di bienes a baha cu 0.3% na juli 2017 y a causa un efecto di -0.18 ppt riba e CPI di juli 2017. Prijsnan di servicionan a conoce un subida di 0.1% y a causa un efecto di 0.05 ppt.

E CPIC (core inflation) – CPI excluyendo e efecto di energia y cuminda – a registra na juli 2017 un subida di 0.5%, un caida di 0.3 ppt, compara cu e periodo corespondiente di aña pasa (0.8%). E indice di energia – cu ta consisti di e productonan: electricidad, awa, gasolin y diesel a registra un caida di 4.8%, cu ta 1.6 ppt mas halto compara cu e periodo corespondiente di aña pasa (-6.4%). E indice di cuminda a registra un subida di 0.7%, cu ta 1.0 ppt mas halto compara cu e periodo corespondiente di aña pasa (-0.3%).

E bestaansminimum pa un hogar consistiendo di dos (2) adulto y dos (2) mucha (edad 0-14 aña) na juli 2017 ta Afl. 4,311, mientras cu pa un hogar di un (1) adulto e suma ta Afl. 2,053.

Cambio prijs petroleo, utilidad gasolin y diesel
Prijs internacional di petroleo ta determina e prijs di utilidad (awa y coriente). E promedio di bari di petroleo ($46.29) tabatin un aumento di $0.68 (1.5%) compara cu juni 2017 ($45.61).

Na juli 2017 e prijs di gasolin a baha cu 0.41 florin (-2.3%) y a causa un efecto di -0.12 ppt riba e CPI. Prijs di diesel tambe tabatin un efecto di -0.01 riba  e CPI cu un caida di 0.49 florin (-3.5%). Como grupo, utilidad, gasolin y diesel tabatin un caida di prijs di 0.7% compara cu juni 2017, y hunto a influencia e CPI cu -0.13 ppt.