Diasabra anochi, un banda nobo yama ”Cozmic Stonez” a lansa nan prome disco na Rembrandt Cafe na unda diferente otro artista local tambe a presenta di locual a bira un bunita anochi cu dushi ambiente di musiconan local.
E banda aki a cuminsa cu 3 hende y despues di tempo tiki tiki mas hende a cuminsa forma parti di e banda. ”Nos idea ta e origen humano a bini for di e streanan den e cosmos. Tur humano riba e planeta aki tin substancia di e streanan den nan curpa. Nos curpa ta consisti di entre otro Carbon y hopi mas mineralnan cu ta forma e fundacion pa bida riba nos planeta. Esaki ta locual a inspira nos pa yama e banda ”Cozmic Stonez”, baterista Vinsely Arambatzis ta conta Bon Dia.
E apoyo pa artistanan local den genero di Reggea por ehempel no ta hopi grandi pero e apoyo t’ey si, y segun Cozmic Stonez nan ta hopi gradici cu tin basta hende cu si ta aprecia nan musica y mensahe. Nan tabata tin 2 aña di preparacion pa cera e CD completo den grabacion y practica. ”E intencion di Cozmic Stonez ta pa nos sigui produci mas musica tambe hunto cu otro artistanan local cu tambe tin hopi talento y cu ta trece e mesun mensahe pa dilanti. Nos ta bay sigui coopera cu bandanan local pa asina conhuntamente yuda hiba nos muziek pa dilanti. Trahando hunto enbes di envidia otro of purba di baha otro!”
Diasabra anochi tambe por a disfruta di presentacionnan special di Kawura, Bamboonation, Ephrayim, Bryan Blaze y Amany Om Mujer Ancestral. E album titula ”Crazy World” ainda ta den proceso pa ta obtenibel riba mercado pero esunnan cu ta interesa di cumpra esaki por tuma contacto cu e banda mes y yama of App Efraim Suurendonk na 592-5853 of Vinsley Arambatzis na 593-0675.
