rganisacion Mundial di Salud (OMS) a lansa su prome guia den historia pa cuanto tempo muchanan bou di 5 aña di edad por pasa mirando un pantaya: no hopi, y completamente nada pa esunnan bou 1 aña di edad.
E agencia di salud di Nacionnan Uni a bisa ayera cu muchanan bou di 5 aña no mester pasa mas di un ora mirando pantaya tur dia – y menos di esey ta miho.
E guia ta algo similar na conseho di e Academia Mericano di Pediatra. E grupo ey ta recomenda muchanan bou di 18 luna mester evita tur pantaya otro cu video chat. E ta bisa mayornan di mucha bou 2 aña mester scoge ‘programa di calidad halto’ cu contenido educativo y cu por wordo mira cu un mayor pa yuda e muchanan compronde kico nan ta mirando.
Algun grupo a bisa cu e guia pa tempo mirando pantaya di OMS no a considera e beneficionan potencial di media digital.
E conseho di OMS ‘ta enfoca demasiado riba cantidad di tempo mirando pantaya y ta faya di considera e contenido y contexto di uzo’, segun Andrew Przybylski, director di investigacion na Oxford Internet Institute na Universidad di Oxford. “No tur pantaya ta mescos.”
E Royal College of Paediatrics and Child Health di Reino Uni a bisa cu e data disponibel ta mucho zwak pa permiti su expertonan pone cualkier limite pa e nivel apropia di tempo mirando pantaya.
“Nos investigacion a mustra cu actualmente no tin evidencia suficientemente fuerte pa pone un limite riba tempo mirando pantaya”, segun Dr. Max Davie, oficial pa mehoracion di salud di e universidad. “E restriccion riba tempo mirando pantaya sugeri pa OMS no ta parce proporcional na e daño potencial”, el a bisa.
OMS no a detaya specificamente e daño potencial causa pa mucho tempo mirando pantaya, pero a bisa cu e guia – cu tambe ta inclui recomendacion pa actividad fisico y drumimento – tabata necesario pa abarca e cantidad creciente di comportamento sedentario den poblacion general. El a nota cu inactividad fisico ta un factor di riesgo lider pa morto, y un contribuyente na e crecemento di obesidad.
E agencia ta bisa cu baby di menos di un aña di edad mester pasa menos di mey ora pa dia drumi riba nan stoma, y cu muchanan mas grandi mester haya sikiera tres ora di actividad fisico cada dia.
