Arkeologinan kende a haya wesonan fosil y djente di un especie humano anteriormente desconoci, cu a prospera mas di 50,000 aña pasa den nort di Filipinas a bisa diahuebs cu nan tin plan pa mas excavacion, y a pidi pa mas proteccion pa e compleho di cueba popular unda e restonan a wordo haya.
Arkeologo Filipino, Armand Salvador Mijares, a bisa cu e hallazgo di e restonan na e cueba Callao na provincia di Cagayan a haci Filipinas un punto importante pa investigacion di evolucion humano. E especie nobo ta yama Homo luzonensis, pa e isla principal nort di Luzon, unda e restonan a wordo haya cuminsando na 2007.
Orguyoso, Mijares a presenta seis fragmento di weso di e pia, man, y shete djente di e tres individuo di antiguedad durante un conferencia di prensa na e universidad estatal di Filipinas. Test a mustra dos di e fragmentonan fosil tabatin edad minimo di 50,000 aña y 67,000 aña, segun un estudio publica pa Nature.
Mijares, kende a lidera un team chikito di arkeologo stranhero y local tras di e descubrimento insusual, a bisa cu tin plan pa continua excavacion proximo aña, y ta spera di haya weso fosil mas grandi, artefactonan, y posiblemente herment di piedra uza pa hende e temponan ey. Apart di cueba di Callao, fosil humano a ser haya na un otro sitio den provincia di Bulacan, nort di e capital Manila.
Otro arkeologo veterano Filipino, Eusebio Dizon, a bisa cu e restonan humano di Callao ta esunnan di mas bieu haya na Filipinas, anterior na esunnan haya na cueba di Tabon riba e isla west di Palawan pa varios miles di aña.
Mientras cu e hallazgo arkeologico por atrae mas cientificonan, Dizon a preocupa cu tambe por atrae criminal y cazador di tesoro, kende lo menasa e compleho di cueba cu ta un destinacion popular pa turismo. Un kapel pafo y un altar den e compleho di cueba a bira un sitio popular pa pelicula y boda.
E exodo principal di e especie propio di homber moderno for di Africa, di cual tur hende no- Africano di awendia a descende, a tuma luga como 60,000 aña pasa.
Analisis di e wesonan for di e cueba di Callao a haci e cientificonan conclui cu ta pertenece na un miembro desconoci di e rama ‘Homo’ di e ‘family tree’ humano. Un di e weso di tenchi y e patronchi di djente general ta diferente di locual a wordo mira anteriormente den e famia Homo.
E wesonan fosil y djente haya como 3m bou tera den e cuebanan ta mustra cu ta pertenece na hende di estatura chikito. Wesonan di deer y otro bestia haya den e area, algun cu marca di corta, ta sugeri cu nan a wordo mata, maske no tabatin herment di piedra ni implementonan skerpi den e area inmediato unda a haya e fosilnan, Mijares a bisa.
Maske e hallazgo ta duna un bista nobo di e origen antiguo di homber moderno, Dizon a bisa cu tambe ta lanta preguntanan nobo y profundisa e misterio di evolucion humano.
